Explorar los documents (955 total)

La preservacion e la promocion de la diversitat linguistica e culturala son censadas èstre al còr del projècte europèu. Pasmens, fàcia a las bravas intencions qu’invòcan los grands tèmas de la salvagarda d’una fòrma de « biodiversitat culturala » o la defensa d’un drech de cada pòble europèu a « sa lenga », la diversitat linguistica es jamai estada tant menaçada dins lo monde e en Euròpa. Parallèlament, tòrna regularament dins los debats publics la question de l’utilitat reala de la preservacion d’una diversitat linguistica quora sancionada de « non rentabilitat » economica, quora acusada de semenar la division e l’intolerància. Pr’aquò, Euròpa representa mai de 200 lengas dont una seissantena de lengas regionalas o « minoritàrias » mas tanben mantunas autras lengas vengudas d’autres parçans del monde al fial d’una istòria millenària. Quinas son las lengas d’Euròpa ? Cossí se pòrtan a l’ora de la mondializacion ?

Per abordar aquelas questions, lo CIRDÒC - Institut occitan de cultura recebèt en 2018 un expèrt, Jaume Corbera, professor de linguistica al dintre del departament de filologia catalana a l’Universitat de las Illas Balearas, autor del libre La Unió Europea, un mosaic lingüístic. Amb el, Joan-Claudi Forêt, ancian ensenhaire de lenga e literatura occitanas de l’Universitat Paul Valéry de Montpelhièr, responsable dels escambis Erasmus del departament d’occitan e autor de mantun romans e recuèlhs de poesias.

Emission especiala dau 23 de març de 2018

Jòrgi Gròs, lo Nimesenc que menèt fòrça a l'occitanisme, nos a quitats en febrièr passat. Aquela emission es un omenatge au pedagòg, escrivan, contaire e militant occitan. Un òme que laissa de traças multiplas a un molon d'amics esmoguts e reconeissents. Veirètz d'arquius que mòstran son implicacion e son impact dins lo militantisme occitan. Es per aquò que de son vivent una Calandreta dubriguèt e prenguèt son nom a Nimes. Jòrgi Gròs toquèt mai d'una generacion, dins l'ensenhament tant coma a la retirada.
Un retrach per Lisa Gròs.

Emission dau 16 de març de 2018

Discret, fòrça umil e generós, Marcèu Piazza resta a Sant Genièis de Malgoirès, dins Gard. Aquel òme autodidacte ausiguèt la lenga dins lo lengadocian de sa familha e apren despuèi d'annada lo provençau de son canton. Marcèu es un manuau, e de sei mans crea un molon d'òbras : dessenhs, pinturas, esculturas sus pèira, pirogravadura... Un artista dins l'ombra que metèm en lume aquí dins un retrach colorat, a l'imatge deis ilustracions que fai per acompanhar sei pichòtas istòrias. Cabussatz dins l'univèrs de Marcèu, amb sa femna Monica coma primièr sosten.
Un retrach per Lisa Gròs.

Emission dau 9 de març de 2018

Nòstra emission sus Josiana Ubaud vos prepausa un retrach de l'autora de Des arbres et des hommes e dau Diccionari ortografic de l'occitan, entre autrei. De formacion scientifica, militanta feminista, aquela Marselhesa d'origina ten una òbra diversificada e consequenta a son actiu. La part màger deis occitanistas coneisson pron l'implicacion e la rigor de Josiana Ubaud, una especialista dei plantas e de la lenga d'òc, nos partejant aquí son saber ric que publica tanben sus son blòg.
Un retrach per Amada Cròs.

Emission dau 23 de febrièr de 2018

Nativa de Gard, Rachel Cabane èra una militanta sindicalista de la seda cigalèsa a la debuta dau sègle XX. Fondèt lo Sindicat dei Fialairas Cigalèsas, e joguèt un ròtle grand dins sa defensa. Militanta coratjosa, fuguèt puèi onorada per lo ministre de l'Igièna e de la Prevencion sociala en 1920. Vos menarèm au Musèu de la Seda, a Sant Ipolit dau Fòrt, onte una escòla pòrta lo nom de Rachel Cabane despuèi fin de 2017.
Un reportatge de Marc Carteyrade.

Emission dau 16 de febrièr de 2018

La 8^cha edicion dau Festenau se debana aqueste còp dins la Mediatèca de Marguerittes, pròche Sant Gervasi ont la manifestacion nasquèt. Lo festenau presenta una seria de filmòts realizats per d'amators e de còps que i a de professionaus. I trobam una majoritat d'òbras en occitan e/ò sus la cultura d'aquí. Dubert en totei e a gràtis, l'eveniment s'espandís sus una tantossada cada an en febrièr.
Un reportatge d'Amada Cròs.

Aquel filme realizat en 2017 pel CIRDÒC per Mathias Leclerc torna en imatges sus l'aventura de la Passejada literària d'Agde, un temps fòrt de la literatura de joinesa en occitan amb a son còr lo rencontre entre los autors e lor public.

Dempuèi 2016, la Calandreta d'Agde (34) organiza un prèmi literari que convida los joves lectors a votar per l'obratge qu'aiman mièlhs entre una seleccion d'òbras en occitan. Aital, es una jurada de mai de 1 000 joves lectors que balhan aquel "Prèmi literari Calandreta". La proclamacion de las resultas es l'escasença per una granda jornada de fèsta, de rencontre amb los autors e d'escambis a l'entorn del plaser de legir : la Passejada literària.