Explorar los documents (347 total)

Lo Bal en l'èr #3 a Nimes / Tè Vé Òc
Emission del 28 de març del 2019

Le Fil Production organiza un molon de concèrts e atalhièrs a l'entorn dei musicas dichas « trad ». Tè Vé Òc aguèt ja l'opportunitat de curbir quauquei seradas. Aqueste còp, vos prepausam un novèu reportatge rodat a la Scena de Musicas Actualas Paloma, a Nimes, per la tresenca edicion dau « Bal en l'èr », ambé tres concèrts. Veirètz d'entrevistas dei grops San Salvador, còr polifonic originari de Corresa, e La Base Duo, venguts de Gasconha. Nos parlaràn de son punt de vista sus l'evolucion de la musica trad e son adaptacion ais espacis divèrs, coma aquela de la SMAC Paloma. Lo tot, ambé de tròç dei concèrts !
Un reportatge de Patric e Miquèla Lapierre.


Lenga d'òc : 1907 e Leon Còrdas per Magalí Jarque-Còrdas / Tè Vé Òc
Emission del 21 de març del 2019

Lo manescrich inedit de Leon Còrdas, autor occitan defuntat en 1987, fuguèt mes en lume per sa filha Magalí, au moment que l'artista Crestian Salès cercava d'editar un obratge sus 1907. Avèm profichat d'una conferéncia-projeccion de Magalí Jarque-Còrdas a l'Ostau de la Garriga de Margarida, per una entrevista aprefondida. Aqueu rescòntre permetèt de presentar l'istoric de la crisi dei viticultors que veguèt lo jorn a quauquei quilomètres d'onte nasquèt Leon Còrdas. Lo rescòntre fuguèt tanben una opportunitat de parlar dau libre 1907, la route des gueux, un roman escrich en francés, e inicialament previst per un film.
Un reportatge d'Amada Cròs.
Lenga d'òc : Terralhas a Sant Joan de Fòrcs / Tè Vé Òc
Emission del 14 de març del 2019

Direccion Sant-Joan de Fòrcs, un vilatge d'Eraut pròche Sant Guilhem del Desèrt. Sabiatz qu'aquel endrech reviscolèt recentament una tradicion vièlha de la terralha ? Nòstra còla anèt au rescòntre de Claudi Destand. Es eu que participèt, entre autrei, a la revalorizacion dau trabalh de l'argela, e contribuèt a la creacion dau musèu Argileum. Aqueste presenta la colleccion municipala de terralhas subrebèlas e tanben l'istoric, leis espleits, la fabricacion e la coisson dins çò qu'èra un talhièr de terralhièr. Tanben, descubrètz l'òbra d'Isabèla Duisit, que fabrica d'olhats. Un mercat grandàs dei terralhièrs s'i fai cada an dins lo vilatge au mes d'avost.

Un reportatge de Marc Carteyrade.
Lenga d'òc : Claus sens Clau ambé Rodin Kaufmann / Tè Vé Òc
Emission del 7 de març del 2019

Lo poèta e artista pluri-disciplinari Rodin Kaufmann realizèt l'installacion « Clau sens Clau », comandada per lo Cirdòc. Lo licèu de l'Arc en Aurenja beneficièt d'un projècte pedagogic fondat sus aquela installacion. Vos prepausam una entrevista de l'artista, subretot a l'entorn d'aquela experiéncia ambé lei liceans. D'escolans de la classa de provençau de Matieu Peitavin participèron au projècte, e l'installacion fuguèt presentada oficialament lo 1er de febrièr au public. Lo monde posquèt descurbir un trabalh artistica tant sonòr coma visuau, dins un espaci que recampava una mòstra e una projeccion vidèo despuèi una mala. Un reportatge d'Amada Cròs.
Lenga d'òc : Banh de lenga a Sant-Ipolita-dau-Fòrt / Tè Vé Òc
Emission del 28 de febrièr del 2019

Fasèm un torn dau costat dei Cevenas, a Sant-Ipolita-dau-Fòrt, ambé l'activitat prepausada per lo Cafè Occitan de Pompinhan. Lo « banh de lenga" es una jornada d'immersion linguistica per totei nivèus, adults e enfants. Lo principe es de prepausar divèrs atalhièrs ambé d'animators que parlan en lenga nòstra, per acostumats leis aprentís, puèi, quora leis estagiaris lo vòlon, de s'expremir tanben en occitan. Tanben, s'i fai una visita bilinga dau luòc qu'aculhís leis estagiaris, qu'es lo licèu Scholae. De moments per manjar permeton tanben d'escambiar e de galejar que que siágue lo nivèu de cadun. Vos prepausam una revista d'aquela jornada embé d'entrevistas. 
Un reportatge d'Amada Cròs. 
Lenga d'òc : Leis Ampelofoliás dau Cabardès / Tè Vé Òc
Emission del 21 de febrier del 2019

Vos menam a Mossolens e Vetenac-Cabardès, en País Carcassenc. S'i debanèt en genier lo festenau "Leis Ampelofolià", qu'es un eveniment a l'entorn de la rabassa e dau vin dau terraire. Aquest an, presentèt sa 20ena edicion, ambé de manifestacions divèrsas. Per vautrei, Lisa Gròs a subretot cubert lo talhièr de cosina de Mirelha Braç. Descubrirètz lo menut cosinat en aquela escasença : la brolhada d'uòus a la rabassa, lei tartinas de fetge gras a la rabassa, leis agulhètas de polet a la rabassa raspada, lo fromatge trufat e l'ensalada a l'òli trufada. De qué vos donar ja l'apetís avans de veire nòstra emission, ambé de recetas que podrètz realizar en cò vòstre, tot en lenga nòstra !
Un reportatge de Lisa Gròs. 
Lenga d'òc : L'Espaci Occitan a Draonier (Itàlia) / Tè Vé Òc
Emission del 15 de febrier del 2019

L'Espaci Occitan veguèt lo jorn i a ben lèu 20 ans a Draonier, dins la Val Maira, una dei valadas occitanas d'Itàlia. Avèm rescontrat la Doctoressa Rosella Pellerino, directritz scientifica a l'Espaci Occitan. Aquesta nos i explica lo foncionament dei luòcs, seis activitats, e sei relacions au numeric per mielhs convenir au public. L'Espaci Occitan recampa tres organismes que son l'institut, lo centre de documentacion e lo musèu. Vos presentam un site ric e plurau, acompanhada de tròç rodats au musèu "Sòn de lenga". Una cabussada dins l'òbra multipla de la còla de l'Espaci Occitan, que partiguèt simplament de quauquei documents e libres per arribar a la creacion d'un espaci scientific grand e dinamic. Un reportatge d'Amada Cròs.
Lenga d'òc : Lei 20 ans dei Trad'Hivernales de Somèire / Tè Vé Òc
Emission dau 7 de febrièr de 2019

Aqueleis annadas passadas, Tè Vé Òc vos prepausava cada an un reportatge rodat ai Trad'Hivernalas, una institucion culturala qu'anima lo mes de genièr a Somèire e que siam partenaris. Ges d'excepcion, qu'aquest an avèm un còp de mai cubert lo festenau que sa còla dei Trad'Hivernalas festejèt sa vintena edicion ! Un rescòntre anniversari que recampava un molon d'artistas e d'animacions. Dins nòstra emission, veirètz lei temps fòrts dei Trad'Hivernalas, amb entre autrei Claudi Martí, lo platèu ràdio, lei concèrts nomadas embé Laurenç Cavalié, e subretot la serada d'anniversari qu'èra "Lo Bal dei 20 ans". Amb un molon de musicians convidats sus scena au costat de Coriandre e Garric.
Un reportatge de Miquèu Gravier

Nimes l'occitana vista per d'escrivans, Tè Vé Òc (réal.)
Association Tè Vé Òc
Centre Interrégional de Développement de l'Occitan

De Frederic Mistral a Robèrt Lafont, d'Antòni Bigot a la nòva generacion d'autors occitans (Matthieu Poitavin, Sarà Laurens...), aqueste film  es un convit a percórrer las carrièras e los barris de Nimes, per redescobrir la vila a travèrs los mots dels autors qu'a vists nàisser o s'espandir.
Lenga d'òc : Retrach d'un vinhairon e contaire / Tè Vé Òc
Emission dau 17 de genièr de 2019
 
Vos menam en Vauclusa, au rescòntre de Joan-Lop Guigue. Òme de la tèrra que ten son domèni viticòu a Violès, fàcia ai Dentèlas de Montmiralh, a tanben una passion per lo cònte. Fai quauqueis annadas qu'a integrat la còla dau Teatre Rurau d'Animacion Culturala (TRAC), per travalhar sei creacions. Es dins la vinha, ambé leis accions lei mai repetitivas, que s'imagina seis istòrias. Lei compausa dins sa tèsta mai leis escriu pas. Sei còntes son emprenhats de la cultura de la vinha, ambé d'inspiracions tradicionalas que se mudan en creacion originalas e presentats a la còla dau TRAC, puèi au public. Joan-Lop Guigue nos raconta aicí seis istòrias a l'escasença d'una serada literària a la librariá Elan Sud, puèi son mestier de vinhairon en cò sieu.
Un retrach d'Amada Cròs.
sus 35