Explorar los documents (709 total)
Emission del 20 d'abril de 2022
Tè Vé Òc a 10 ans - Dètz ans a promòure la lenga
Despuèi 2012 l'associacion Tè Vé Òc fai la promocion e la defensa de la lenga e la cultura occitanas. Dètz annadas a 4 emissions lo mes, aquò fai un nombre grand d'emissions de retrobar en podcasts sus lo site www.teveoc.com e sus Youtube tanben ! Lo 28 de mai de 2022, au Festenau Rescontre de Marguerittes 30320, aquesta vidèo sarà projectada ambé d'autrei corts-metratges a la Mediatèca Simone Veil tre 2 oras de tantòst. Ié siatz convidats, es a gràtis ! Retrobaretz dins nòstra emission leis accions qu'an marcat nòstra associacion : d'acampadas, d'estages de formacion, de Festenaus Rescontre, tota una vida regionala.
Un documentari de Lisa Gròs.
[resumit de Tè Vé Òc]
Emission del 13 d'abril de 2022
Enfants dau teatre d'Òc
Aquesta emission es totalament consacrada au teatre jogat per lei joines en lenga nòstra ! De'n promier, anam a Vesenòbres, pròche Alès, onte d'enfants faguèron un estage de teatre per lei vacanças de febrier. Inventèron sei scenetas segon lo tèma de l'escòla. La presentacion finala se faguèt pendent la setmana occitana en març de 2022, dins una sala clafida. Proficharetz de quauquei tròç onte son implicats nòsteis entrevistats. Puèi, anam au Bois, en Droma, per la representacion de tres pèças cortas jogadas per d'escolans dau collège de Mazan. La tantossada teatrala, que mesclava lei generacions a de reng sus scena, recampèt 150 espectators. Veiretz de tròç de « L'as paga lou capèu ? », una comèdi de Carles Galtier, interpretada ambé l'estrambòrd de la joventut.
Un reportatge d'Amada Cròs.
[resumit de Tè Vé Òc]
Emission del 30 de març de 2022
Circul'anim : concèrts Canti Canta e Los de l'Autan
A Villemoustaussou (11), l'associacion Circul'anim organiza sièis espectacles per an amb l'ajuda de la comuna. De pèças de teatre o de concèrts recampan un public nombrós dempuèi detz annadas, un public fidelizat que preceja la qualitat dels espectacles. Anam descubrir aquí un après dinnar a la sala G Brassens qu'aculhís en primièra partida lo grop Canti canta, de Carcassona amb de cants tradicionals amb la cap de còr Pascale Moreno e lo musicaire Adrien Villeneuve. En segonda partida es un grop d'òmes qu'interven amb de cants Pirenencs acompanhats a la guitara. Un bon moment per los afogats de cants tradicionals !
Un reportatge de Lisa Gròs
[resumit de Tè Vé Òc]
Emission del 23 de març de 2022
La Mitona : CD de Jean Guilaine e Laurent Fournier
Jean Guilaine arqueològ de renom e autor reconegut, nos presenta aquí un autre aspècte de sei creacions : un CD , La Mitona, realizat amb son amic musician Laurent Fournier. A partir dau legendari locau e de sa conèissença dei Corbièiras, Jean Guilaine creèt de paraulas e de musicas tanben per cantar detz cançons que compausan un CD fòrça agradiu. Lo presentèt a l'Ostal Sirventès de Carcassonna per lei Febrejadas ritualas que pòrtan a la coneissença dau public de creacions literarias o artisticas en occitan. Avem, dins aquesta emission, d'extrachs causits onte Joan Guilaine parla de cada cant e de son origina.
Un reportatge de Lisa Gròs
[resumit de Tè Vé Òc]
Emission del 16 de març de 2022
L'occitan au licèu Clémenceau de Montpelhièr
En febrièr passat, lo Licèu Clémenceau a Montpelhièr organizava sa jornada « pòrtas dubèrtas ». En aquesta ocasion, la professora d'occitan Magalí Fraisse inaugurèt lei panèus en òc per nomenar las espécias vegetalas dins lo licèu. Environada d'escolans sieus, de la còla dau licèu e d'autrei convidats, presentèt lo projèct pedagogic interdisciplinari a l'entorn dei plantas, dei lengas e de l'òbra de Max Roquette. Una visita comentada dau plantum dau pargue qu'es au centre de l'establiment fuguèt tanben prepausada au monde. Descubrètz tanben d'entrevistas de Magalí Fraisse e de dos de seis escolans.
Un reportatge d'Amada Cròs.
[resumit de Tè Vé Òc]
Emission del 9 de març de 2022
Santa Eulàlia de Barcelona
Lo 12 de febrier, èra la fèsta de Santa Eulàlia, una joina martira de 13 ans, a la debuta dau sègle 4enc a Barcelona. Son istòria fuguèt descricha per Gregòri de Nazianze, a la fin d'aqueu meme sègle, dins un tèxte en grèc, puèi represa per de benedictins de Sant Amand (59). Es aquí que fuguèt compausada la famosa Cantilena a Eulàlia. Es onorada dins sa vila, segur, mai sa remembrança es anada mai luenh e subretot en Occitània granda, benlèu pron per lei Comtes de Barcelona.
Un documentari de Miquèu Gravier.
[resumit de Tè Vé Òc]
Emission del 2 de març de 2022
Musèu de la capelariá a Esperasan
Amb Jean Fourié, un especialista de la cultura e l'economia de la Nauta Val d'Aude, anam visitar lo Musèu de la Capelariá a Esperasan (11) La fabricacion dels capèls en fèutre de lana fuguèt fòrça importanta pendent un sègle e donèt de trabalh a fòrça monde. Veirem dins aquel reportatge un nombre grand de maquinas que permetián de preparar la lana de motons per donar fòrma a tota mena de capèls presents encara dins lo musèu. Una botiga es dubèrta dins lo musèu e gardada per tres personas : un guide a temps complet e doas personas de l'associacion "Los amics del musèu". La capelariá tenguèt una plaça granda dins l' istòria de l'economia regionala au sègle passat.
Un reportatge de Lisa Gròs
[resumit de Tè Vé Òc]
Emission del 23 de febrièr de 2022
Las cassòlas Not
Au Mas Sainte Puelles (11), a riba del Canal del Miègjorn, descubrissem la potariá Not, ben coneguda per sa fabricacion de cassòlas onte se prepara lo famós cassolet dins la region tota. Tres generacions de la familha Not mantenguèron la tradicion de la fabricacion d'aquelas caçòlas e es la tresena generacion que rescontram uèi. I a aquí una vertadièra caforna d'Ali Baba onte trobam las cassòlas de segur mas tanben d'autres creacions : plats, objèctes de decoracion, coma la crotz occitana e los famós diables, de plats especiaus per faire coire la volalha.
Un reportatge de Lisa Gròs
[resumit de Tè Vé Òc]
Emission del 16 de febrièr de 2022
Docha de lenga a l'entorn de l'olivièr
Lo « banh de lenga », tanben adaptat en « docha », es una animacion organizada e prepausada per Veronica Fiol, Estève Amel e Florença Faure-Brac a Sant-Ipolit-dau-Fòrt. En 2018 nasquèt aquela activitat d'immersion linguistica presada dau public, e nautre fagueriam un reportatge sus lo banh de lenga de febrier de 2019. Dins aquesta emission, avèm seguit « una docha de lenga » pendent una mieja jornada ambé Veronica, Estève e leis estagiaires dins lei locaus de l'École des Arts Vivants. Puèi, avèm cubert la visita bilinga dins lo molin de la familha Barthélémy, a Montolieu.
Un reportatge d'Amada Cròs.
[resumit de Tè Vé Òc]
Emission del 9 de febrièr de 2022
Trad Ivernalas de 2022
Maugrat totei lei contrenchas administrativas impausadas per lo governament e la pandemia de Covid, lei Trad Ivernalas an poscut se faire aquest’an. Malaürosament aqueste festenau incontornable de la musica e de la dança folk es estat ben amputat, pas cap de balèti, pas de concèrt, pas mai d’estagi de musica o de dança. Aven seguit lo dissabte de vèspre lei concèrts barutlaires dins tres luòcs musicaus de Somèire ambe lo Duo Será a la capèla dau castèu, Juliette Minvielle dins un novèu grop sonat Fabrik e fin finala au Jazz Corner per escotar VOTZ amb Manu Theron e Damien Toumi. La passejada èra menada per Danís Galvier de Coriandre.
Un reportatge de Miquèu Gravier.
[resumit de Tè Vé Òc]