Explorar los documents (5 total)

Lenga d'òc : Retorn sus l'Estivada 2018 / Tè Vé Òc
Emission dau 3 de genièr de 2019
 
E mai se 2018 es acabada, vos prepausam un retorn a l'estiu passat, per mielhs nos rescaufar en aquela periòda ivernala. A Rodés, se festejèt la 24ena edicion de l'Estivada, una manifestacion ben coneguda coma festenau inter-regionau dei culturas occitanas. Concèrts, teatre, poesia, conferéncias-lecturas, aperitius literaris, cinèma e balètis an ritmat l'Estivada que s'espandiguèt sus tres jorns. Dins aquesta emission, veirètz de tròç dau festenau, entre autrei amb Francis Cabrel que s'assajèt a l'occitan a l'escasença d'un concèrt. Es Joan Bonnefon que revirèt de tèxtes de Francis Cabrel en occitan, per una serada de creacion que comprenguèt tanben d'escolans de Calandreta, de classas bilingas e dau Conservatòri. Un reportatge de Miquèu Gravier.
Lenga d'òc : Medelha (espectacle) / Tè Vé Òc
Emission dau 22 de novembre de 2018
La Compagnie « Rêves du 22 Mars » adaptèt « Medelha » en version bilinga, l'òbra teatrala maja de Max Roqueta. Anèrem a Montpelhièr a l'escasença d'una representacion dins lo pargue de la Maison pour tous Mélina Mercouri. Es dins la version sensa musica que vos prepausam de (re)descubrir aquela creacion presentada en mitan urban. Concebuda per èstre jogada a l'exterior, dins lo bruch ambient, aquela adaptacion de la pèça nos es detalhada dins una entrevista ambé Bruno Paternot, comedian e meteire en scena. Una immersion dins una òbra universala e intemporala.
Un reportatge d'Amada Cròs.
Lenga d'òc : Quanta bèla enterrada ! / Tè Vé Òc [emission audiovisuala]
Emission dau 4 d'octòbre de 2018

En Aumessas, dins lei Cevenas gardesas, de comedians amators presentèron una pèça adaptada dau cònte de Claudi Anselme e Joseta Duplan. E mai, aquestei joguèron au costat de Muriel Martinet e Clara Bertrand. ''Quelle belle enterrada !'' es un espectacle bilingue que d'un subjèct grèu ne'n sortísson de galejadas, de jòcs de mòts e de situacions a de còps dificilas ò amusantas. Vos convidam an' aquela bèla enterrada per faire la coneissença de Rachel e son òme, la pastressa e lo novèu garda-campèstre, dins una revista de Marc Carteyrade. 
Lenga d'òc : La reina empoisanada, cònte musicau / Tè Vé Òc [émission audiovisuelle]
Emission dau 21 de junh de 2018

Un autre projècte pedagogic, aqueste còp a Clarensac. Leis escolans de cors mejan e de seisena collaborèron amb lo grop Garric. Veirètz la restitucion dau projècte sota la fòrma d'un cònte musicau, a prepaus d'Azalaïs de Portiranhas, au fogau de Clarensac. L'espectacle fuguèt seguit d'un moment de danças ambé leis autrei classas de l'escòla, qu'assistissián a la pèça. Un reportatge de Lisa Gròs.
Lenga d'òc : La Sartan, Sason 1 per lei liceans d'Aurenja / Tè Vé Òc [émission audiovisuelle]
Emission dau 14 de junh de 2018

Cada an, au licèu de l'Arc en Aurenja, d'escolans de 1èra de l'opcion occitan participan a un projècte pedagogic. Bailejats per lei professors de lenga e dança Matieu Poitavin e Elena Berti, presentèron La Sartan, sason 1 en Mai passat. Aquela corta pèça es una adaptacion contemporanèa d'una òbra de l'autor locau Pau Marquion. Descubrètz lei tròç de la comèdia revisitada, entrecopats d'entrevistas dei professors e de liceans. Un reportatge d'Amada Cròs.