Per la prima, lo CIRDÒC - Institut occitan de cultura contribuís a dos eveniments bèls per la lenga e la cultura occitanas : Escale à Sète en Lengadòc e La passem en Gasconha. Dins lo quadre del mai important festenal maritim del continent, l'establiment prepausa una residéncia artistica de l’artista Joan Carles Codèrc “In situ in Seta” en partenariat amb l’IFREMER, lo Centre Régional d'Art Contemporain Occitanie/ Pyrénées-Méditerranée, la comuna de Seta, lo Licèu de la Mar e l’Ecole des Beaux arts. La produccion, una carta maritima experimentala, serà presentada a l’escasença de talhièrs participatius dins lo contenedor “IFREMER avec Escale”, al còr del festenal. En mai d’aquò, la senhaletica de l’eveniment serà bilingüa francés / occitan, una primièra ! Una preséncia de la lenga qu’afortirà l’animacion en platèu central de l’artista Isabelle François. Per la Passem e son percors entre las doas regions Occitania e Novèla Aquitania, lo CIRDÒC - institut occitan de cultura acompanharà la corsa amb una caravana especiala, en partenariat amb l’OPLO e lo Congrès. Dins aquel relai popular per la lenga, l’establiment farà descobrir otisses e supòrts per dintrar aisidament dins l’actualitat culturala. Alors metètz los vòstres basquets e venètz còrrer amb nosautres !