fabrica

Basa : Tota la creacion occitana
Licéncia Licence Ouverte
Claude Sicre

Claude Sicre

Domaine d'activité : Chanteur Musicien Écrivain Conférencier
Genre : Chanson Linguistique Rap/Reggae Trad/Populaire
Secteur : Musique Littérature
Aire culturelle : Languedoc
Occitan : Un peu
Support : Spectacle vivant
Date : 1977


Claudi Sicre alias doctor Cachou, nascut en 1947 a Tolosa en França, es un cantaire e trobador occitan, membre del grop occitan los Fabulous Trobadors.

A sèt ans, descobrís lo rocker american Bill Haley. Apuèi, es lo blues que le sedusís mai. Afogat pels romans policièrs que comencèt de legir fòrt d'ora, se retròba aprèp una licéncia de filosofia, emplegat çò l'editor parisenc Gallimard, fòrt precisament per la celèbra colleccion de la Série noire. Mas es cap a la musica qu'orientarà sa carrièra, musica que l'interèssa sonque coma la manifestacion d'una cultura anciana, coma una tradicion.

A París, descobrís lo movement occitan (reviscòl de la cultura del país d'Òc) e de retorn a Tolosa, crèa un grop en 1977, Riga-Riga amb lo qual publica un disc folk que s'inspira largament del patrimòni occitan. De la tradicion dels trobadors d'aquesta region, Claudi Sicre reten la tenson, mena de « pelejadas poeticas a dos, question-responsa » coma o precisa el meteis. En 1982, descobrís una autra fòrma d'expression musicala amb los emboladores, cantaires-improvisators del Nordeste brasilièr que s'acompanhan de tamborins per la ritmica.

Sas activitats nombrosas, de l'escritura de tota mena en passant pel Comitat d'organizacion del Carnaval de Tolosa, Claudi Sicre las gerís a travèrs lo prisma de la cultura, indispensable segon el a l'afirmacion de sa qualitat de ciutadan. En 1986, enregistra un album artesanal amb son amic Daniel Loddo « Batestas e cantarias ». A aquela ocasion, rencontra Jean-Marc Enjalbert dich Ange B (Bofarèu) que va venir lo segond membre dels Fabulous Trobadors. Mai jove que Claudi Sicre, es afogat de hip hop e anima de còps d'emissions de ràdio. Ange B es sustot un especialista dels bruches de boca que reprodusisson los sons dels instruments de musica. S'es desalenat dins qualques gropets efemèrs de jazz, son rencontre amb Claudi Sicre es determinant. Cadun dels dos artistas tròba dins l'autre lo complement artistic per una aventura particulara e rica, la dels Fabulous Trobadors.

Se fan conéisser dins las animacions de quartièr, coma lo de Naut Bernat a Tolosa ont Claudi Sicre s'activa dempuèi vint ans, las manifestacions culturalas de tota mena, carnavals, acampaments, etc. lai ont òm a besonh de musicians. Mas lor notorietat se tròba creissida quora passan a l'escritura de cançons en francés e non pas pus forçadament en occitan. Lo rencontre amb d'autres musicians « anticentralistas » (contra lo monopòli parisenc en matèria culturala), d'Usèste Bernat Lubat e de Marselha lo Massilia Sound System va contribuir a aviar un viratge cap al succès. En efièch, los rappaires focèus dirigisson lo labèl Roker Promocion e van produsir l'album dels Fabulous Trobadors que sortís en abril de 1992, mentre que lo festival d'Usèste lor ofrís un camp de debat ont afinan lors idèas e multiplican las experimentacions.

Estacat a la pensada de Fèlix Castanh, Claudi Sicre defend lo concèpte de la Linha Imaginòt traçada per l'escrivan occitan, especialament en qu'es un dels animators del Forom de las Lengas del Mond que se debana a Tolosa dempuèi 1993.

Fait partie de



Contactez nous a propos de cette page