Explorar los documents (1133 total)

« Dins aqueste segond volume d'òbras poëticas, Gerard Zuchetto explòra los camins de la vida e espia a l'interior dels camins de l'anma umana. Los dos camins s'i butan, s'i tustan, s'i defugisson, s'i ligan e s'i entrebèscan, segon l'anar dels mots qu'an la lor sabiesa, rebatent l'anti-azard que Renat Nelli ne cantèt l'evidéncia discrèta. L'autor s'encamina dins los passes de Raimbaut d'Aurenga, se jogant dels quites mots que se jògan de nosautres, amb clartat dins çò mai clus e mistèri dins çò mai clar, segon un trobar franc e linde. Poèmas de maturitat e de joventut duradissa s'i encadenan armoniosament, pel mai grand plaser del lector. » Franc Bardou

Fernand Barrué foguèt un poèta discrèt, pauc publicat dins sa vida e oblidat aprèp sa mòrt. Nascut a Levinhac en 1891, mòrt a Riumas en 1956, doas comunas gasconas del bacin de Sava (31), faguèt lo professor de matematicas als Sarrasins puèi a Castras, davant de se retirar dins son ròdol natal. Per reparar un injust oblit, publicam sos tres recuèlhs poetics occitans. Lo primièr, Pecics de vida vidanta, es escrich dins lo lengadocian del país castrés. Compausat pendent la guèrra, claus de poèmas « d'actualitat », denonciant l'Ocupacion, lo mercat negre, la misèria dels temps. Claus tanben de poèmas de sovenirs sul vilatge d'enfança, las sasons e los jòcs, los trabalhs e los jorns. Aquò's dins son segond recuèlh, Poscosas arantèlas d'un calelh escantit, que Barrué agandís la maduretat poetica en tornant paradoxalament a son gascon d'enfança. Afranquida de las règlas de versificacion, aquela seguida poetica es escricha jol signe de l'aiga : aiga mòrta dels canals e dels estanhs, aiga viva de Sava. Lo fil de l'aiga se trena amb lo fil del temps e nos empòrta dins lo gorg final coma en cò d'Apollinaire. Regrèts de las amors mòrtas, negror e languison, solesa e polsa d'una vida sul descreis s'exprimisson dins una fluida musicalitat : « E la posca capèra lo vièlh remembre mòrt / Dins las cendres fredas deu paure còr. » Car Barrué èra tanben un musician que jogava de mai d'un instrument, coma n'atèstan los sèt brèus poèmas del darrièr recuèlh, Musica.

Inscrivent aquel eveniment dins la continuitat de la Jornada internacionala dels dreits de las femnas e la Quinzena de l'egalitat, la Maison de region de Besièrs e lo CIRDÒC-Institut occitan de cultura vos convidan a un eveniment numeric dedicat a las Voses de femnas occitanas. Un còp non fa pas lei, es a d'òmes, soven autors tanben, qu'avèm fisada la mission de metre en votz e en lum los tèxtes de lors consòrres, escasença de còps per eles coma per nosautres, de los tornar descobrir dins una autra frasejada, un autre apròchi. Pendent aquel eveniment numeric, vos convidaram a descobrir per una serada, tèxtes torn a torn seleccionats en dialòg amb l'autora, fisats per ela o daissats a la liura causida de l'interprèta.

De tèxtes eissits del repertòri de Maëlle Dupon, Anna Regord, Benedicta Bonnet, Danièla Julien, Miquèla Stenta, Lou Petít Ausèth, l'Auceleta o Cardarino ; e legits per Florian Vernet, Domenge Caucat, Christian Andrieu, Joan-Peire KLacomba, Joan-Paul Creissac, Joan-Paul Forêt o Joan-Ives Casanova...

RDV le 19/03 dins l'onglet "Discussion" de l'eveniment sus Facebook (Aquí) per fin d'accedir a las lecturas. Esitetz pas a vos inscriure per ne recebre lo rampèl !

Clarís es una dròlla plan curiosa ; li agrada d'anar vistalhar lo papet, a la bòria. Uèi, aqueste li prepausa un jòc de devinalhas per ajudar Clarís dins sa descubèrta dels detalhs de la vida d'aquelas bèstas.

Participatz, vos tanben an aqueste jòc, que, fin finala, es pas de bon far !...

Dins aquelas dètz peçòtas trobaretz tot lo chuc que Roland Dubillard metèt dins son òbra tota : umor, emocion, suspresa. Aqueles Diablògues son estats causits per la varietat de las situacions que prepausan, simplas mas pichon a pichon transformadas per aquel mescladís d’inventivitat poetica e dramatica que fa lo succès de las scenetas d’aqueste autor.

La traduccion en occitan, dins una lenga del cada jorn, ausida dins l’enfància, permet ara, a totes, de las legir, jogar e metre en scèna per completar lo repertòri del teatre en occitan.