Explorar los documents (10 total)

Lo Bal en l'èr #3 a Nimes / Tè Vé Òc
Emission del 28 de març del 2019

Le Fil Production organiza un molon de concèrts e atalhièrs a l'entorn dei musicas dichas « trad ». Tè Vé Òc aguèt ja l'opportunitat de curbir quauquei seradas. Aqueste còp, vos prepausam un novèu reportatge rodat a la Scena de Musicas Actualas Paloma, a Nimes, per la tresenca edicion dau « Bal en l'èr », ambé tres concèrts. Veirètz d'entrevistas dei grops San Salvador, còr polifonic originari de Corresa, e La Base Duo, venguts de Gasconha. Nos parlaràn de son punt de vista sus l'evolucion de la musica trad e son adaptacion ais espacis divèrs, coma aquela de la SMAC Paloma. Lo tot, ambé de tròç dei concèrts !
Un reportatge de Patric e Miquèla Lapierre.


Lenga d'òc : Lei 20 ans dei Trad'Hivernales de Somèire / Tè Vé Òc
Emission dau 7 de febrièr de 2019

Aqueleis annadas passadas, Tè Vé Òc vos prepausava cada an un reportatge rodat ai Trad'Hivernalas, una institucion culturala qu'anima lo mes de genièr a Somèire e que siam partenaris. Ges d'excepcion, qu'aquest an avèm un còp de mai cubert lo festenau que sa còla dei Trad'Hivernalas festejèt sa vintena edicion ! Un rescòntre anniversari que recampava un molon d'artistas e d'animacions. Dins nòstra emission, veirètz lei temps fòrts dei Trad'Hivernalas, amb entre autrei Claudi Martí, lo platèu ràdio, lei concèrts nomadas embé Laurenç Cavalié, e subretot la serada d'anniversari qu'èra "Lo Bal dei 20 ans". Amb un molon de musicians convidats sus scena au costat de Coriandre e Garric.
Un reportatge de Miquèu Gravier

Lenga d'òc : Retorn sus l'Estivada 2018 / Tè Vé Òc
Emission dau 3 de genièr de 2019
 
E mai se 2018 es acabada, vos prepausam un retorn a l'estiu passat, per mielhs nos rescaufar en aquela periòda ivernala. A Rodés, se festejèt la 24ena edicion de l'Estivada, una manifestacion ben coneguda coma festenau inter-regionau dei culturas occitanas. Concèrts, teatre, poesia, conferéncias-lecturas, aperitius literaris, cinèma e balètis an ritmat l'Estivada que s'espandiguèt sus tres jorns. Dins aquesta emission, veirètz de tròç dau festenau, entre autrei amb Francis Cabrel que s'assajèt a l'occitan a l'escasença d'un concèrt. Es Joan Bonnefon que revirèt de tèxtes de Francis Cabrel en occitan, per una serada de creacion que comprenguèt tanben d'escolans de Calandreta, de classas bilingas e dau Conservatòri. Un reportatge de Miquèu Gravier.
Lenga d'òc : Momus au CIRDÒC / Tè Vé Òc
Emission dau 6de decembre de 2018
Vos menam a la tantossada festiva organizada au CIRDÒC lo 12 d'octòbre, dins l'encastre dau festenau «Promenade entre Languedoc et Provence au XVe siècle ». Descubrètz la mòstra"Lo Rei Renat, prince deis arts en Provença" presentada per Benjamin Assié, lo director dau CIRDÒC. Aquesta es seguida per una conferéncia musicala d'Enric Maquet e Benjamin Mélia, sota la fòrma dau projècte « Momus ». Vos convida d'escotar de musicas eissudas dau repertòri tradicionau provençau, coma la Tarasca, la Fèsta Dieu de z'Ais, e lei cançons dau Carrateiron. Una cabussada culturala vertadièra dins lei sègles 15 e 16 au còr de Provença, ambé leis instruments que ié son restacats : lo galobet-tamborin, lo fifre, la vièla d'arquet...
Un reportatge de Lisa Gròs.
Lenga d'òc : Lo Med'òc festeja sei 20 ans / Tè Vé Òc
Emission dau 29 de novembre de 2018

Fai 20 ans que lo Med'òc, associacion d'estudiants especializats dins l'occitan, veguèt lo jorn, dins l'Universitat Pau Valèri a Montpellier. De son nom complet « Med'òc dau Clapàs », l'associacion es a l'origina d'un molonàs d'eveniments per d'estudiants e non estudiants, per promòure la cultura e e la lenga nòstras. « Intellècte e Bolegadís » son lei mòts mèstres dau Med'òc. Vos presentam leis accions e lei caras d'aqueste moviment que festeja son anniversari lo 25 d'octòbre. Au programa de la serada : taula redonda, mangiscla e musica. Totei lei mejans necites a la reflexion e la socializacion de la lenga, aquesta estent portada de l'universitat a l'exterior. 
Un reportatge de Lisa Gròs.

Lenga d'òc : EBTè ! Creacion de Joan-Francés Tisnèr / Tè Vé Òc [emission audiovisuala]
Emission dau 27 de setembre de 2018

Joan-Francés Tisnèr es un multi-instrumentista pron implantat dins lo mitan musicau occitan (e mai). A l'escasença d'un sejorn
a' Gen, avèm rescontrat Joan-Francés Tisnèr e Francés Dumeaux. Nos parlan de sa darrièra creacion, EBTè ! , un espectacle conceptuau que jòga sus lei sòns, lei mòts, lei bruchs, ambé d'univèrs aluenchats que se son mesclats lo temps d'un balèti. Descubrètz lei sòrgas d'inspiracion e leis imatges deis experimentacions d'un projècte originau, innovant, estonant e estrambordant.
Un reportatge d'Amada Cròs.
Lenga d'òc : Total Festum 2018 a Sant Privat dei Vièlhs / Tè Vé Òc [émission audiovisuelle]
Emission dau 5 de julhet de 2018

Per lei 20 ans de « Lenga e Cacalàs », de la « Calandreta de Gardons » e lei 10 ans de la Corala Occitana « Los quinçons » , una jornada de fèsta variada e conviviala. I son programats lo cantaire Patric e lei Lhubac per un concèrt, puèi un balèti amb Garric per lo fuòc de la Sant Joan. Es un moment de rescontre de generacions entre lei calandrons e lei coristas, dins un ambient musicau per contunhar una tradicion mai qu'anciana qu'es lo fuòc de Sant Joan, lo 23 de junh. Un reportatge de Lisa Gròs. 
IEO 15
IEO 15
Association Music’Al Sol