Mediatèca

Tematicas : Tèxtes, sons, vidèos, imatges, sites web : tota la documentacion numerica occitana recampada dins la Mediatèca d'Occitanica

2016-2018 Projècte Erasmus +
Percors TICE : l'Educacion al desvolopament durable dins nòstras lengas

De l’escobilha a l’òrt, de l’òrt a la taula, e zo ! // De la poubelle au jardin, du jardin à la table, et zou ! // Dai rifiuti all’orto, dall’arto alla tavola.. e avanti! // Dou bidon ou courtil, dou courtil a la tabla, et ommo! // Del contenidor a l’hort, de l’hort a la taula, i endavant! // De la brasura al huerto, del huerto a la mesa, y adelante!

Presentacion

L'aventura Erasmus + Percors TICE « l’Educacion al Desvolopament Durable (EDD) dins nòstras lengas », concebuda amb las conselhièras pedagogicas d’occitan de l’Acadèmia de Montpelhièr (DASEN) e pilotada pel Centre interregional de desvolopament de l’occitan (CIRDÒC), lo projècte reuissèt pendent dos ans (2016-2018) 8 partenaris a travèrs 4 regions europèas (region Occitània, Val d’Aran, Val d’Aosta e Piemont) dins las qualas 6 lengas son parladas : l’occitan, lo francoprovençal, lo catalan, lo francés, l’espanhòl e l’italian.

L’objectiu ? Permetre als ensenhaires e escolans de 4 regions europèas de se rencontrar, d'escambiar lors experiéncias e de collaborar sus l’educacion al desvolopament durable e l’utilizacion de las novèlas tecnologias en profechar d'un atot dels bèls per menar aquesta reflexion a l’escala europèa : qual que siá lor país, los participants als escambis aprenon e ensenhan dins un environament escolar bi/plurilingüe, es a dire dins lo qual los ensenhaments son dispensats dins doas lengas o mai.
Lo programa se debanèt pendent dos ans al ritme de :
  • 4 seminaris transfrontalièrs de formacion dels ensenhaires ;
  • 3 escambis entre escolans de 10-12 ans de Maruèjols (Region Occitània, França) Vielha (Val d'Aran, Espanha), e Morgex (Valada d'Aosta, Itàlia) ;
  • projèctes collaboratius menats dins las classas de las quatre regions (jòcs numerics).

Occitanica vos propausa de retrobar totas las realizacions del projècte dins aqueste espaci.

Las realizacions en linha

Jòcs numerics dins la Maleta

De jòcs per s'iniciar al desvolopament durable e a las lengas romanicas (entre autres occita – gascon aranés e lengadocian -, italian e francés) en s'amusant, creats en classa pels pichons e pels grands dins l'encastre del projècte ERASMUS + L'EDD dins nòstras lengas
Jogar
Campus : Actes dels seminaris de formacion ensenhaires del programa Erasmus +

Podètz retrobar sul Campus los contenguts dels seminaris transfrontalièrs de formacion dels ensenhaires, organizats al còr del projècte dins la tòca de desvolopar de practicas innovantas al nivèl europèu en matèria d'educacion bi/plurilingüa (entre autres, en emplegant l'intercompreneson) e d'educacion al desvolopament durable via las tecnologias de l'informacion e de la comunicacion per l'ensenhament.
Se formar
Talhièrs : outils d'exploitations "Jeux numériques et outils didactiques - Projet Erasmus + « Parcours TICE : l'éducation au développement durable dans nos langues »

Los ensenhaires trobaràn dins aquel espaci de la Maleta d'Occitanica l'ensems dels otisses didactics que lor permetràn d'espleitar los jòcs numerics realizats dins l'encastre del projècte (a l'entorn de l'aprendissatge de las lengas, de l'intercompreneson de las lengas romanicas, de l'educacion al desvolopament durable, de l'educacion a las tecnologias de l'informacion e de la comunicacion) o de ne desvolopar.
Las lengas mai representadas dins los jòcs son las lengas d'ensenhament dels partenaris del projècte : occitan aranés, occitan lengadocian, italian, francés.

Faire jogar
Talhièrs : fichas d'experiéncia multilingüas

A un pes, l'aire ? Quant de temps meton los degalhs per se degradar ? Cossí realizar un pluviomètre en materials reciclats ? Realizat pel projècte Erasmus + « L'EDD dins nòstras lengas » per l'ANISN-VDA, aquel quasèrn de 35 experiéncias per faire en classa o a l'ostal se pòt telecargar sus la Maleta en cinc versions linguisticas.
Experimentar
Librets d'exercicis, avaloracion e progression

Lo grop de las ensenhairas bilingüas de Losera e los formators (Conselhièra pedagogica departamentala - Lenga e Cultura occitanas e referent numeric IEN Mende) del projècte Erasmus + « Percors TICE : l'Educacion al desvolopament durable dins nòstras lengas » a concebut aquestes librets d'exercicis per permetre la mesa en plaça d'activitats e d'evaluacions per cada cicle a l'entorn de l'EDD, de las competéncias numericas e de l'intercompreneson. La progression propausada dins lo domeni del numeric es la resulta de las evaluacions diagnosticas realizadas dins l'encastre del projècte. Aquel quadre comun permet d'inscriure los aprendissatges dins un percors de l'escolan de la mairala a la 6ena : primièra annada de collègi e de donar una unitat als aprendissatges al nivèl europèu.
Avalorar e progressar

Descobrir totes los partenaris e contributors