Explorar los documents (5752 total)

« La chabreta qu’ei un instrument remarcable, qui an tornat descobrir a l’aviada de las annadas 1980, entermiei d’autas carlamusas deu Centre de la França e deu Massís Centrau. Per delà las recèrcas sus la soa istòria e sus la soa luteria, la chabreta que s’ei tanben tornada construsir miejançant un repertòri qui lo son principau renovator, Eric Montbel, s’ei esmerat a adaptar ad aquera carlamusa, dinc alavetz tan misteriosa com silenciosa…
Haut o baish quaranta ans mei tard, en aquesta navèra edicion revista e completada, que’ns liura mei de duas cents melodias collectadas au près deus darrèrs chabretaires de tradicion, mes tanben adaptadas deus repertòris de cantas, de vriulon o d’acordeon deu Massís Centrau ; shens desbrombar las composicions qui an permetut la renavida d’aqueth instrument magnific.
L’autor e los productors que desiran atau que s’alargue doman l’aròu deus musicaires d’aquera chabreta sauvada deu silenci... »

En complement d’aqueth obratge, los enregistraments d’aqueras duas cents melodias e deus collectatges inedits que seràn pòc a pòc hicats en linha sus www.crmtl.fr

Tà'n saber mei

Lectura-espectacle a l’entorn de Fèliç Arnaudin, poèta e fotografe lanés, dens lo bòsc deu Pinhadar, peu Théâtre des Chimères.

Creacion deu Théâtre des Chimères, la lectura-espectacle a l’entorn de Fèliç Arnaudin que s’atraça cada an un succès màger. Aqueste estiu, ua navèra escadença d’apreciar l’engenie d’aqueth personatge singular qu’ei auherida au public.

En caminant peu bòsc deu Pinhadar, e a travèrs ua seleccion de tèxtes literaris en resonància dab los pins, lo Théâtre des Chimères qu’evòca la quèsta de Fèliç Arnaudin, poèta e fotografe lanés qui obrè a conservar la memòria d’un paisatge en desparescuda : lo de las Lanas de Gasconha, país de lanas e de paluds, on s’i plantè pins maritimes au miei deu sègle 19au.

Tèxtes tirats de las òbras de Fèliç Arnaudin, Roland Barthes, Jean-Marie Broucaret, Miguel de Cervantes, William Shakespeare, Anton Tchekhov...

Informacions practicas

Los 22 e 23 de julhet 2021 / Los 26 e 27 d'aost 2021
Bòsc deu Pinhadar, a 11h e 15h.
Aviada deu trajècte : parc d’estacionament de la Via Verda de Montbrun (avienguda de Montbrun) situada a proximitat de l’Ostau Forestièr e de l’airau taus mainats. Bus linha 32, estanc Bellevue.

Tà'n saber mei

Joenòt, Jaques Boèr non coneish pas de la vila d’Agen sonque los baishs quartièrs e los bòrds de Garona (sic). Obligat de’s préner un mestièr entà víver, que mestrejarà hèra vista « los secrets argentós deu raser e deu pienti » après aver hèit lo son aprendissatge au mei bon perruquèr de la vila, dont la botigueta ei al récouen de la prefecturo, ancien palay de l’abescat, on lo monde com cau se fan retapa lou cat. Tau noste aprenedís, la « vita de sauneis » que s’escor en un solèr capvath un paradís poblat de hantaumas, e au poèta per instint, la lectura qu’obreish orizonts d’un monde aluenhat deus tribulòcis de la soa vita de tot dia. Que s’installa lèu au son compte perruquèr tà las daunas e los gojats, près de Garona, aus quartièrs qui coneish tan plan, dab la soa hemna Magnounet qui susvelha. Hèra viste, Jaques Boèr que desparescó darrèr Moussu Jasmin — Gensemin | Jansemin — e, se los aristocratas manifestèn lo lor tristèr, tau pòble de petitas gents, la destressa qu’estó unanima a la mòrt deu « lor » Jansemin.

Jansemin que sabó ondrar la lenga occitana (parlar lengadocian d’Agen) e los sons talents de contaire, hicats au servici deus praubes e deus deseretats, que’u valón ua renomada shens parièra tant dens los aròus capulats de la capitala com dens tot lo País d’òc.

Jacques Clouché, janseminològue confirmat, que hè tornar víver un personatge, esbrofaire solide mes d’ua generositat shens limits, dab l’ajuda de mei d’un document iconografic e de testimònis autan divèrs.

PRESENTACION