S’inspirant de figuras tutelaras o posant dins un patrimòni viu e vivaç, la creacion occitana arrèsta pas de se tornar inventar d’una generacion l’autra. Aital, las joves plumas son pas en rèsta, n’atèsta la preséncia dins aquelas paginas dels recuèlhs de Paulina Kamakine o de Cecila Chapduelh tant coma de novèlas proposicions en direcion dels mai pichons. S’avètz pas agut l’escasença de los descobrir pel festenal Nòu, rendètz‑vos a la pagina 9 d’aquel numèro per d’unes espectacles que mancaràn pas d’agradar als mai joves coma a lors parents. E per clavar aquel numèro novèl, un cicle tematic dedicat al Conte. Tres paginas per desrotlar de fials e dobrir de pòrtas a l’entorn d’un genre tan fecond e important pel domeni occitan.