Explorar los documents (135 total)

vignette.jpg
Nadalenca - estagi e concèrt - Tè Vé Òc
Gros, Lise. Metteur en scène ou réalisateur

Emission del 15 de decembre de 2021

Nadalenca - estagi e concèrt

Nadalenca es un còr del Clapàs e vesem aquí un temps d'estagi amb Danielle Franzin, cantaira del ròdol de Nissa. Es venguda per preparar un concèrt bèl per lo temps de Nadal. L'ostal dels còrs de Montpelhièr met en valor un trabalh regular. Los cantaires se recampan cada dimarç a l'Ostal d'Occitania. Marijo Dory, la presidenta nos prova son enveja de faire clantir la lenga occitana. Un public nombrós se regalèt del repertòri presentat per dos caps de còr : Roxane Vega e Danielle Franzin. Cant còrse, cants provençals e nadals lengadocians fuguèron fòrça precejats.

Un reportatge de Lisa Gròs.

[resumit de Tè Vé Òc]

vignette_LGO-20211208.jpg
Fabricar un santon amb Evelina Ricòrd - Tè Vé Òc
Cros, Amy. Metteur en scène ou réalisateur

Emission del 8 de decembre de 2021

Fabricar un santon amb Evelina Ricòrd

Dins l'encastre de la setmana provençala d'octòbre passat, avèm filmat e entrevistat la santonièra Evelina Ricòrd, melhora obrièra de França. Son atalhièr per lei joines, organizat per Lou Riban de Prouvènço, aviá per tòca de partejar ambé lei participants son biais de fabricar de santons. Per nautrei a Tè Vé Òc, Evelina faguèt una demostracion rapida davans nòstrei camèras, e nos liurèt quauqueis etapas de son saupre-faire. Aqueleis imatges son entrecopats d'entrevista de la santonièra au Palais dau Rore, onte se debanava l'animacion sus lei santons.

Un reportatge d'Amada Cròs.

[resumit de Tè Vé Òc]

vignette_LGO-20211201.jpg
L'auborada dei Ficheirons - Tè Vé Òc
Gravier, Michel. Metteur en scène ou réalisateur

Emission del primièr de decembre de 2021

L'auborada dei Ficheirons

Lo 14 de novembre de 2021 a Nimes fuguèt comemorada l’auborada dei ficheirons. Fa cent ans, a l’iniciativa dei manadièrs e felibres Folco de Baroncelli-Javon e Bernat de Montaut-Manse una manifestacion sostenguda per la Nacioun Gardiano e l’Antica Confrariá dei Gardians aviá regropat dins lei carrièras de Nimes de centenats de gardians que protestavan contra una assignacion en justícia per la Société protectrice des animaux, que deviá èstre jujada a Nimes en decembre. Aquela assignacion portava sus l’organizacion de doas corridas organizadas a Nimes e una en Arles.

Lei manifestants de 1921 protestavan contra l’atenta a l’identitat e ai costumas provençalas mesas en causa per una aplicacion estricta e tendenciosa de la lei Grammont de 1850 sus lei crudelitats contra leis animaus. Cent ans après, l’istòria quequeja, tornamai lei praticas tauromaquicas son atacadas, l’usatge dei chivaus dins lo trabalh de bovina, mas tanben lo ròtle e lei praticas dau monde paisan per la cultura e la proteccion de sei produccions. La manifestacion de 2021 visava doncas a protestar contra leis agressions contra lo monde rurau, lei praticas tauromaquicas e l’identitat provençala.

Un reportatge de Miquèu Gravier.

[resumit de Tè Vé Òc]

vignette_LGO-20211124.jpg
Vida d'una castanha en Ardècha - Tè Vé Òc
Cros, Amy. Metteur en scène ou réalisateur

Emission del 24 de novembre de 2021

Vida d'una castanha en Ardècha

Quetei son lei divèrseis etapas de la castanha, de la tèrra a nòstra sieta ? Dins aquesta emission consacrada an' aqueu fruch precejat dins totei sei variantas, anarèm an' Antraigas, au còr d'Ardècha. Dau costat de Bélou, farèm coneissença ambé lei promièreis etapas de la vida d'una castanha e lei biais tradicionaus. Rescontrarèm après Joël Aymard que nos explicarà lo foncionament de la recòrda modèrna e de la triada dei fruchs. Puèi, Joan Duplan nos donarà un apercebut de l'atalhièr de transformacion que son fiu Patrice a fondat. Fin finala, acabarèm aqueste reportatge sus la confitura de castanhas cosinada per Daniel Dumas !

Un reportatge d'Amada Cròs.

[resumit de Tè Vé Òc]

vignette_LGO-20211117.jpg
Joan-Maria Roussel, estatjant de Bourdic - Tè Vé Òc
Gravier, Michel. Metteur en scène ou réalisateur

Emission del 17 de novembre de 2021

Joan-Maria Roussel, estatjant de Bourdic

Aquesta setmana Tè Vé Òc anèt au rescontre de Joan-Maria Roussel un estatjant dau vilatge de Bourdic (ducat d'Uzès) . Joan-Maria nos faguèt visitar lo vilatge e parlèt d'una de seis activitats: una pagina Facebook onte enregistra cada setmana una vidèo en lenga nòstra. Seguiguèt lei cors d'occitan de l'IEO 30 a Sant Geniès de Malgoirès per lo plasèr de parlar son "patoès" de Bourdic, vilatge qu'aima tant. Comencèt pendent lo confinhament per de cronicas sus lo vilatge e seis edificis de remarcar, puèi fuguèt sus lei praticas de cada jorn, lo trabalh de la tèrra e lei tradicions. Ara contunha en causissent cada còp lo decòr que conven a sa cronica. De retrobar sus sa pagina Facebook.

Un retrach per Miquèu Gravier.

[resumit de Tè Vé Òc]

vignette_LGO-20211023.jpg
L'abadiá de Lagrassa - Tè Vé Òc
Gros, Lise. Metteur en scène ou réalisateur

Emission del 23 d'octobre de 2021

L'abadiá de Lagrassa

L'abadiá de Lagrassa es un joièu dei Corbièiras. A riba d'Orbieu s'apara un  pauc dei vents. Es monumentala e luminosa. Una carta fuguèt signada per sa creacion en 779 per Carlesmanhe. A l'ora d'ara, 40 religiós (20 prèires) vivon dins l'abadiá. Trabalhan au jardin e a l'òrt o dins l'abadiá. Leis oficis ritman la jornada. Lo clastre, la glèisa, lei salas diversas, lo jardin son de descubrir. Lei monges cultivan la vinha e l'olivièr, doncas  vendon sei produchs, de libres e d'objèctes religiós dins la botiga a l'entrada de la cor d'onor. Es Joan Blanc, un istorian ben conegut a Carcassona que nos guidèt per aquela visita. Lo mercejam de son ajuda preciosa.

Un reportatge de Lisa Gròs.

[resumit de Tè Vé Òc]

vignette_LGO-20211103.jpg
Lo Salon dei culturas provençalas a Cadarossa - Tè Vé Òc
Cros, Amy. Metteur en scène ou réalisateur

Emission del 3 de novembre de 2021

Lo Salon dei culturas provençalas a Cadarossa

Dins lo vilatge de Cadarossa, en Vauclusa, la municipalitat organizèt en octòbre lo 1er Salon dei culturas provençalas. Iniciat per l'adjoncha a la cultura Beatritz Rehor e pairinejat per l'animator TV Frederic Soulié, lo projèct veguèt lo jorn sus una dimenchada completa, ambé de taulas d'expausants, d'animacions divèrsas dins la tantossada e de concèrts en debuta de serada. Literatura, tradicions, creacions, ensenhament, teatre, dança e musica an trobat sa plaça dins aquela manifestacion novèla. Vos prepausam adonc dins nòstra emission un apercebut d'aquel eveniment, embé de tròç nombrós d'animacions e quauqueis entrevistas.

Un reportatge d'Amada Cròs.

Musicas e cants enregistrats lei 16/10 e 17/10/21 dins la Sala Pierre Cuer a Cadarossa (84)
- Jan-Bernat Plantevin
- I anen
- La Calandreta d'Aurenja
- Les Enfants de l'Ouvèze
- L'Escolo dóu trelus
- La Cabro d'Or
- Le Moulin de Brétoule
- Le Condor

[resumit de Tè Vé Òc]

vignette_LGO-20211027.jpg
L'ostau dei mestièrs ancians - Tè Vé Òc
Carteyrade, Marc. Metteur en scène ou réalisateur

Emission del 27 d'octobre de 2021

L'ostau dei mestièrs ancians

Dins lei Cevenas a la Grand Comba, André Albérola, un ancian cubreire- zingaire collecciona dempuèi de lustres una molonada d’otís e d’objèctes utilizats dins lo temps dins divèrs mestièrs o dins la vida vidanta. Aquela colleccion exempcionala, la  volguèt presentar au grand public per lo biais de la creacion d’un musèu : «  L’ostau dei mestièrs ancians », un trabalh de titan. Dins 13 barraccas nos va faire viatjar, amb calor e passion, au còr dei mestièrs ancians sovent doblidats, mas tanben nos faire tornar viure quauquei scènas de la vida familhala de cada jorn de l’epòca. Un vertadièr romavatge que desrevelha de sovenirs bèus a un nombre grand de visitaires.

Un reportatge de Marc Carteyrade.

[resumit de Tè Vé Òc]

vignette_LGO-20211019.jpg
Collectatge dins Mondragon e son entorn - Tè Vé Òc
Cros, Amy. Metteur en scène ou réalisateur

Emission del 19 de octobre de 2021

Collectatge dins Mondragon e son entorn 

Nos interessam de mai pròche au caminament e a l'òbra de collectatge de Valentin Conte. Despuèi sa jovença, s'empreissa de recampar la literatura orala e populària dins lo canton de Mondragon, au nòrd de la Vauclusa. Sa passion per la lenga e tot çò que pòu portar l'a menat d'enregistrar sus ben lèu 20 ans de testimoniatges deis ancians, avans la despartida d'aquestei : istòrias, legendas, cançons, galejadas, biais de viure... Entre autrei nos fai lo plaser de nos passar la votz d'Enric Clariot que canta « La cançon dau Drac », figura emblematica de Mondragon. Rescontram tanben Mirelha Bastet, Mondragonesa que contribuís a l'òbra de transmession de la lenga embé lei pichòts.

Un retrach d'Amada Cròs.

[resumit de Tè Vé Òc]

vignette_LGO-20211012.jpg
Visita de Lagrassa, vilatge occitan dins Aude - Tè Vé Òc
Gros, Lise. Metteur en scène ou réalisateur

Emission del 12 d'octobre de 2021

Visita de Lagrassa

Lagrassa es un vilatge occitan polit dins un paisatge de vinhas e de sèrres, a riba d'Orbieu dins Aude. Es classat entre lei mai bèus vilatges de França. Veirem dins lo reportatge lo vilatge medievau au centre, amb son mercat cobèrt. Es un joièu de l'arquitectura de l'edat mejana. Èra un luòc d'escambis important, lo mercat mai grand dei Corbièiras. L'abadiá recebiá de taxas e leis estajants ne tiravan profièch tanben. Veirèm puèi l'abadiá famosa fondada en 779 per Carlesmanhe e descubrirem la partida de l'abadia qu'es ara la proprietat del Conselh Despartamentau. Aquela visita vos donarà l'enveja d'anar descubrir Lagrassa !

Un reportatge de Lisa Gròs.

[resumit de Tè Vé Òc]

sus 14