Explorar los documents (709 total)
Emission del 2 de febrièr de 2022
Lei mòbles modèstes en exposicion au CIRDÒC
Per aquela debuta d'annada, lo Centre Internacionau de Recèrca e de Documentacion Occitanas a Besièrs aculhiguèt pendent 20 jorns leis òbras d'Alan Fornells, vertadièr (re)creator e contaire. Sei mòbles modèstes, coma lei sòna, son la resulta d'una concepcion intellectuala fòrça poetica e d'un artesanat experimentau sus d'objècts recuperats. Nautrei a Tè Vé Òc, fagueriam ja una emission sus son travalh en mai de 2019, puèi lo CIRDÒC nos comandèt un documentari sus lo meme subjèct per aprefondir aquela ressòrga. Lo 12/01/2022 la còla venguèt au vernissatge de l'expausicion d'Alan Fornells, onte nòstre documentari fuguèt projectat tanben e onte lo monde respondeguèt present. Proficheriam d'aquela serada per vos restituir aquel eveniment dins « Lenga d'Òc / Lengo d'O » !
Un reportatge d'Amada Cròs.
Retrobatz aicí lo documentari de Tè Vé Òc per lo CIRDÒC, difusat sus lo site Occitanica
[resumit de Tè Vé Òc]
Emission del 25 de genièr de 2022
La grèpia animada de Parinhargas
Dins leis annadas 30, lo curat d'aqueu vilatge començèt la costruccion d'una grèpia animada dins una capèla de la glèisa. De subjècts fachs en bòsc e de mecanismes ben travalhats ambé de materiaus petaçats l'empachèran pas de ben vielhir. 80 ans après, marcha totjorn tant ben. Siam anats veire un pauc mai pròche aquela curiositat artesanala. Simple, mai pivelaira, atriva regulierament dins la passa calendala ; amb un grand public de totei lei generacions. Es una associacion de benevòus qu'assegura l'entreten e lo bòn foncionament d'aquela grèpia istorica.
Un reportatge de Marc Carteyrade.
[resumit de Tè Vé Òc]
Emission del 19 de genièr de 2022
Lo Mont Ventor d'ivèrn
« Lo Mont Ventor », « Ventor », « Lo Gigant de Provença », … aquela montanha famosa de pertot dins lo monde es emblematica dau País. Nautrei nos i siam interessats de mai pròche au Mont Ventor quora pòrta son mantèu de nèu. Per aquò, avèm entrevistat dos estatjants dau canton, dos gents de Ventor. Per la partida consacrada a l'ubac, renscontratz Vierginia Bigonnet-Balet, descendenta de Raoul Chanvert que bastiguèt lo promier chalet au Mont Seren. E per la partida consacrada au miegjorn, rescontratz Luc Reynard, ancian elegit de Bedoin acostumat dau Chalet Reynard. Laissatz-vos cabussar dins la nèu e descubrètz lei praticas dau monde dins lei relèus de Ventor.
Un reportatge d'Amada Cròs.
[resumit de Tè Vé Òc]
Emission del 12 de genièr de 2022
N'i a pro : Laurent Cavalié e Marie Coumes al Salon dels vins bio a Sant Ilari
"N'i a pro" es un espectacle montat per Laurent Cavalié e Marie Coumes sus las luchas vinhaironas dins las annadas 60/70. I trobam de tèxts de Marti, Michel Décor, Alranc e Rouquette.
Lo salon dels vins biò organizat dins l’abadiá de Sant Ilari (11) aculhiguèt per aquel espectacle un public nombrós. Degustacions, presentacion de vins bio aguèron un succès grand.
Rescontrèrem d' òmes e de femnas afogats de son pais e de sos vins, en particular la blanqueta. Descubrissem dins una entrevista coma aquela blanqueta nasquèt, a Sant Ilari tot bèl just.
Un reportatge de Lisa Gròs
[resumit de Tè Vé Òc]
Emission del 05 de genièr de 2022
Bufalonas en Corbièras
De bufalonas en Corbièras, aquò vos estona ? De segur que n’i a mai en Italia ! Venetz descubrir l'integracion capitada d'una familha italiana a Pradelles, dins la Val de Danha/ Corbièras, pròche Carcassona. La proprietat granda de « La Bourdasso » compren un restaurant reputat tengut per la familha Antonini. Alexandra Antonini, que s’ocupa de la bòria amb son òme, nos parla d'una installacion pauc comuna e nos explica coma faire una mozarella deliciosa. Las bèstias installadas sus un espaci grand de garriga son noiridas d’èrba seca. La reproduccion es naturala e los vedèus naisson tota l’annada. Es Alexandra que fabrica la mozzarela que vai vendre puèi suls mercats e comèrcis de la region. Fabrica tanben de glaças, de mozzarela seca e de salcissa seca de bufalonas.
Una capitada de las bèlas de veire dins lo reportatge de Lisa Gròs.
[resumit de Tè Vé Òc]
Emission del primièr de decembre de 2021
L'auborada dei Ficheirons
Lo 14 de novembre de 2021 a Nimes fuguèt comemorada l’auborada dei ficheirons. Fa cent ans, a l’iniciativa dei manadièrs e felibres Folco de Baroncelli-Javon e Bernat de Montaut-Manse una manifestacion sostenguda per la Nacioun Gardiano e l’Antica Confrariá dei Gardians aviá regropat dins lei carrièras de Nimes de centenats de gardians que protestavan contra una assignacion en justícia per la Société protectrice des animaux, que deviá èstre jujada a Nimes en decembre. Aquela assignacion portava sus l’organizacion de doas corridas organizadas a Nimes e una en Arles.
Lei manifestants de 1921 protestavan contra l’atenta a l’identitat e ai costumas provençalas mesas en causa per una aplicacion estricta e tendenciosa de la lei Grammont de 1850 sus lei crudelitats contra leis animaus. Cent ans après, l’istòria quequeja, tornamai lei praticas tauromaquicas son atacadas, l’usatge dei chivaus dins lo trabalh de bovina, mas tanben lo ròtle e lei praticas dau monde paisan per la cultura e la proteccion de sei produccions. La manifestacion de 2021 visava doncas a protestar contra leis agressions contra lo monde rurau, lei praticas tauromaquicas e l’identitat provençala.
Un reportatge de Miquèu Gravier.
[resumit de Tè Vé Òc]
Emission del 17 de novembre de 2021
Joan-Maria Roussel, estatjant de Bourdic
Aquesta setmana Tè Vé Òc anèt au rescontre de Joan-Maria Roussel un estatjant dau vilatge de Bourdic (ducat d'Uzès) . Joan-Maria nos faguèt visitar lo vilatge e parlèt d'una de seis activitats: una pagina Facebook onte enregistra cada setmana una vidèo en lenga nòstra. Seguiguèt lei cors d'occitan de l'IEO 30 a Sant Geniès de Malgoirès per lo plasèr de parlar son "patoès" de Bourdic, vilatge qu'aima tant. Comencèt pendent lo confinhament per de cronicas sus lo vilatge e seis edificis de remarcar, puèi fuguèt sus lei praticas de cada jorn, lo trabalh de la tèrra e lei tradicions. Ara contunha en causissent cada còp lo decòr que conven a sa cronica. De retrobar sus sa pagina Facebook.
Un retrach per Miquèu Gravier.
[resumit de Tè Vé Òc]
Emission del 23 d'octobre de 2021
L'abadiá de Lagrassa
L'abadiá de Lagrassa es un joièu dei Corbièiras. A riba d'Orbieu s'apara un pauc dei vents. Es monumentala e luminosa. Una carta fuguèt signada per sa creacion en 779 per Carlesmanhe. A l'ora d'ara, 40 religiós (20 prèires) vivon dins l'abadiá. Trabalhan au jardin e a l'òrt o dins l'abadiá. Leis oficis ritman la jornada. Lo clastre, la glèisa, lei salas diversas, lo jardin son de descubrir. Lei monges cultivan la vinha e l'olivièr, doncas vendon sei produchs, de libres e d'objèctes religiós dins la botiga a l'entrada de la cor d'onor. Es Joan Blanc, un istorian ben conegut a Carcassona que nos guidèt per aquela visita. Lo mercejam de son ajuda preciosa.
Un reportatge de Lisa Gròs.
[resumit de Tè Vé Òc]
Emission del 3 de novembre de 2021
Lo Salon dei culturas provençalas a Cadarossa
Dins lo vilatge de Cadarossa, en Vauclusa, la municipalitat organizèt en octòbre lo 1er Salon dei culturas provençalas. Iniciat per l'adjoncha a la cultura Beatritz Rehor e pairinejat per l'animator TV Frederic Soulié, lo projèct veguèt lo jorn sus una dimenchada completa, ambé de taulas d'expausants, d'animacions divèrsas dins la tantossada e de concèrts en debuta de serada. Literatura, tradicions, creacions, ensenhament, teatre, dança e musica an trobat sa plaça dins aquela manifestacion novèla. Vos prepausam adonc dins nòstra emission un apercebut d'aquel eveniment, embé de tròç nombrós d'animacions e quauqueis entrevistas.
Un reportatge d'Amada Cròs.
Musicas e cants enregistrats lei 16/10 e 17/10/21 dins la Sala Pierre Cuer a Cadarossa (84)
- Jan-Bernat Plantevin
- I anen
- La Calandreta d'Aurenja
- Les Enfants de l'Ouvèze
- L'Escolo dóu trelus
- La Cabro d'Or
- Le Moulin de Brétoule
- Le Condor
[resumit de Tè Vé Òc]
Emission del 27 d'octobre de 2021
L'ostau dei mestièrs ancians
Dins lei Cevenas a la Grand Comba, André Albérola, un ancian cubreire- zingaire collecciona dempuèi de lustres una molonada d’otís e d’objèctes utilizats dins lo temps dins divèrs mestièrs o dins la vida vidanta. Aquela colleccion exempcionala, la volguèt presentar au grand public per lo biais de la creacion d’un musèu : « L’ostau dei mestièrs ancians », un trabalh de titan. Dins 13 barraccas nos va faire viatjar, amb calor e passion, au còr dei mestièrs ancians sovent doblidats, mas tanben nos faire tornar viure quauquei scènas de la vida familhala de cada jorn de l’epòca. Un vertadièr romavatge que desrevelha de sovenirs bèus a un nombre grand de visitaires.
Un reportatge de Marc Carteyrade.
[resumit de Tè Vé Òc]