Explorar los documents (5 total)

Dens l'encastre de l'annada de professora de las escòla estagiària dab l'establiment Aprene, qu'èi bastit un projècte de tribalh cooperatiu a l'entorn de Familhas de Lengas.

Augan, que soi en pòste dens ua classa unenca de cicle 1 dab escolans de Petita Seccion a Grana Seccion. Tres la rentrada de seteme, que m'avisi qu'arcuelhem a l'escòla hèra de mainats qui son en contacte dab ua cultura diferenta de las nostas culturas francesa e occitana, que sian per rasons familiaus o pr'amor de viatges.

Tà que la classa posca profieitar d'aquesta riquessa culturau e que los mainats poscan partatjar las experiéncias e escambiar a l'entorn deu viscut, qu'èi cercat un mejan d'arcuélher las diferentas culturas a l'escòla e quin las har entrar dens la classa cooperativa.

Alavetz, qu'èi causit de har un collectatge d'enregistraments de comptinas dens las diferentas lengas que podem ausir e enténer. L'objectiu qu'ei d'afinar l'escota, de hicar en evidéncia lo ligam entre las lengas e de crear palancas.

Un vintenat que comptinas qu'estón donc enregistradas, de longor e de dificultat variables, çò qui permet de pertocar tots los cicles.

Atau, en mei deus fiquièrs sons, que trobaratz un document dab la transcripcion de las paraulas dens la lenga originau. Los tèxtes que son acompanhats d'ua revirada en occitan tà ajudar las personas, autant los regents com los escolans, a compréner de qué parlan las comptinas quan las escotam en classa.

Occitanica · Comptinas deu monde

Per aver pas de bug o de problèma pendant l’annada, es important de tot plan reglar abans de metre en plaça lo portfolio dins la classa.

      Per causir vòstra basa d’observables, vos cal anar dins l’espaci professor de l’aplicacion (lo mot de Santa Clara es 1234), picar sus ‘Reglatges’, seleccionar ‘catalòg observables’ puèi dins ‘causir fiquièr catalòg’, picar sus vòstre document (lo que vos propausi aquí se sona 01-atenduts-occitan).

      Vos cal anar dins l’espaci professor de l’aplicacion (lo mot de Santa Clara es 1234) ; Picar sus ‘Reglatges’ ; Seleccionar ‘escòla’ puèi notar las diferentas informacions demandadas.

      Es possible de dintrar 3 regents diferents e de registrar la signatura de cadun (servirà per l’edicion dels portfolios).

      Dins ‘multi-utilisator’, cal plan emplenar lo nom del regent qu’utiliza l’aplicacion.

      Dins ‘seccions’, podètz registrar dusca 5 grops diferents. Pòdon èsser los nivèls de classa, los grops de trabalh.

      Vos cal picar sus ‘paramètres ecarnet’. Podètz modificar las datas de debuta e de fin del periòde, lo mot qu’apareis a la debuta del quasèrn de capitadas (cal picar sul tèxte per lo cambiar).

      Vos cal picar sus ‘pararètres mèl’. Podètz pre-configurar l’objècte del mèl, las personas en còpia dels mèls (lo director per exemple. Mèfi de metre pas de personas que son pas autorisadas !), e lo tèxte del mèl que serà generat automaticament.

      Avètz doas possibilitats :

        ◦ Siá dintratz un per un cada enfant dempuèi l’acuèlh en picar sus lo ‘+’ en naut a dreit de l’ecran puèi emplenatz cada rubrica.

        ◦ Siá importatz tota la classa en meteis temps : Per aquò faire, devètz emplenar un fiquièr (format .xls o .xlsx) per assabentar las informacions dels escolans. Avètz un modèl telecargable aquí (02_onde_enriquit) o podètz utilizar lo fiquièr de onde e l'enriquir.

          Dins l’espaci professor, causissètz ‘reglatges’, picatz sus ‘tièra escolans’ puèi ‘importar fiquièr escolans’ e seleccionatz lo vòstre fiquièr.

Ara, se anatz dins ‘mos escolans’ vesètz cada enfant de vòstra classa. Se volètz agachar o cambiar las informacions d’un enfant, podètz picar sus lo rond de l’enfant concernit puèi en naut a dreit sus l’icòne modificar. Podètz per exemple escriure los objectius o lo bilanç del periòde que seràn notats dins lo portfolio.

Ara, vòstra aplicacion es prèsta a èsser utilizada en classa.

Quand l’escolan capita de faire quicòm de novèl que volètz metre dins lo quasèrn de capitadas, vos cal :

        ◦ Picar sus l’avatar de l’escolan,

        ◦ Picar sus l’icòne volgut segon lo document a salvagardar (fotò, video, registrament sonor o nòta escrita)

        ◦ Prener la fotò`(o autre segon vòstra causida)

        ◦ Validar

      ◦ Notar lo comentari (se pòt faire aprèp se avèm pas lo temps)

        ◦ Registrar

Quand avètz acabat lo periòde, o que volètz agachar lo portfolio, anatz generar lo document. Per aquò faire, vos cal :

        ◦ Dintrar dins l’espaci professor

        ◦ Picar sus ‘Mos escolans’

        ◦ Seleccionar l’escolan que volètz estampar lo portfolio

        ◦ Picar sus ‘generar e-carnet’ en naut a dreit

Lo portfolio se fa veire. Lo podètz mandar a la familha per mèl merce a l’icòne tot en naut a dreit (Lo mèl es generat automaticament se avètz tot reglar a la debuta de l’an).

D’autras foncionalitats permeton de ganhar de temps (atribuir un document a un grop d’enfants per exemple). Per mai de detalhs sus las foncionalitats de l’aplicacion mai ponchudas, podètz anar sul siti https://e-carnet-maternelle.jimdofree.com/. I trobaretz plen de tutorials plan detalhats.

>> Retorn a la presentacion del Talhièr

Abans de poder utilizar E-carnet Maternelle, cal demandar e obténer una autorizacion dels parents. D'experiéncia, es plan de faire un acamp per mostrar l’aplicacion e explicar los avantatges d’aquela aisina (avètz qualques pistas dins la presentacion).

Los parents seràn rassegurats e gausaràn mai signar lo fuèlh. De saupre que las donadas son pas sus Internet : demòran  sus la tauleta de classa (o sus l’ordenador segon vòstra causida)
Podètz telecargar lo document en picar sus 'télécharger les documents' d'aquela pagina : https://e-carnet-maternelle.jimdofree.com/la-reglementation/autorisations-informations-rgpd/

L’aplicacion es telecargabla sus tauleta e telefonet Androïd dins lo Play Store. Vos cal cercar : e carnet maternelle e causir l’aplicacion de TR e-solutions. 

Existís tanben una version encara en betatest per ordenador (ambe lo sistem d'expleitacion Windows) que podètz cargar a l’adreiça

https://e-carnet-maternelle.jimdofree.com/version-pc-test/.

Per aver los observables en occitan, vos cal telecargar lo document 01_atenduts_occitan sus aquela pagina. Es un document al format excel que podètz melhorar e adaptar a vòstre parlar.
La version propausada aquí es en lengadocian del Tarn.

>> Retorn a la presentacion del Talhièr

L’escòla mairala es una estapa essenciala del percor d’aprendissatge de l’enfant.

Lo regent es atentiu a motivar, orientar e sosténer sos escolans dins lors aprendissatges, e ensaja de metre en plaça d’aisinas de regulacion coerents e respectant lo desvolopament de l’enfant. L’avaloracion es una de la aisinas de regulacion del cada jorn de la classa. Deu, entre autre, mostrar los progrèsses de cadun per rapòrt a el-meteis (e non una nòta visant a seleccionar d’escolans).

La mesa en plaça educativa d’un portfolio d’aprendissatge dins la classa ofrís un instrument de regulacion dels aprendissatges. Aquela mesa en òbra pedagogica enclu los diferents actors del sistèma educatiu : parents, regent(s) e escolan. Favorisa un climat de classa propici als aprendissatges e al desvolopament cognitiu, moral e psicologic de l’enfant.

En metre l’enfant al centre de sos aprendissatges, l’objectiu es de li permetre de prene consciéncia de son desvolopament e de son percor escolar. Dins aquela encastra, lo portfolio, que pòt èsser adaptat en foncion de las causidas pedagogicas, es un aisina de comunicacion utila pels parents, l’enfant e los regents. Permet de crear de ligams entre l’escola e l’ostal.

Lo portfolio es una manièra diferenta d’avalorar. Pòt conténer las produccions d’escolans, las traças escritas (o retranscritas) que permeton de visualisar las progressions, las traças d’auto-avaloracion de l’enfant. En agachant totas sas produccions, l’escolan poirà se situir dins sos aprendissatges e s’evaluar segon d’unas competéncias explicitadas e conegudas per el. Poirà verbalisar sos progrèsses e començar a explicar los procediments mes en òbra dins la realisacion del trabalh.

Lo portfolio permet a l’escolan de progressar e de venir autonòm puèi qu’es el (eventualament ajudat pel regent) qu’es a l’origina de las causidas de las produccions dins son portfolio.

Ambe l’utilizacion del porfolio, privilegiam una avaloracion positiva de l’escolan, apiejada sus sos aquesits, sas competéncias, e sas coneissenças. Valorisa sos progrèsses e los rend visibles e comprenables per l’escolan e sa familha.

Aprene amb la natura, en anant defòra.
Crear un casal amb plantas e animals dins l’escòla, per amodar l’observacion dirècta del viu al fial de las sasons, l’experimentacion, lo suènh jornadièr.
Transformar las practicas educativas de l’escòla (classa defòra, implicacion dels parents, rituals periescolars…)

Aqueste libròt bilingüe desira testimoniar del projècte « Anem Defòra » que foguèt botat en plaça per l’escòla Calandreta Jansemineta d’Agen, dempuèi 2017. Testimònia de l’interès e de las accions del defòra per balhar enveja a d’autras escòlas de s’engatjar dins aquela aventura.

En efècte, lo projècte « Anem defòra » es l'utilizacion de l'òrt coma aisina pedagogica a dintre de l’escòla. Aqueste libròt explica cossí faguèrem per crear pichon a pichon lo nòstre casal e cossí faguèrem per i botar tot çò que i a a l’ora d’ara : galinas, conilh, pesquièr, ostalariá d’insèctes, òrt, compòst..., las activitats que permet aquela aisina e los anar-tornar entre lo dedins e lo defòra.

Lo libròt es l’idèa d’aisina memòria e tanben per eissemar lo projècte : balhar enveja de realizar un projècte parièr dins la seuna escòla.

Aqueste trabalh d’escritura d’un libròt foguèt realizat dins l’encastre de l’annada PEE amb APRENE.

An collaborat sul libre :
Melodia BARTHE (regenta e co-autora) per la calandreta Jansemineta
Julie LURO per l’associacion Au Fil des Séounes (co-autora)
Juliette ARMAGNAC (illustratitz)
Emilie BLABLA (grafista)

Aquel libre foguèt fargat mercés al sosten financièr de la Fondacion Nature & Découvertes www.fondation-natureetdecouvertes.com

Somari

Lo projècte / Le projet

• « Anem defòra », qu’es aquò ? / « Anem defòra », qu’est-ce que c’est ?
• La naissença del projècte / La naissance du projet
• Sa mesa en òbra / Sa mise en place

L'òrt / Le Potager

• Sa mesa en plaça / Sa mise en place
• Son impacte suls mainatges / Son impact sur les enfants
• Son impacte sul temps de classa / Son impact sur le temps de classe
• Sa dobertura / Son ouverture

La cortada / La basse-cour

• Mesa en plaça del galinièr / Mise en place du poulailler
• Projèctes a l’entorn de la cortada / Projets autour de la basse-cour
• L’arribada del conilh / l’arrivée du lapin

L’acuèlh de la fauna salvatja / l’accueil de la faune sauvage

• Los nisadors / les nichoirs
• Lo pesquièr / la mare
• L’ostalariá d’insèctes / L’hôtel à insectes

L’escòla defòra / l’école dehors

• Autres projèctes a l’entorn del casal / Autres projets autour du jardin
• Autres casals dins d’autras escòlas / Autres jardins dans d’autres écoles

Bibliografia / bibliographie