Explorar los documents (709 total)
Emission del 29 de junh de 2022
Als rescontres de Salinèla una taula redonda animada per Amada Cròs e plan capitada, a acampat Gisèle Naconaski, jornalista a Ràdio Lenga d'Òc e Cathy Dufour, professora d'occitan. En responsa a aqueles que dison que l'occitan servís a res, tres femnas qu'en vivon!
Un reportatge de Tè Vé Òc.
[resumit de Tè Vé Òc]
Emission del 22 de junh de 2022
Lo Berlingau de Carpentràs ambé Sèrgi Clavel
Lo berlingau de Carpentràs... Aquela doçor nasquèt en 1844 ambé lo confisèire Pascal François Long. Coneiguèt un atge d'aur au siècle vinten e se produisiá de mens en mens, fins qu'a sa respelida, dins lei promiereis annadas 2000. Ambé lo vam de Sèrgi Clavel, confisèire a Carpentràs, la bonbonilha de fòrma tetraedrica reviscola e se declina en mant uns perfums. Davans nòstrei camèras, Sèrgi Clavel fabrica artesanalement de berlingaus aromatizats a la fraga e nos parteja sa passion ambé lo sosten de Robert Rouch, fondator de la confrariá de la fraga de Carpentràs.
Un reportatge d'Amada Cròs.
[resumit de Tè Vé Òc]
Emission del 14 de junh de 2022
Au país de l'oliva ambé Pascal Condamines
Anam au País de l'oliva en Droma, a Nions. A la « Ferme des Tuilières », Pascal Condamines, oleïcultor, nos aculhís dins l'oliveireda que baileja despuèi 10 ans. Aqueste Avaironés travalhèt a Paris avans de plantar cavilha dins un mas bordejat d'oliviers, que remeteguèt en cultura, puèi se reconvertiguèt en agricultor per passion. Son d'olivas de varietat « tancha », que trobam solament dins Nions e seis entorns. D'uneis oliviers an 300 ans e subrevivèron ai geladas grandas coma aquela de 1956, favorizats per lo versant miegjornau. Pascal nos explica leis etapas de la production e lei caracteristicas de la famosa « tancha », que vai après vendre, entre autrei, sus lo mercat de Nions.
Un reportatge d'Amada Cròs.
[resumit de Tè Vé Òc]
Emission del 8 de junh de 2022
La Mal Coiffée : ROGE
ROGE, novèl espectacle de La mal coiffée empliguèt la sala a l'Espaci culturau dei Corbièras (Ferrals de Corbièras). Lo grop repren la paraula còntra totei lei dominacions : colonialas, nacionalas, economicas e mediaticas. Polifonia e percussions racontan lei gents d'aquí ò aquelei que vivon en Lengadòc en percorrent eiretatges e istòrias particulièras. La lenga occitana es ben aquí, pron viva, cantanta e lèsta de dire sei solidaritats e de norrir de totei leis emancipacions e resisténcias populàrias de per lo monde.
Un reportatge de Lisa Gròs.
[resumit de Tè Vé Òc]
Emission del primièr de junh de 2022
Lo claus de la Lombarda
A Narbona, lo Claus de la Lombarda ganha d'èstre conegut. L'Associacion Les amis du Clos de la Lombarde òbran sens relambi per lo promòure. Una visita s'impausa, rica mercè als panèls, a las maquetas e a l'entreten dels vestitges. Podem retrobar aquí de testimoniatges precióses de la vida antica. De la Domus, l'ostal dels porticas, a la tèrmas o la catedrala paleo crestiana remiram los detalhs : paviments amb de mosaïcas, decoracion de las parets, potz, canalizacions, sarcofages. Tot es ben mes en valor, manca pas que vòstra visita !
Un reportatge de Lisa Gròs.
[resumit de Tè Vé Òc]
Emission del 25 de mai de 2022
En cançon ambé Liza e leis escolans d'Aurenja
Liza travalha per l'emission Vaquí sus França 3, mai es tanben cantairitz, musiciana e animatritz. Aquest an, a fach un molon d'animacions a de reng per d'establiments escolaris, a l'entorn de mai d'un projècts coma Leon lo Gripeton e Patonet. Nautre proficheriam de la setmana dei lengas au collège Barbara Hendricks, an' Aurenja, per curbir la restitucion d'una polida cançon que se sòna « Lei sochís ». Es una co-creacion musicala entre Liza e leis escolans, que se faguèt sus l'annada. Dins aquesta emission, vos presentam l'animacion sinergica porgida ai collegians dau cors de provençau, e mai la captacion complèta de la compausicion « Lei sochís » !
Un reportatge d'Amada Cròs.
[resumit de Tè Vé Òc]
Emission del 18 de mai de 2022
Lo vallon d'Escaunes e Cantarelles
Lo dissabte 7 de mai a Sernhac, l'associacion Vallon d'Escaunas e Cantarèla festejava l'inauguracion d'un amainatjament de tunèus de Sernhac, situats sus lo percors dau pòrta-aiga roman d'Usès a Nimes, e la renovacion de doas capitèlas sus lo meme site. Son pairenadas per lo Consèu Generau de Gard e lo Consèu municipau deis enfants de Sernhac. Sus tot lo percors dau pòrta-aiga d'Usès a Nimes lòng de 500 quilomètres, i aguèt solament 500 mètres de tunèu cavat dins la ròca a Sernhac. I aviá tanben a Nimes, au Mont Duplan, sus 300 mètres un tunèu vuei desparegut.
Un reportatge de Miquèu Gravier.
[resumit de Tè Vé Òc]
Emission del 11 de mai de 2022
Au fieu de l'escortin a Nions
A Nions, en Droma miegjornala, i a una fabrica d'escortins que fonciona despuèi sa creacion en 1882. D'abòrd istòria familiala e locala, l'entrepresa se duerbe au monde e se desvelòpa amb una còla mai granda e de vendas mai importantas. La « Scourtinerie de Nyons » nos durbiguèt sei pòrtas, per una entrevista de Sophie Villeneuve sus lo percors familiau e l'evolucion de la fabrica en 130 ans, e per una visitada comentada en provençau menada per Jaumeta Hubert. Au mai pròche d'un patrimòni unique, seguirètz lo fieu de l'escortin, entre creacion e adaptacion ais usatges.
Un reportatge d'Amada Cròs.
[resumit de Tè Vé Òc]
Emission del 4 de mai de 2022
Lo Jornalet a 10 ans
Detz ans ja que la còla de Ferriol Massip Bonet decidèt de crear un jornal sul web en occitan. Per festejar aquel anniversari venguèt dins Aude a la prima de 2022 per lo presentar primièr als enfants de la Calandreta Pech Mary a Carcassona , de matin, puèi a l'associacion "Fasètz la lenga en Cabardés" d'après dinnar. Enfants e adultes interessats pausèron de questions a Ferriol e Gerald Joan per mièlhs conéisser çò qu'es e coma viu lo Jornalet. A l'ora d'ara que la lenga a ben besonh de promocion, es un bon mejan de la faire avançar : s'abonar al Jornalet : jornalet.com, e es a gràtis.
Un portrait de Lisa Gròs.
[resumit de Tè Vé Òc]
Emission del 27 d'abril de 2022
Dolmen de Pépieux
Una visita rica del Dolmen de las fadas a Pépieux 11, amb los comentaris de Jean Guilaine, l'arqueològ famós. Pendent las furgas d'Abriu de 2022 descubrissem tot l'ample del mai grand dolmen del miègjorn de França. Vos convidam a la passejada per vos presentar aquel monument rare.
Un reportatge de Lisa Gròs.
[resumit de Tè Vé Òc]