Assemblée générale 

Participatz a l'avenidor del CIRDÒC : jonhètz-nos dins l’associacion dels Amics del CIRDÒC. 
 

La Tòca de l’Associacion

Amb la creacion del Centre internacional de documentacion occitana en 1975, l’escrivan Ives Roqueta e los primièrs donators, contributors, cercaires, artistas e militants engatjats dins la construccion d’una « bibliotèca internacionala occitana » realizèron un projècte istoric : dotar la cultura e la societat d’òc d’una institucion culturala enciclopedica, professionala e de vocacion internacionala cargada de recampar per transmetre e far viure dins lo mond contemporanèu la riquesa e la diversitat de las expressions artisticas, scientificas, politicas e socialas occitanas.
Vengut en 1998 lo primièr establiment public entièrament dedicat a la lenga e a la cultura occitanas, lo CIRDÒC bastèt pas jamai d’èsser una institucion ciutadana, que sas colleccions e sas accions existisson pas que mercé a la contribucion dels creators, dels cercaires, de las associacions e dels militants d’ont que venguèsson.

La preservacion e la transmission a las generacions futuras del patrimòni cultural en lenga occitana es una preocupacion de totas e totes, donators coma utilizaires. Los obradors en matièra de cooperacion internacionala, de recèrca scientifica, de professionalizacion dels actors culturals, d'innovacion tecnologica portats per lo CIRDÒC e sos partenaris representan autant d’enjòcs que concernisson professionals e actors nombroses, que sián del monde de la cultura, de l’educacion, del desvolopament territorial, etc.
Es la rason de la creacion dels Amics del Centre Interregional de Desvolopament de l’Occitan en 2016 a l’entorn d’un collectiu de professionals e ciutadans utilizaires dels servicis del CIRDÒC, per fin de jogar un ròtle actiu alprèp de l’establiment.

L’associacion dels Amics del CIRDÒC es un collectiu ciutadan e independent :

Ja mai de 300 personas, universitaris, professionals de l’educacion e de la cultura, artistas, escrivans, editors, associacions o simples utilizaires, de pertot en França e tanben d’en defòra, an aderit als Amics dels CIRDÒC. Los membres de l’associacion, per lor sosten, an mostrat que lo raionament del Centre s’espandís al-delà dels limits de l’espaci occitan e an exprimit lor desir de participar a la siás accions.
L’associacion dels Amics del CIRDÒC es independenta. En 2016, quand l’avenidor de l’institucion foguèt mes en causa per de decisions d’unas collectivitats l’associacion intervenguèt alprèp de l’Estat e de las collectivitats territorialas per fin que los actors publics s’engatjen a perennizar lo CIRDÒC e a lo sosténer a l’auçada d’una granda institucion per la cultura, lo saber e l’educacion.

Los aderents desiran prene una part a la vida e a las accions de l'establiment, en particular :

Enriquesir la memòria e lo patrimòni comuns : obrar a la coneissença e a la valorizacion de las colleccions publicas conservadas al CIRDÒC mas tanben dins los autres establiments ; contribuir a lor desvolopament en sensibilizant los deteneires d’archius sus la conservacion d’aquestes e sus los mejans de valorizacion d’aqueles archius de cap a la societat ;
Contribuir al desvolopament de las coneissenças sus la lenga e la cultura occitanas : participar a la recèrca e als sabers sus las colleccions del CIRDÒC e mai largament sus sos camps d'activitats, contribuir al desvolopament d’otisses e d’accions en favor de la difusion de las coneissenças sus la lenga e la cultura occitanas :
Crear e animar una comunautat d’escambis e de partatge entre sos membres, tanben recampats per lor interès personal o professional, las lors practicas en matièra de cultura occitana ;
Èsser una instància d’escambis permanenta amb los elegits e los agents del CIRDÒC, per fin de contribuir, coma fòrça de proposicion ciutadana e representativa dels publics utilizaires, al desvolopament e al melhorament permanent dels otisses e de las accions en favor de la cultura occitana ; animar la democracia culturala al dintre d’un establiment public estructurant per la reconeissença e la transmission de la cultura d’expression occitana dins lo monde del sègle XXI.
Organizar d’eveniments culturals en partenariat amb lo CIRDÒC

Desiratz jónher los Amics del CIRDÒC ?

Totas las entresenhas sus http://www.amicsdelcirdoc.com I trobaretz lo bulletin d'adesion e las actualitats de l’associacion. O contactatz-nos : amicsdelcirdoc@laposte.net

Amassada generala

L’associacion tendrà son amassada generala annadièra al CIRDÒC, plaça 14-de-Julh a Besièrs, lo dissabte 16 de decembre 2017 a partir de 14h30.
Totas la personas interessadas son convidadas a venir i participar. Lo rencontre serà seguit d’un moment convivial e cultural amb lo tradicional concèrt de Nadal del CIRDÒC

Programa de la jornada del 16/12 :

14:00-14:30 : Acuèlh

14:30 : Amassada generala

17:30 : « Los Nadals de Nicolas Saboly » - Conferéncia musicala de J.-B. e T. Plantevin. Detalh AQUí

19:00 : Aperitiu de fin d'annada