Explorar los documents (455 total)
Emission del 28 de julhet de 2021
Lo molin de papièr a Brossa
Dins la valada de Dura, la rivièra bèla, a Brossa pròche Carcassona, un vertadièr joièu : lo molin de papièr nos aculhís. Tot i es presentat amb suènh e dins lo socit d'una transmission de saber faire. Un endrech bèu e ben concebut per faire veire coma se fabrica lo papièr a partir de fatas recuperadas e pas d'arbres. De maquinas ancianas, de qué fabricar lei fuèlhas, un talhièr pedagogic per enfants o adultes, tot es lest per vos aculhir. La rivière Dura vos acompanharà de sa cançon tot dau long de la visita agradiva e rica.
Un reportatge de Lisa Gròs.
[resumit de Tè Vé Òc]
Emission del 21 de julhet de 2021
Luòc organic : una musica originala
Fin de 2019, pauc avans que la pandemia trevirèsse tot, Joan-Miquèu e Majosais Lhubac, acompanhats de sa filha e sostenguts per quauquei musicians avans-gardistas, creèron lo projèct Luòc Organic. Es una òbra originala qu'inscrivon dins un movament nòu, « Òc fusion », en esperant recampar d'autreis iniciativas a l'entorn dau mesclum d'estiles tant divèrs coma opausats. Dins aquela emission, descubriretz un apercebut dau travalh d'aqueu parèu a l'entorn de Luòc Organic, expremissent son punt de vista sus aquela mosaïca musicala. Fruch d'un caminament experimentau e audaciós, lo projèct Luòc Organic se revela en vos en mòts, en imatges e en nòtas.
Un reportatge d'Amada Cròs.
[resumit de Tè Vé Òc]
Emission del 14 de julhet de 2021
Lei Rescontres de Salinelles
Un temps fòrt per la cultura occitana : lei Rescontres de Salinelles (30) que metèron la lenga a l'onor. La poesia amb de poètas e poetessas venguts d'Occitania tota, la literatura amb la preséncia d'ostaus d'edicion, lo conte amb Ester Lucada, la creacion musicala e poetica amb Rodin Kaufmann, lo concèrt/balèti e lei creacions dau grop Coriandre, brèu, una fèsta vertadièra organizada per l'editor Paul Martin e sa femna Maria Elena (L'aucèu libre), Estelle Cecarrini e Paulina Kamakina. La defensa dei lengas regionalas fuguèt facha per Michel Feltin Palas per acabar.
Un reportatge de Miquèu Gravièr.
[resumit de Tè Vé Òc]
Emission del 7 de julhet de 2021
Lei cent ans de la ràdio
Fin de junh / debuta de mai, la ràdio festejava son centen anniversari, per Radio Alliance + dins Gard, èra tanben l’anniversari de sei 30 ans. La mediatèca de Nimes Cairat d’Art aculhiguèt per aquela escasença un platèu de Radio Alliance+ onte se succedèron lei diferents intervenents amb lei tematicas multiplas abordadas dins la ràdio. Per çò qu’es de la lenga e la cultura occitana sus Radio Alliance+, es Claudina Paul que recebiá dins son emission « Lo 30 bolega » Estèla Mazodier e Bruno Paternot.
Una emission realizada per Miquèu Gravier, amb lo concors de Miquèla e Patric Lapierre, e presentada per Claudina Paul.
[resumit de Tè Vé Òc]
Emission del 23 de junh de 2021
Un apercebut dau Festenau vidèo Rescontre
Chasca annada, Tè Vé Òc organiza una manifestacion a l'entorn de la creacion e de la produccion audiovisuala amatritz principalament, dubèrta en totei que filman en País d'Òc. Malurosament, per lo promier còp despuèi sa creacion, lo festenau que se debana totjorn en febrier èra reportat en junh dins leis arenas de Marguerittes. Mai lei costrenchas sanitàrias empechan la bòna organizacion de l'eveniment. Vos presentam adonc aquela 11enca edicion d'un autre biais, embé doas emissions consacradas ai vidèos recebudas per la projeccion iniciala. Vaquí la 2nda partida, entre poesia e documentari !
Una realizacion d'Amada Cròs.
Lista dei vidèos presentadas, de veire en entier ambé lei liames seguents :
- Occitània (version occitana) – Clip realizat per Benoit Hutin
- Paraulas de hemnas – Realizacion de Paulina Kamakine
- Leis alas dau temps – Clip video de Rodin, realizat per Piget
- Jeff d'en Bellet – Documentari de Cultura viva
- Ròsas das Ròsas – Clip de Prima Vera
[resumit de Tè Vé Òc]
Emission del 16 de junh de 2021
L'oppidum dei "Caisses de Jean Jean"
Viviana Roux nos prepausa de visitar aquesta setmana l’oppidum dei « Caisses de Jean Jean », comprene lei caissaus (molaires) de Joan Joan situat sus la comuna de Moriès, fuguèt ocupat tre lo neolitic e juscas a l’ocupacion romana. Felip Rigaud nos fai descubrir aquel site, cavat mantuns còps e que revèla cada còp de trobalhas nòvas. Avem poscut retrobar leis estelas mantuns còps milenarias conservadas au Musèu de l’Arle antica que ven de tornar dubrir. Amb de comentaris de Felip Rigaud, d’imatges de Viviana Roux e Miquèu Gravier.
Un montatge de Miquèu Gravier.
[resumit de Tè Vé Òc]
Emission del 8 de junh de 2021
Narbo Via, musèu novèl
A Narbona, en mai de 2021, se dubriguèt lo musèu Narbo Via. Concebut per Norman Foster & Partners, es fòrça capitat e d’une riquesa granda. Dins l’antiquitat romana, Narbo Martius èra una colonia importanta e lo pòrt que se trobava sus leis estanhs vèrs la Nautica e Mandirac, vesiá passar un molon de mercandisas. Narbona èra ben plaçada au crosament de la Via Domitia e de la via Aquitania e èra prospèra. Es lo pòrt que presentam dins aquel reportatge, amb batèus e anfòras. Dins de salas de projeccion, avem de vistas subrebèlas sus de batèus e son fonccionament. Dins lo musèu una paret monumentala es dedicada a de bas relèus e de pèiras escultadas que donan una idèa precisa de la civilizacion de l’epòca antica. Mosaicas, estatuas e vestigis variats vos pivelaràn. L’entrada dau Musèu es a gràtis tot lo mes de junh.
Un reportatge de Lisa Gròs.
[resumit de Tè Vé Òc]
Emission del 5 de mai de 2021
Au castèu de Simiana-la-Rotonda
Zó ! Tè Vé Òc s'expòrta aqueste còp dins leis Aups de Nauta Provença, dau costat de Simiana, ambé sa famosa « rotonda ». Nos interessam de mai pròche au castèu qu'aparteniá a la familha d'Agoult. Es amondaut que retrobam l'autor e conferencier Joan-Ives Roier, que coneis ben lei luòcs. Nos parla de la foncion e de l'espleitacion dau castèu, mai subretot de la rotonda que servissiá a passat temps ai « taulas redondas », onte lei d'Agoult aculhissián, entre autrei, de Trobadors per de fèstas musicalas e gromandas. Profichatz d'un moment excepcionau dins aqueste monument de tria, en companhiá d'un apassionat de la region qu'es Joan-Ives Roier.
Un reportatge d'Amada Cròs.
[resumit de Tè Vé Òc]
Emission del 19 de mai de 2021
L'oppidum de Nages e Solorgues
Bernat Carrièra nos fai descubrir un oppidum situat sus la comuna onte demòra : Nages-et-Solorgues. Per aqueste amator de garriga e de pèiras, se tracta pas d'una visita scientifica, mai puslèu dau racònte de l'istoric de la mesa en valor d'aqueu site remirable. Impressionat per leis òbras d'arqueologia de Maurise Aliger, e subretot de Miquèu e Catarina Py, Bernat nos parla de sa passion per l'oppidum e son istòria. Malurosament, nos pòu pas escondre son pegin sus l'endevenir d'un site pas ben aparat, expausat a l'envisament regulier de la vegetacion, mai tanben ai degalhs causats per lei visitaires.
Un reportatge de Marc Carteyrade.
[resumit de Tè Vé Òc]
Emission del 2 de junh de 2021
Manifestacion per lei lengas regionalas
Lo 29 de mai de 2021, leis occitanistas se recampèron un pauc de pertot en Occitania. Dins leis autrei regions tanben leis aparaires de totei lei lengas regionalas venguèron exprimir sa colèra après la sasina dau Consèlh constitucionau que pòrta un prejudici grand a la lei Molac votada d’aperavans. L’ensenhament imersiu es amenaçat tant dins l’ensenhament public coma en Calandreta.
Nòstra còla se desplacèt a Nimes, Carcassona e Somèires per testimoniar de la volontat dau pòple d’Òc de pas se laissar raubar sa lenga e sa cultura. Leis entrevistas fan ben veire la determinacion deis occitans de pas se laissar faire e d’autreis accions seràn previstas per aquò. TèVéÒc, directament concernida seguirà de pròche la situacion.
Una realizacion de Lisa Gròs.
[resumit de Tè Vé Òc]