Explorar los documents (315 total)
Emission del 25 de mai de 2022
En cançon ambé Liza e leis escolans d'Aurenja
Liza travalha per l'emission Vaquí sus França 3, mai es tanben cantairitz, musiciana e animatritz. Aquest an, a fach un molon d'animacions a de reng per d'establiments escolaris, a l'entorn de mai d'un projècts coma Leon lo Gripeton e Patonet. Nautre proficheriam de la setmana dei lengas au collège Barbara Hendricks, an' Aurenja, per curbir la restitucion d'una polida cançon que se sòna « Lei sochís ». Es una co-creacion musicala entre Liza e leis escolans, que se faguèt sus l'annada. Dins aquesta emission, vos presentam l'animacion sinergica porgida ai collegians dau cors de provençau, e mai la captacion complèta de la compausicion « Lei sochís » !
Un reportatge d'Amada Cròs.
[resumit de Tè Vé Òc]
Emission del 18 de mai de 2022
Lo vallon d'Escaunes e Cantarelles
Lo dissabte 7 de mai a Sernhac, l'associacion Vallon d'Escaunas e Cantarèla festejava l'inauguracion d'un amainatjament de tunèus de Sernhac, situats sus lo percors dau pòrta-aiga roman d'Usès a Nimes, e la renovacion de doas capitèlas sus lo meme site. Son pairenadas per lo Consèu Generau de Gard e lo Consèu municipau deis enfants de Sernhac. Sus tot lo percors dau pòrta-aiga d'Usès a Nimes lòng de 500 quilomètres, i aguèt solament 500 mètres de tunèu cavat dins la ròca a Sernhac. I aviá tanben a Nimes, au Mont Duplan, sus 300 mètres un tunèu vuei desparegut.
Un reportatge de Miquèu Gravier.
[resumit de Tè Vé Òc]
Emission del 11 de mai de 2022
Au fieu de l'escortin a Nions
A Nions, en Droma miegjornala, i a una fabrica d'escortins que fonciona despuèi sa creacion en 1882. D'abòrd istòria familiala e locala, l'entrepresa se duerbe au monde e se desvelòpa amb una còla mai granda e de vendas mai importantas. La « Scourtinerie de Nyons » nos durbiguèt sei pòrtas, per una entrevista de Sophie Villeneuve sus lo percors familiau e l'evolucion de la fabrica en 130 ans, e per una visitada comentada en provençau menada per Jaumeta Hubert. Au mai pròche d'un patrimòni unique, seguirètz lo fieu de l'escortin, entre creacion e adaptacion ais usatges.
Un reportatge d'Amada Cròs.
[resumit de Tè Vé Òc]
Emission del 4 de mai de 2022
Lo Jornalet a 10 ans
Detz ans ja que la còla de Ferriol Massip Bonet decidèt de crear un jornal sul web en occitan. Per festejar aquel anniversari venguèt dins Aude a la prima de 2022 per lo presentar primièr als enfants de la Calandreta Pech Mary a Carcassona , de matin, puèi a l'associacion "Fasètz la lenga en Cabardés" d'après dinnar. Enfants e adultes interessats pausèron de questions a Ferriol e Gerald Joan per mièlhs conéisser çò qu'es e coma viu lo Jornalet. A l'ora d'ara que la lenga a ben besonh de promocion, es un bon mejan de la faire avançar : s'abonar al Jornalet : jornalet.com, e es a gràtis.
Un portrait de Lisa Gròs.
[resumit de Tè Vé Òc]
Emission del 27 d'abril de 2022
Dolmen de Pépieux
Una visita rica del Dolmen de las fadas a Pépieux 11, amb los comentaris de Jean Guilaine, l'arqueològ famós. Pendent las furgas d'Abriu de 2022 descubrissem tot l'ample del mai grand dolmen del miègjorn de França. Vos convidam a la passejada per vos presentar aquel monument rare.
Un reportatge de Lisa Gròs.
[resumit de Tè Vé Òc]
Emission del 20 d'abril de 2022
Tè Vé Òc a 10 ans - Dètz ans a promòure la lenga
Despuèi 2012 l'associacion Tè Vé Òc fai la promocion e la defensa de la lenga e la cultura occitanas. Dètz annadas a 4 emissions lo mes, aquò fai un nombre grand d'emissions de retrobar en podcasts sus lo site www.teveoc.com e sus Youtube tanben ! Lo 28 de mai de 2022, au Festenau Rescontre de Marguerittes 30320, aquesta vidèo sarà projectada ambé d'autrei corts-metratges a la Mediatèca Simone Veil tre 2 oras de tantòst. Ié siatz convidats, es a gràtis ! Retrobaretz dins nòstra emission leis accions qu'an marcat nòstra associacion : d'acampadas, d'estages de formacion, de Festenaus Rescontre, tota una vida regionala.
Un documentari de Lisa Gròs.
[resumit de Tè Vé Òc]
Emission del 13 d'abril de 2022
Enfants dau teatre d'Òc
Aquesta emission es totalament consacrada au teatre jogat per lei joines en lenga nòstra ! De'n promier, anam a Vesenòbres, pròche Alès, onte d'enfants faguèron un estage de teatre per lei vacanças de febrier. Inventèron sei scenetas segon lo tèma de l'escòla. La presentacion finala se faguèt pendent la setmana occitana en març de 2022, dins una sala clafida. Proficharetz de quauquei tròç onte son implicats nòsteis entrevistats. Puèi, anam au Bois, en Droma, per la representacion de tres pèças cortas jogadas per d'escolans dau collège de Mazan. La tantossada teatrala, que mesclava lei generacions a de reng sus scena, recampèt 150 espectators. Veiretz de tròç de « L'as paga lou capèu ? », una comèdi de Carles Galtier, interpretada ambé l'estrambòrd de la joventut.
Un reportatge d'Amada Cròs.
[resumit de Tè Vé Òc]
Emission del 30 de març de 2022
Circul'anim : concèrts Canti Canta e Los de l'Autan
A Villemoustaussou (11), l'associacion Circul'anim organiza sièis espectacles per an amb l'ajuda de la comuna. De pèças de teatre o de concèrts recampan un public nombrós dempuèi detz annadas, un public fidelizat que preceja la qualitat dels espectacles. Anam descubrir aquí un après dinnar a la sala G Brassens qu'aculhís en primièra partida lo grop Canti canta, de Carcassona amb de cants tradicionals amb la cap de còr Pascale Moreno e lo musicaire Adrien Villeneuve. En segonda partida es un grop d'òmes qu'interven amb de cants Pirenencs acompanhats a la guitara. Un bon moment per los afogats de cants tradicionals !
Un reportatge de Lisa Gròs
[resumit de Tè Vé Òc]
Emission del 23 de març de 2022
La Mitona : CD de Jean Guilaine e Laurent Fournier
Jean Guilaine arqueològ de renom e autor reconegut, nos presenta aquí un autre aspècte de sei creacions : un CD , La Mitona, realizat amb son amic musician Laurent Fournier. A partir dau legendari locau e de sa conèissença dei Corbièiras, Jean Guilaine creèt de paraulas e de musicas tanben per cantar detz cançons que compausan un CD fòrça agradiu. Lo presentèt a l'Ostal Sirventès de Carcassonna per lei Febrejadas ritualas que pòrtan a la coneissença dau public de creacions literarias o artisticas en occitan. Avem, dins aquesta emission, d'extrachs causits onte Joan Guilaine parla de cada cant e de son origina.
Un reportatge de Lisa Gròs
[resumit de Tè Vé Òc]
Emission del 16 de març de 2022
L'occitan au licèu Clémenceau de Montpelhièr
En febrièr passat, lo Licèu Clémenceau a Montpelhièr organizava sa jornada « pòrtas dubèrtas ». En aquesta ocasion, la professora d'occitan Magalí Fraisse inaugurèt lei panèus en òc per nomenar las espécias vegetalas dins lo licèu. Environada d'escolans sieus, de la còla dau licèu e d'autrei convidats, presentèt lo projèct pedagogic interdisciplinari a l'entorn dei plantas, dei lengas e de l'òbra de Max Roquette. Una visita comentada dau plantum dau pargue qu'es au centre de l'establiment fuguèt tanben prepausada au monde. Descubrètz tanben d'entrevistas de Magalí Fraisse e de dos de seis escolans.
Un reportatge d'Amada Cròs.
[resumit de Tè Vé Òc]