Explorar los documents (62 total)
Emission del 22 de junh de 2022
Lo Berlingau de Carpentràs ambé Sèrgi Clavel
Lo berlingau de Carpentràs... Aquela doçor nasquèt en 1844 ambé lo confisèire Pascal François Long. Coneiguèt un atge d'aur au siècle vinten e se produisiá de mens en mens, fins qu'a sa respelida, dins lei promiereis annadas 2000. Ambé lo vam de Sèrgi Clavel, confisèire a Carpentràs, la bonbonilha de fòrma tetraedrica reviscola e se declina en mant uns perfums. Davans nòstrei camèras, Sèrgi Clavel fabrica artesanalement de berlingaus aromatizats a la fraga e nos parteja sa passion ambé lo sosten de Robert Rouch, fondator de la confrariá de la fraga de Carpentràs.
Un reportatge d'Amada Cròs.
[resumit de Tè Vé Òc]
Emission del 14 de junh de 2022
Au país de l'oliva ambé Pascal Condamines
Anam au País de l'oliva en Droma, a Nions. A la « Ferme des Tuilières », Pascal Condamines, oleïcultor, nos aculhís dins l'oliveireda que baileja despuèi 10 ans. Aqueste Avaironés travalhèt a Paris avans de plantar cavilha dins un mas bordejat d'oliviers, que remeteguèt en cultura, puèi se reconvertiguèt en agricultor per passion. Son d'olivas de varietat « tancha », que trobam solament dins Nions e seis entorns. D'uneis oliviers an 300 ans e subrevivèron ai geladas grandas coma aquela de 1956, favorizats per lo versant miegjornau. Pascal nos explica leis etapas de la production e lei caracteristicas de la famosa « tancha », que vai après vendre, entre autrei, sus lo mercat de Nions.
Un reportatge d'Amada Cròs.
[resumit de Tè Vé Òc]
Emission del 25 de mai de 2022
En cançon ambé Liza e leis escolans d'Aurenja
Liza travalha per l'emission Vaquí sus França 3, mai es tanben cantairitz, musiciana e animatritz. Aquest an, a fach un molon d'animacions a de reng per d'establiments escolaris, a l'entorn de mai d'un projècts coma Leon lo Gripeton e Patonet. Nautre proficheriam de la setmana dei lengas au collège Barbara Hendricks, an' Aurenja, per curbir la restitucion d'una polida cançon que se sòna « Lei sochís ». Es una co-creacion musicala entre Liza e leis escolans, que se faguèt sus l'annada. Dins aquesta emission, vos presentam l'animacion sinergica porgida ai collegians dau cors de provençau, e mai la captacion complèta de la compausicion « Lei sochís » !
Un reportatge d'Amada Cròs.
[resumit de Tè Vé Òc]
Emission del 11 de mai de 2022
Au fieu de l'escortin a Nions
A Nions, en Droma miegjornala, i a una fabrica d'escortins que fonciona despuèi sa creacion en 1882. D'abòrd istòria familiala e locala, l'entrepresa se duerbe au monde e se desvelòpa amb una còla mai granda e de vendas mai importantas. La « Scourtinerie de Nyons » nos durbiguèt sei pòrtas, per una entrevista de Sophie Villeneuve sus lo percors familiau e l'evolucion de la fabrica en 130 ans, e per una visitada comentada en provençau menada per Jaumeta Hubert. Au mai pròche d'un patrimòni unique, seguirètz lo fieu de l'escortin, entre creacion e adaptacion ais usatges.
Un reportatge d'Amada Cròs.
[resumit de Tè Vé Òc]
Emission del 13 d'abril de 2022
Enfants dau teatre d'Òc
Aquesta emission es totalament consacrada au teatre jogat per lei joines en lenga nòstra ! De'n promier, anam a Vesenòbres, pròche Alès, onte d'enfants faguèron un estage de teatre per lei vacanças de febrier. Inventèron sei scenetas segon lo tèma de l'escòla. La presentacion finala se faguèt pendent la setmana occitana en març de 2022, dins una sala clafida. Proficharetz de quauquei tròç onte son implicats nòsteis entrevistats. Puèi, anam au Bois, en Droma, per la representacion de tres pèças cortas jogadas per d'escolans dau collège de Mazan. La tantossada teatrala, que mesclava lei generacions a de reng sus scena, recampèt 150 espectators. Veiretz de tròç de « L'as paga lou capèu ? », una comèdi de Carles Galtier, interpretada ambé l'estrambòrd de la joventut.
Un reportatge d'Amada Cròs.
[resumit de Tè Vé Òc]
Emission del 16 de març de 2022
L'occitan au licèu Clémenceau de Montpelhièr
En febrièr passat, lo Licèu Clémenceau a Montpelhièr organizava sa jornada « pòrtas dubèrtas ». En aquesta ocasion, la professora d'occitan Magalí Fraisse inaugurèt lei panèus en òc per nomenar las espécias vegetalas dins lo licèu. Environada d'escolans sieus, de la còla dau licèu e d'autrei convidats, presentèt lo projèct pedagogic interdisciplinari a l'entorn dei plantas, dei lengas e de l'òbra de Max Roquette. Una visita comentada dau plantum dau pargue qu'es au centre de l'establiment fuguèt tanben prepausada au monde. Descubrètz tanben d'entrevistas de Magalí Fraisse e de dos de seis escolans.
Un reportatge d'Amada Cròs.
[resumit de Tè Vé Òc]
Emission del 16 de febrièr de 2022
Docha de lenga a l'entorn de l'olivièr
Lo « banh de lenga », tanben adaptat en « docha », es una animacion organizada e prepausada per Veronica Fiol, Estève Amel e Florença Faure-Brac a Sant-Ipolit-dau-Fòrt. En 2018 nasquèt aquela activitat d'immersion linguistica presada dau public, e nautre fagueriam un reportatge sus lo banh de lenga de febrier de 2019. Dins aquesta emission, avèm seguit « una docha de lenga » pendent una mieja jornada ambé Veronica, Estève e leis estagiaires dins lei locaus de l'École des Arts Vivants. Puèi, avèm cubert la visita bilinga dins lo molin de la familha Barthélémy, a Montolieu.
Un reportatge d'Amada Cròs.
[resumit de Tè Vé Òc]
Emission del 2 de febrièr de 2022
Lei mòbles modèstes en exposicion au CIRDÒC
Per aquela debuta d'annada, lo Centre Internacionau de Recèrca e de Documentacion Occitanas a Besièrs aculhiguèt pendent 20 jorns leis òbras d'Alan Fornells, vertadièr (re)creator e contaire. Sei mòbles modèstes, coma lei sòna, son la resulta d'una concepcion intellectuala fòrça poetica e d'un artesanat experimentau sus d'objècts recuperats. Nautrei a Tè Vé Òc, fagueriam ja una emission sus son travalh en mai de 2019, puèi lo CIRDÒC nos comandèt un documentari sus lo meme subjèct per aprefondir aquela ressòrga. Lo 12/01/2022 la còla venguèt au vernissatge de l'expausicion d'Alan Fornells, onte nòstre documentari fuguèt projectat tanben e onte lo monde respondeguèt present. Proficheriam d'aquela serada per vos restituir aquel eveniment dins « Lenga d'Òc / Lengo d'O » !
Un reportatge d'Amada Cròs.
Retrobatz aicí lo documentari de Tè Vé Òc per lo CIRDÒC, difusat sus lo site Occitanica
[resumit de Tè Vé Òc]
Emission del 19 de genièr de 2022
Lo Mont Ventor d'ivèrn
« Lo Mont Ventor », « Ventor », « Lo Gigant de Provença », … aquela montanha famosa de pertot dins lo monde es emblematica dau País. Nautrei nos i siam interessats de mai pròche au Mont Ventor quora pòrta son mantèu de nèu. Per aquò, avèm entrevistat dos estatjants dau canton, dos gents de Ventor. Per la partida consacrada a l'ubac, renscontratz Vierginia Bigonnet-Balet, descendenta de Raoul Chanvert que bastiguèt lo promier chalet au Mont Seren. E per la partida consacrada au miegjorn, rescontratz Luc Reynard, ancian elegit de Bedoin acostumat dau Chalet Reynard. Laissatz-vos cabussar dins la nèu e descubrètz lei praticas dau monde dins lei relèus de Ventor.
Un reportatge d'Amada Cròs.
[resumit de Tè Vé Òc]
Emission del 8 de decembre de 2021
Fabricar un santon amb Evelina Ricòrd
Dins l'encastre de la setmana provençala d'octòbre passat, avèm filmat e entrevistat la santonièra Evelina Ricòrd, melhora obrièra de França. Son atalhièr per lei joines, organizat per Lou Riban de Prouvènço, aviá per tòca de partejar ambé lei participants son biais de fabricar de santons. Per nautrei a Tè Vé Òc, Evelina faguèt una demostracion rapida davans nòstrei camèras, e nos liurèt quauqueis etapas de son saupre-faire. Aqueleis imatges son entrecopats d'entrevista de la santonièra au Palais dau Rore, onte se debanava l'animacion sus lei santons.
Un reportatge d'Amada Cròs.
[resumit de Tè Vé Òc]