Explorar los documents (3037 total)

Contributeur : Aprene, Établissement d’Enseignement Supérieur Occitan

Elena Weisslinger

Projècte PEE (Professor de las Escólas Estagiari) amb APRENE.

Aquel projècte cooperatiu es en ligam amb mon memòri de Master2 Meef que consistís en la creacion de l’aisina ‘palancas foneticas’ e son experimentacion amb un pichòt grop d’enfants disparièrs d’una classa de CE1-CE2 a la Calandreta dels Polinets a Pesenàs.

Aquesta experimentacion balhèt una resulta encoratjanta amb la lectura de mots. Donc, aqueste projècte collaboratiu a per tòca d’explicitar cossí utilizar aquesta aisina dins una classa.

A Calandreta, los escolans aprenon a legir en occitan al CP e començan l'estudi del francés en CE1. Aqueste nivèl de CE1 sembla donc propici per endralhar un aprendissatge de la lectura sillabica basat sus un estudi contrastiu del occitan e del francés.

L'utilizacion de la memòria quinesica, qu'es la memòria del gèst, del moviment ven afortir lo processús de memorizacion.

Aprèp, una presentacion de las caracteristicas de l'aisina, veirem mai en detalh cossí se debana una sesilha e per acabar listarem los limits e avantatges de l'esplech.

1. ENSENHADOR DE L'AISINA "Las palancas foneticas : lor apòrt dins l'aprendissatge de la lectura a Calandreta"

I – Presentacion de Palancas foneticas

II – Debanament d’una sesilha

III – Limits e avantatges

Annèxa : l'afichatge mural

2. Documents complementaris

A- Fichièr palancas foneticas

(N.B. : Per un afichar coma cal l'alfabet fonetic dins lo fichièr modificable, cal installar la polissa Alphonetic.)

B- Les gestes Borel-Maisonny

C- Per anar mai luènh : memòri de Master 2 La construccion d'una aisina de contrastivitat fonologica pòt optimizar l'aprendissatge de la lectura a Calandreta ?

Celina Meunier-Levray

Cossí reglar E-carnet maternelle ?

Per aver pas de bug o de problèma pendant l’annada, es important de tot plan reglar abans de metre en plaça lo portfolio dins la classa.

• Metre la basa de donadas dels observables en occitan :

Per causir vòstra basa d’observables, vos cal anar dins l’espaci professor de l’aplicacion (lo mot de Santa Clara es 1234), picar sus ‘Reglatges’, seleccionar ‘catalòg observables’ puèi dins ‘causir fiquièr catalòg’, picar sus vòstre document (lo que vos propausi aquí se sona 01-atenduts-occitan).

• Registrar las informacions de vòstra escòla :

Vos cal anar dins l’espaci professor de l’aplicacion (lo mot de Santa Clara es 1234) ; Picar sus ‘Reglatges’ ; Seleccionar ‘escòla’ puèi notar las diferentas informacions demandadas.

• Registrar las informacions sus lo/la/los/las e lo cap d’establiment.

Es possible de dintrar 3 regents diferents e de registrar la signatura de cadun (servirà per l’edicion dels portfolios).

Dins ‘multi-utilisator’, cal plan emplenar lo nom del regent qu’utiliza l’aplicacion.

• Registrar las seccions (los nivèls o lo grops segon vòstre foncionament de classa) :

Dins ‘seccions’, podètz registrar dusca 5 grops diferents. Pòdon èsser los nivèls de classa, los grops de trabalh.

• Reglar los paramètres del quasèrn de capitadas :

Vos cal picar sus ‘paramètres ecarnet’. Podètz modificar las datas de debuta e de fin del periòde, lo mot qu’apareis a la debuta del quasèrn de capitadas (cal picar sul tèxte per lo cambiar).

• Parametrar lo mandadís per mèl del portfolio a las familhas :

Vos cal picar sus ‘pararètres mèl’. Podètz pre-configurar l’objècte del mèl, las personas en còpia dels mèls (lo director per exemple. Mèfi de metre pas de personas que son pas autorisadas !), e lo tèxte del mèl que serà generat automaticament.

• Dintrar la tièra dels escolans :

Avètz doas possibilitats :

◦ Siá dintratz un per un cada enfant dempuèi l’acuèlh en picar sus lo ‘+’ en naut a dreit de l’ecran puèi emplenatz cada rubrica.

◦ Siá importatz tota la classa en meteis temps : Per aquò faire, devètz emplenar un fiquièr (format .xls o .xlsx) per assabentar las informacions dels escolans. Avètz un modèl telecargable aquí (02_onde_enriquit) o podètz utilizar lo fiquièr de onde e l'enriquir.

Dins l’espaci professor, causissètz ‘reglatges’, picatz sus ‘tièra escolans’ puèi ‘importar fiquièr escolans’ e seleccionatz lo vòstre fiquièr.

Ara, se anatz dins ‘mos escolans’ vesètz cada enfant de vòstra classa. Se volètz agachar o cambiar las informacions d’un enfant, podètz picar sus lo rond de l’enfant concernit puèi en naut a dreit sus l’icòne modificar. Podètz per exemple escriure los objectius o lo bilanç del periòde que seràn notats dins lo portfolio.

Cossí utilizar E-carnet maternelle ?

Ara, vòstra aplicacion es prèsta a èsser utilizada en classa.

Quand l’escolan capita de faire quicòm de novèl que volètz metre dins lo quasèrn de capitadas, vos cal :

◦ Picar sus l’avatar de l’escolan,

◦ Picar sus l’icòne volgut segon lo document a salvagardar (fotò, video, registrament sonor o nòta escrita)

◦ Prener la fotò`(o autre segon vòstra causida)

◦ Validar

◦ Notar lo comentari (se pòt faire aprèp se avèm pas lo temps)

◦ Registrar

Quand avètz acabat lo periòde, o que volètz agachar lo portfolio, anatz generar lo document. Per aquò faire, vos cal :

◦ Dintrar dins l’espaci professor

◦ Picar sus ‘Mos escolans’

◦ Seleccionar l’escolan que volètz estampar lo portfolio

◦ Picar sus ‘generar e-carnet’ en naut a dreit

Lo portfolio se fa veire. Lo podètz mandar a la familha per mèl merce a l’icòne tot en naut a dreit (Lo mèl es generat automaticament se avètz tot reglar a la debuta de l’an).

D’autras foncionalitats permeton de ganhar de temps (atribuir un document a un grop d’enfants per exemple). Per mai de detalhs sus las foncionalitats de l’aplicacion mai ponchudas, podètz anar sul siti https://e-carnet-maternelle.jimdofree.com/. I trobaretz plen de tutorials plan detalhats.

>> Retorn a la presentacion del Talhièr

Celina Meunier-Levray

Qué cal faire abans d’utilizar E-carnet Maternelle ?

Abans de poder utilizar E-carnet Maternelle, cal demandar e obténer una autorizacion dels parents. D'experiéncia, es plan de faire un acamp per mostrar l’aplicacion e explicar los avantatges d’aquela aisina (avètz qualques pistas dins la presentacion).

Los parents seràn rassegurats e gausaràn mai signar lo fuèlh. De saupre que las donadas son pas sus Internet : demòran sus la tauleta de classa (o sus l’ordenador segon vòstra causida)
Podètz telecargar lo document en picar sus 'télécharger les documents' d'aquela pagina : https://e-carnet-maternelle.jimdofree.com/la-reglementation/autorisations-informations-rgpd/

L’aplicacion es telecargabla sus tauleta e telefonet Androïd dins lo Play Store. Vos cal cercar : e carnet maternelle e causir l’aplicacion de TR e-solutions.

Existís tanben una version encara en betatest per ordenador (ambe lo sistem d'expleitacion Windows) que podètz cargar a l’adreiça

https://e-carnet-maternelle.jimdofree.com/version-pc-test/.

Per aver los observables en occitan, vos cal telecargar lo document 01_atenduts_occitan sus aquela pagina. Es un document al format excel que podètz melhorar e adaptar a vòstre parlar.
La version propausada aquí es en lengadocian del Tarn.

>> Retorn a la presentacion del Talhièr

Celina Meunier-Levray

Dins l’encastre de mon projècte colaboratiu, ai decidit d’adaptar un portfolio numeric – E-carnet maternelle – per l’utilizar dins ma classa. Dins aquel article, vos vau presentar perqué lo portfolio me sembla èsser una aisina interessanta dins una classa de mairala. Puèi, se aquò vos dona enveja, trobaretz los ligams per telecargar aquela aplicacion e qualques explicacions per començar a l’utilizar.

Perqué lo portfolio numeric ?

L’escòla mairala es una estapa essenciala del percor d’aprendissatge de l’enfant.

Lo regent es atentiu a motivar, orientar e sosténer sos escolans dins lors aprendissatges, e ensaja de metre en plaça d’aisinas de regulacion coerents e respectant lo desvolopament de l’enfant. L’avaloracion es una de la aisinas de regulacion del cada jorn de la classa. Deu, entre autre, mostrar los progrèsses de cadun per rapòrt a el-meteis (e non una nòta visant a seleccionar d’escolans).

La mesa en plaça educativa d’un portfolio d’aprendissatge dins la classa ofrís un instrument de regulacion dels aprendissatges. Aquela mesa en òbra pedagogica enclu los diferents actors del sistèma educatiu : parents, regent(s) e escolan. Favorisa un climat de classa propici als aprendissatges e al desvolopament cognitiu, moral e psicologic de l’enfant.

En metre l’enfant al centre de sos aprendissatges, l’objectiu es de li permetre de prene consciéncia de son desvolopament e de son percor escolar. Dins aquela encastra, lo portfolio, que pòt èsser adaptat en foncion de las causidas pedagogicas, es un aisina de comunicacion utila pels parents, l’enfant e los regents. Permet de crear de ligams entre l’escola e l’ostal.

Lo portfolio es una manièra diferenta d’avalorar. Pòt conténer las produccions d’escolans, las traças escritas (o retranscritas) que permeton de visualisar las progressions, las traças d’auto-avaloracion de l’enfant. En agachant totas sas produccions, l’escolan poirà se situir dins sos aprendissatges e s’evaluar segon d’unas competéncias explicitadas e conegudas per el. Poirà verbalisar sos progrèsses e començar a explicar los procediments mes en òbra dins la realisacion del trabalh.

Lo portfolio permet a l’escolan de progressar e de venir autonòm puèi qu’es el (eventualament ajudat pel regent) qu’es a l’origina de las causidas de las produccions dins son portfolio.

Ambe l’utilizacion del porfolio, privilegiam una avaloracion positiva de l’escolan, apiejada sus sos aquesits, sas competéncias, e sas coneissenças. Valorisa sos progrèsses e los rend visibles e comprenables per l’escolan e sa familha.

Aureli Berthelon

Vos presenti aqui un projècte menat dins l’encastre de mon annada PEE (Professora de las Escòlas Estagiaria).

La lenga occitana e sa transmission son al còr de las escòlas calandretas. Los mainatges la vivon aquela lenga, dins lor classa, en immersion. Del costat dels parents es plan diferent : d’unes ensajan de prene de corses, d’autres escotan de la musica, mas sovent sèm confrontats a una evidéncia : daissan aquela partida dins las escòlas !

Cossí permetre als parents dels calandrons de dintrar en contacte amb la lenga occitana ? Quinas aisinas per ligar parents e enfants alentorn d’aquela lenga ?

Vos prepausi aicí una aisina, mesa en plaça dempuèi doas annadas al dintre de ma classa e de l’escòla. Aprenèm l’occitan amassa amb un mot per jorn es una aisina, una mena de ritual, que permés la descobèrta d’un mot novèl per jorn (pels parents e los enfants).

I trobaretz un fichièr .pdf amb 250 mots meses en pagina, una aficha per presentar lo ritual e una tièra alfabetica del mots prepausats que poiretz completar.

Cada regent poirà la metre en plaça aisidament per sa classa o l’escòla tota, l’adaptar a son biais de foncionar, ne’n fa un supòrt per la lectura, l’escritura...