Explorar los documents (19 total)
Emission del 23 de febrièr de 2022
Las cassòlas Not
Au Mas Sainte Puelles (11), a riba del Canal del Miègjorn, descubrissem la potariá Not, ben coneguda per sa fabricacion de cassòlas onte se prepara lo famós cassolet dins la region tota. Tres generacions de la familha Not mantenguèron la tradicion de la fabricacion d'aquelas caçòlas e es la tresena generacion que rescontram uèi. I a aquí una vertadièra caforna d'Ali Baba onte trobam las cassòlas de segur mas tanben d'autres creacions : plats, objèctes de decoracion, coma la crotz occitana e los famós diables, de plats especiaus per faire coire la volalha.
Un reportatge de Lisa Gròs
[resumit de Tè Vé Òc]
Emission del 12 de genièr de 2022
N'i a pro : Laurent Cavalié e Marie Coumes al Salon dels vins bio a Sant Ilari
"N'i a pro" es un espectacle montat per Laurent Cavalié e Marie Coumes sus las luchas vinhaironas dins las annadas 60/70. I trobam de tèxts de Marti, Michel Décor, Alranc e Rouquette.
Lo salon dels vins biò organizat dins l’abadiá de Sant Ilari (11) aculhiguèt per aquel espectacle un public nombrós. Degustacions, presentacion de vins bio aguèron un succès grand.
Rescontrèrem d' òmes e de femnas afogats de son pais e de sos vins, en particular la blanqueta. Descubrissem dins una entrevista coma aquela blanqueta nasquèt, a Sant Ilari tot bèl just.
Un reportatge de Lisa Gròs
[resumit de Tè Vé Òc]
Emission del 05 de genièr de 2022
Bufalonas en Corbièras
De bufalonas en Corbièras, aquò vos estona ? De segur que n’i a mai en Italia ! Venetz descubrir l'integracion capitada d'una familha italiana a Pradelles, dins la Val de Danha/ Corbièras, pròche Carcassona. La proprietat granda de « La Bourdasso » compren un restaurant reputat tengut per la familha Antonini. Alexandra Antonini, que s’ocupa de la bòria amb son òme, nos parla d'una installacion pauc comuna e nos explica coma faire una mozarella deliciosa. Las bèstias installadas sus un espaci grand de garriga son noiridas d’èrba seca. La reproduccion es naturala e los vedèus naisson tota l’annada. Es Alexandra que fabrica la mozzarela que vai vendre puèi suls mercats e comèrcis de la region. Fabrica tanben de glaças, de mozzarela seca e de salcissa seca de bufalonas.
Una capitada de las bèlas de veire dins lo reportatge de Lisa Gròs.
[resumit de Tè Vé Òc]
Emission del 15 de setembre de 2021
Mans de Breish - camins d'un cantaire militant
Retrobam a Serviès en Val de Danha (11), lo Mans de Breish que canta dempuèi d'annadas son pais e sa lenga occitana. Lo rescontrèrem aquest'estiu dins lei Corbièras a Villar per una bèla serada de fèsta amb scèna duberta. Mans de Breish fuguèt un dei primièrs cantaires de la nòva cançon occitana amb Robert Marti e d'autrei. Fuguèt present sul Larzac tre la debuta de la lucha e respondèt present a totei lei manifestacions de defensa de la lenga e la cultura occitana. Laissèt jamai sa region e contunha d'onorar l'occitan amb sa votz bèla e plena. Canta totjorn tant ben e vos espera a sei concèrts.
Un retrach de Lisa Gròs.
[resumit de Tè Vé Òc]
Emission del 28 de julhet de 2021
Lo molin de papièr a Brossa
Dins la valada de Dura, la rivièra bèla, a Brossa pròche Carcassona, un vertadièr joièu : lo molin de papièr nos aculhís. Tot i es presentat amb suènh e dins lo socit d'una transmission de saber faire. Un endrech bèu e ben concebut per faire veire coma se fabrica lo papièr a partir de fatas recuperadas e pas d'arbres. De maquinas ancianas, de qué fabricar lei fuèlhas, un talhièr pedagogic per enfants o adultes, tot es lest per vos aculhir. La rivière Dura vos acompanharà de sa cançon tot dau long de la visita agradiva e rica.
Un reportatge de Lisa Gròs.
[resumit de Tè Vé Òc]
Emission del 14 de julhet de 2021
Lei Rescontres de Salinelles
Un temps fòrt per la cultura occitana : lei Rescontres de Salinelles (30) que metèron la lenga a l'onor. La poesia amb de poètas e poetessas venguts d'Occitania tota, la literatura amb la preséncia d'ostaus d'edicion, lo conte amb Ester Lucada, la creacion musicala e poetica amb Rodin Kaufmann, lo concèrt/balèti e lei creacions dau grop Coriandre, brèu, una fèsta vertadièra organizada per l'editor Paul Martin e sa femna Maria Elena (L'aucèu libre), Estelle Cecarrini e Paulina Kamakina. La defensa dei lengas regionalas fuguèt facha per Michel Feltin Palas per acabar.
Un reportatge de Miquèu Gravièr.
[resumit de Tè Vé Òc]
Emission del 02 de setembre de 2020
Masada d'Auvernha
Dins lei monts dau Liuradés dormís una masada que senhoreja sus la cadena dei Puèchs. Dins leis annadas 50, 17 estajants i trabalhavan e i vivián.Au fiu deis annadas, lei vièlhs son mòrts, lei joves an partit a la vila. D'ostaus s'abausonan, d'autrei son comprats e reparats coma residéncias segondarias. Lei camps son logats a fèrma, mas pas pus de bèstias dins leis estables. Es un creba còr per Lisa Gròs que faguèt aquel reportatge sus la masada de sa mamet mairenala.
[resumit de Tè Vé Òc]
Emission del 22 de julhet de 2020
Passejada archemica a Montpelhièr
Dins aquesta emission, anam faire una passejada dins Montpelhièr e aquò, de biais archemic. Seguirem lo percors de l’aiga potabla que arribava per un pòrta-aiga ambé d'uneis arcèus fins qu'au castèu d'aiga, per après èstre distribuïda dins la ciutat. A cada etapa d'aqueu percors, un molon de simbèus archemics a l'entorn de l'aiga e de la sau escampilha aquela visita comentada per Monsur Leon Gineste, especialista de l'arquemia e autor de mai d'un obratge sus lo subjècte. Mai luenh, la visita se perseguís sus la plaça dau Peiron, puèi en passant sota la pòrta “Arc de Triomfe”, ela tanben decorada de simbèus arquemics, totjorn en davalant vèrs lo còr de vila, la plaça de la lantèrna, ambé l'estatua dei dos contraris. Enfin lo percors s'acaba sus la plaça de la Comèdia, a passa temps apelada plaça de l'uòu, onte totei leis immòbles contenon elei tanben de signes arquemics.
Un reportatge de Miquèu Gravier.
[resumit de Tè Vé Òc]
Emission del 13 de mai de 2020
Lo temps dau conte : contes ai torres de Castilhon
Per un bèu jorn de prima ben ventat, Lisa Gròs e Enric Maquet animèron una passejada en Provença ai torres de Castilhon. Lisa faguèt viure sei contes dins un paisatge bèu, entre garrigas, canaus e roinas e l’Enric Maquet venguèt apondre sa musica e sei cants ben causits. D’un luòc a l’autre es lo pais que visquèt e desvelèt sei secrets a un public pivelat. La magia de Gantverd, l’òme que plantava de faviòus magics, la naissença d’una planta eissuda de l’amor decebut d’una princessa, la musica dei mots se mesclèron amb aquela d’Enric per lo plasèr grand dei participaires.
Una realizacion de Miquèu Gravier
[resumit de Tè Vé Òc]