Explorar los documents (15468 total)

Dos acrobatas evoluisson en coregrafia al son de las paraulas del Daniel Fabre e d'adolescents, registrats dins licèus e collègis del país occitan, en contèxte urban e rural, mas tanben endacòm mai dins d'autras regions : paraulas e accents de joves sus la transformacion de se, punts de vista del cercaire. Los acrobatas siulan, escopisson, pòrtan costumes dins los quals se combinan lo salvatge e lo domestic, l'uman e lo non uman, las tradicions e estiles urbans e rurals, los genres femenins e masculins. Pèls animalas, plumas, suèja, cadenas, campanas, bastons, cranis e còrnas, luchas, crits e siblaments d'aucèls... aitant d'objèctes e de gèstas coma possibles coregrafics. Gèstes, danças, paraulas e siloetas questionan e montran la metamorfòsi de la joventud, entre aprobacion e transgression, genres e règlas, domestic e salvatge,  siblament de l'aucèl, sexualitats e figura de l'ors, fragilitats e expressions. 

Daniel Fabre travalhèt aquel tèma de l'iniciacion femenina e masculina « invisiblas » a partir de terrens contemporanèus ont los dròllets caçan, se desguisan, aiman los engenhs, imitan los aucèls e las bèstias... notadament dins Pirenèus e a partir de l'imaginari de l'ors. Es remarcable de tornar trobar dins las vilas e los barris, a Paris o a Marselha, los enjòcs e estereotipes masculins de la ruralitat que ne parlèt Fabre. Per Siffleurs de Danse, entendèm d'extraits de la conferéncia Condorcet de Daniel Fabre, prononciada en 2015 a Paris, remesa en jòcs e en resson pels acrobatas e lor musica : de testimoniatges de la joenesa en 2020. Lo tèxte es tradusit a minima per ofrir lo sens de las paraulas, magnificar las lengas e permetre una vision aisida de la pèça dels dos costats de Pirenèus. 

Siffleurs de dança adopta una forma leugièra, mostrabla sus una plaça publica, dins una cors de collègi o de licèu, dins una sala de las fèstas o dins la sala d'un teatre. S'adreça en particulièr als joves entre 12 e 18 ans, que donarà a ausir las voses : cossí se transformar e devenir an aquela edat.