Explorar los documents (455 total)
Emission del 21 d'abril de 2021
Montfaucon : un vilatge en riba de Ròse
Anem a Montfaucon, un vilatge dau Gard rodanenc, vesin d'Aurenja. Ié rescontram Clement Serguier, l'editor e co-autor dau libre « Montfaucon, un village au bord du Rhône » pareigut en cò de A l'asard Bautezar ! en 2018. Originari de Montfaucon, Clement Serguier nos guida aquí per nos presentar lei caracteristicas e quauqueis anècdòtas d'aqueu vilatge rodanenc, somés pendent lòngtemps ai caprices dau flume. Lei païsatges dau terrador, l'influéncia de Ròse, lei barons de Montfaucon... Seguissètz-nos sus lei dralhas deis epòcas que façonèran aqueu vilatge en riba de Ròse.
Un reportatge d'Amada Cròs.
[resumit de Tè Vé Òc]
Emission del 25 de mai de 2021
Un apercebut dau Festenau vidèo Rescontre
Chasca annada, Tè Vé Òc organiza una manifestacion a l'entorn de la creacion e de la produccion audiovisuala amatritz principalament, dubèrta en totei que filman en País d'Òc. Malurosament, per lo promier còp despuèi sa creacion, lo festenau que se debana totjorn en febrier èra reportat en junh dins leis arenas de Marguerittes. Mai lei costrenchas sanitàrias empechan la bòna organizacion de l'eveniment. Vos presentam adonc aquela 11enca edicion d'un autre biais, embé doas emissions consacradas ai vidèos recebudas per la projeccion iniciala. Vaquí la 1èra partida, entre musica e retrach !
Una realizacion d'Amada Cròs.
Lista dei vidèos presentadas, de veire en entier ambé lei liames seguents :
- Yves Bargues (extrait) – Retrach de Daniel Mézergues
- Ten-te fièra ! - Clip musicau de Zine
- Acabatz de dintrar – Reportatge de Gaetan Loosfelt
- Al mercat – Clip musicau de Coriandre
- Aranésòc – Reportatge de Betevé
[resumit de Tè Vé Òc]
Emission del 12 de mai de 2021
Lo canal de Carcassona de Foucaud au Fresquel
Riquet creèt lo Canau reiau dei doas mars entre Mediterranèa e Atlantic dau temps de Lois XIV e Colbert. Pasmens Carcassona volguèt pas que passe per sa vila en rason de la paur de l'epidemia de pèsta. S'avisèt lèu de la riquèsa menada per lo canau e demandèt que lo canau fuguèsse transformat.
Vos menam sus lo tròç ancian dau canau de Foucaud au Fresquel, desaparegut, per i descubrir sei vestigis en companhiá de André Authier; un afogat dau canau.
Un reportatge de Lisa Gròs.
[resumit de Tè Vé Òc]
Emission del 28 d'abril de 2021
Tocat, mas pas colat
Dempuèi una annada, Dynamogène, coma totei lei companhiás teatralas e d’espectacle de carrièra, escapèt pas ai diferents confinhaments menats per una pandemia mondiala. Dins lei locaus de la Companhiá rescontrèrem tres actors principaus en plen trabalh sus la construccion d’una novèla maquina per un futur espectacle. Volguèron ben nos parlar de sei socits ligats a lo conjonctura, mas tanben e subretot de totei leis espèrs que meton dins l’avenir. An pas baissat lei braçs mas au contrari redoblat d’esfòrçs. Una bèla leiçon d’optimisme.
Un reportatge de Marc Carteyrade.
[resumit de Tè Vé Òc]
Emission del 26 de març de 2021
La mòstra Bizzarium au Naturoptère
Venètz descurbir una partida de la mòstra Bizzarium presentada au Naturoptère de Serinhan, en Vauclusa. Ambé d'especimens e de creacions qu'estonan, que pivelan e que questionan lo monde, cabussatz dins un gabinet de curiositats ! En companhiá de Jaque Miquèu-Bechet, professor de sciéncias naturalas, anam de bèstia en bèstia per ne saupre mai sus seis anomalias : albinisme, idrocefalia, fusion variabla de gemèus, ecc… Tanben, proficharetz d'un còp d'uelh sus l'òbra d'Arapat, lo projècte d'esculpturas chimericas d'un duo d'artistas. Benvenguda dins de mondes d'estrangietats de totei menas !
Un reportatge d'Amada Cròs.
Erratum dau 24/03/21 : a 0min56, manca una "s" a "sciéncias". Vos preguèm de nos excusar d'aquela coquilha.
[resumit de Tè Vé Òc]
Emission del 10 de març de 2021
Lei mineraus
Pendent un rescòntre dins un Salon literari en Aurenja Ghislaine Brun, que parla un pauc provençau, nos confisèt sa passion per lei pèiras. Aquela passion la menèt dins la dralha de la litoterapia. Ortofonista a la retirada, Ghislaine a trobat dins aquela medecina alternativa de benfachs qu'an lo meme objectiu que son mestièr d'auxilària medicala : ajudar lo monde. Dins aquesta emission, descubrètz una brèva iniciacion a la litoterapia, onte Ghislaine nos presenta de curiositats mineralas. Vos convidam de cabussar sensa esperar dins l'èime d'aquelei tresaurs de la tèrra.
Un reportatge d'Amada Cròs.
[resumit de Tè Vé Òc]
Emission del 24 de febrièr de 2021
Bernat Vaton : arquitècte e militant
Anam au rescòntre de Bernat Vaton, figura vauclusenca ben implantada dins lo militantisme occitan. Dins aquesta emission, Bernat e son esposa Annia nos explican son punt de vista sus son mestier d'arquitèctes, puèi Bernat nos parteja sei passions artisticas, e enfin son percors dins l'aprendissatge e la transmession de la lenga d'òc. Fondator de l'associacion Ben lèu e totjorn actiu dins seis engatjaments per la Calandreta d'Aurenja, Bernat evòca sa vision dau militantisme, que fai viure entre autrei per l'emission ràdio « As ben parlat mai de qu'as dich ? » e sei dessinhs umoristics.
Un retrach per Amada Cròs.
[resumit de Tè Vé Òc]
Bernat soveta vos partejar sa pensada, en mai d'aquesta emission, dins lo tèxte seguent : "Ambé la mondializacion, la comunicacion, lei rets sociaus, lei lengas se delitan e pòdon mai se faire veire dins la vida de totei lei jorns, dins la vida publica e dei gents que son a New-York, au Canadà, ò au Japon pòdon l'entendre e la parlar. Co que fai que lei mèdias francés que fan de discriminacion dei lengas dichas "regionalas" son plus sols per comunicar. Gràcia an' aquela dubertura dei rets sociaus podèm ben lèu sauvar nòstrei lenga e cultura d'Òc. Au mens la sortir de l'oblit, per sauvar nòstra lenga nos fau crear, inventar. Es d'alhors çò que fan ambé Tè Vé Òc ! Una cultura e una lenga qu'inventa pas cabussa e se mòr. Fau pas comptar sus l'estat per sauvar nòstra lenga. Mai fau se batre per l'impausar a l'Estat. Una lenga es un dialècte qu'a una armada !"
Emission del 7 d'abril de 2021
Marie Vialade, fialaira
A Verdun de Liuradés , vilatge vièlh a la forca de dos rius e que teniá un ostau catar, fasem un rescontre bèl : Marie Vialade, la fialaira. Lei fialairas son pas nombrosas a l'ora d'ara e Marie nos presenta sei rodets, sei fusèus e la lana de cabra. La fau primièr lavar aquela lana e es au lavador dau vilatge que se fai. Profiecham en meme temps de tres cants de fialaira tradicionaus que Marie e Danièlle cantan dins lo grop Canti Canta de Carcassona. Nos fai descubrir son activitat de cardatge, de fialatge puèi sei creacions perçò que tricòta sa lana la Marie. Son raras ara las fialairas e Marie, plena de bona umor nos fai de demonstracions preciosas. Participa a de fèstas tradicionalas onte rescontra un public estonat e interessat per son art : Jornadas dau patrimòni per esemple.
Un reportatge de Lisa Gròs
[resumit de Tè Vé Òc]
Lapierre, Patrick. Metteur en scène ou réalisateur
Emission del 13 d'abril de 2021
Florença, contaira naturalista
Florença Malafosse, aqüarelista, contaira, ecologista e afogada de las lengas a creat un film d’animacion metent en scèna la vida dels eiriçons vivent dins son òrt. Un biais de transmetre de valors de respièch de la natura, destinadas als joves enfants. D’episòdi en episòdi, la familha de Silvestre se fa bèla, subretot aprèp lo rescontre de Leonia... Per Florença, la causida de l’occitan es justificada per lo demai de poesia que porgís la lenga. Los dessenhs, l’aqüarela e lo conte fòrman un ensemble tant agradíu a l’uèlh que tocant per son messatge.
Un retrach de Miquèla e Patric Lapierre.
[resumit de Tè Vé Òc]
Emission del 17 de març de 2021
La Comuna de Marselha
Lo 23 de març de 2021 Marselha vai comemorar lei 150 ans de la proclamacion de la Comuna de Marselha. Dins aqueste encastre, vos prepausam una emission sus l'Istòria de la Comuna de Marselha en 1871. Lo movament revolucionari de la Comuna aguèt pas soncament luòga a París coma lo voudrián laissar dire un molon de mèdias parisencs, mai tanben dins tota la França e en Occitània mai particulierament. De Limòtge a Narbona, e de Foish a Marselha. Sauvatjament reprimida per l'Estat Francés, la Comuna de Marselha comptarà au mens 150 mòrts. Per tractar aqueu subjècte particulier, descubriretz subretot lei comentaris de saberuts come Roland Pécout e Claudi Barsotti.
Un documentari de Miquèu Gravier
[resumit de Tè Vé Òc]