Explorar los documents (163 total)

Emission del 27 de mai de 2020

Lo temps dau cònte : La profecia dau deluvi per Amada Cròs

Nineta manja ambé sa familha dins la vilòta de Nions, au pè d'un rocassàs. La pichoneta ausís subran una votz venent de la pèira, mai la plueia es à tombar. Curiosa, l'enfant davala dins lo tunèu opressant d'un passage escondut, just dessota lo rocassàs parlant. Aqueste es lo fossile d'una bèstia de fèr : la balena deis temps passats ! Deliura a Nineta lo messatge de la profecia dau deluvi, perqu'es « l'enfantona de còr de rotge ». Deu afrontar lo Rèi deis Abís, que menaça de tornar après tant d'annadas de descasença sota tèrra. Lo deluvi comença, la droleta es esprovada per sa mission. Mai ajudada dau Pontiàs, lo vent d'aqui, se revela ben coratjosa e fòrta...

Una realizacion d'Amada Cròs

[resumit de Tè Vé Òc]

Emission del 13 de mai de 2020

Lo temps dau conte : contes ai torres de Castilhon

Per un bèu jorn de prima ben ventat, Lisa Gròs e Enric Maquet animèron una passejada en Provença ai torres de Castilhon. Lisa faguèt viure sei contes dins un paisatge bèu, entre garrigas, canaus e roinas e l’Enric Maquet venguèt apondre sa musica e sei cants ben causits. D’un luòc a l’autre es lo pais que visquèt e desvelèt sei secrets a un public pivelat. La magia de Gantverd, l’òme que plantava de faviòus magics, la naissença d’una planta eissuda de l’amor decebut d’una princessa, la musica dei mots se mesclèron amb aquela d’Enric per lo plasèr grand dei participaires.

Una realizacion de Miquèu Gravier

[resumit de Tè Vé Òc]

Emission del 06 de mai de 2020

La vestimenta au Musèu dau Nimes-Vièlh. Partida 2

Guilhem Chevalier, estudiant en licéncia d'occitan a Montpelhier, es un apassionat de bèus teissuts. Es tot naturalament qu'acceptèt de nos comentar, en provençau, quauqueis objèctes de la colleccion textila au Musèu dau Nimes-Vielhs. Dins aquela 2nda partida de nòstra virada, contuhnam nòstra visita au plan-pè, ambé lo membre consacrat a la tela « Denim », teissut present sus una polida tenguda tradicionala que vos es presentada. Puèi anam au 1er estanci, onte Guilhem nos dona de detalhs sus una rauba « a la francesa », sus de polits bas fabricats dins Gard, de gilets pron ancians e una capa « indigo » de pastre. Venètz nos seguir, a la descubèrta dei tresaurs de vestimenta dau Nimes-Vièlhs.

Un reportatge d'Amada Cròs

[resumit de Tè Vé Òc]

Emission del 15 d'abril de 2020

La vestimenta au Musèu dau Nimes-Vièlh. Partida 1

Guilhem Chevalier, estudiant en licéncia d'occitan a Montpelhier, es un apassionat de bèus teissuts. Es tot naturalament qu'acceptèt de nos comentar, en provençau, quauqueis objèctes de la colleccion textila au Musèu dau Nimes-Vielhs. Dins aquela 1èra partida de nòstra virada, nos arrestam au plan-pè, dins lo 1er membre. Es aquí que Guilhem nos explica l'istòria dei raubas ambé l'exemple d'una pèça presenta au mitan de la sala, puèi nos parla dei particularitats dei teissuts coma lo chale “boiteux”, leis imprimits e son evolucion... Venètz nos seguir, a la descubèrta dei tresaurs de vestimenta dau Nimes-Vièlhs.

Un reportatge d'Amada Cròs

[resumit de Tè Vé Òc]

Emission del 25 de març de 2020

Lo vilatge trogloditic de Barri a Bolena

Anam sus leis relèus de Bolena, dins lo massiu onte lei vestitges d'una activitat umana revelan un passat pas tant luenchenc. Lo vilatge trogloditic de Barri èra isolat de la vila e bastit sus la plana dau Barri. Juscas en 1976, un òme viviá en ermita dins una cròta amenatjada sus lo ranc de Cabrièra. Lo vilatge, e mai s'es arroïnat, es defendut per l'associacion Barry Aeria, que perseguís l'òbra de son predecessor « Les amis de Barry », per aparar lo site e preservar un patrimòni a despart dins la region. Avèm rescontrat a la debuta de l'annada de sòcis de Barry Aeria e un sòci de Parlaren à Bouleno, per nos parlar de la construccion e dau biais de viure a Barri.

Un reportatge d'Amada Cròs

[resumit de Tè Vé Òc]

Emission del 11 de març de 2020

L'associacion Aups de lutz a Forcauquièr

Avèm passat lei raras abitualas de nòstre aire de cubertura per venir a Forcauquier, dins leis Aups de Provença Auta. Aquí, au baloard dei Martirs de la Resisténcia, se tròba lo sèti deis Alpes de lumière, Aups de lutz en lenga nòstra. I' avèm entrevistat Clauda Martel, la presidenta de l'associacion. Son espós defuntat, Pèire Martel, fuguèt lo fondator dau movement Alpes de lumière. Davans la decompausicion dau païsatge provençau, la partença deis estajants e la degradacion dau biais de viure au País, Pèire Martel vouguèt sauvar çò que demorava. Una iniciativa que durarà, que l'associacion deis Aups de lutz nasquèt en 1953 e perseguís encara son òbra, ambé de nombrós domenis d'intervencions, coma lei chantiers de benevòus e l'edicion d'obratges sus la Provença larga.

Un reportatge d'Amada Cròs

[resumit de Tè Vé Òc]

Emission del 5 de febrièr de 2020

Sonalhas

Damien Maxence es factor de sonalhas a Rafèla d’Arle dins la dralha bèla de son mèstre ; senhe Servel que li vendèt son obrador. Travalha bos, cuer, os, campanas, un saupre faire seculier que lo mène pròche lei bèstias (simbèus, vacas, cabras, ases, cavalas, chins) emai leis òmes e femnas per la venda. Nos passejam per país sus lei piadas d’apassioniats : manadièra, gardian, pastres .
“Un tropèu ensonalhat es un tropèu viu” ditz Gabrièu, jove agricultor qu’abalís de vedèu sota la maire e per totei, un plaser mai qu’un travalh! Caminam dins lo pas d’un davancier de tria: Charloun Rieu (1846-1924) amé “Partènço”.

Un reportatge de Claude Queyrel, Marc Carteyrade e Viviana Roux.

[resumit de Tè Vé Òc]

Emission del 19 de novembre de 2019

Avèm profichat dei Rescòntres Occitans en Provença de l'estiu 2019, per vos concebre un reportatge sus lo patrimòni aupenc. N'aprendrètz mai sus la geologia deis Aups ambé l'especialista Joan-Claude Hippolyte-Piole, qu'avèm filmat a l'escasença dei sortidas de l'atalhier «patrimòni». Puèi, dins una entrevista amb Eliana Tourtet, jornalista e animatritz dau meme atalhier, descubrirètz l'unitat dins la diversitat dei païsatges aut-aupencs. Enfin, un testimoniatge de tria de Rogier Cézanne, un estajant dei Cròtas (comuna venguda «Les Crots»), sus l'abadiá de Boscodon, pròcha lo lac de Serre-Ponchaire, qu'eu participèt a sa valorizacion tre la fin deis annadas 60.

Un reportatge d'Amada Cròs.

[resumit de Tè Vé Òc]