Lo Cine-club Òc contunha sus son aviada ! Lo 27 de març a 18:30, lo CIRDÒC e l'associacion Tu Tanben aculhisson lo realizator Patric La Vau e lo contaire e escrivan Micheu Chapduèlh, per una projeccion-rescontre a l'entorn del film Micheu Chapduèlh, una pensada sauvatja.
Film en occitan, sostitolat en francés.

Presentation (en lemosin)

Nascut en 1947 au mai sarrat dau país perigòrd, nuirit dins una familha onte quatre generacions se cobdejavan, Micheu Chapduèlh es, dempei son temps de mainatge, un fin observaire de la vielha civilizacion paisana.
Sa « pensada sauvatja » se fai lo resson d'una vision dau monde, uei dispareguda, que banhava sas raiç dins l'animisme, lo fantastic e lo chamanisme. Dins quilhs temps, los leberons trevavan la nuech negra, las « vielhas » vivián au fons de las servas e las bèstias parlavan la lenga daus òmes. A l'encontrari de tota pensada cartesiana, l'òme alaidonc se pensava pas coma lo mestre de la natura mas viviá en acordança emb lo monde que l'environava, los aubres, las bèstias, las peiras.
Luenh d'un biais de veire passadista o de quala nostalgia que siá, Micheu Chapduèlh conjuga au present questa « pensada sauvatja » que banha de contunh son òbra abondosa e sa vita jornadiera. Autor d'obratges nombrós, en occitan e en francés, dins daus domenis plan variats - pròsa, poesia, conte, chançon, linguistica, etnobotanica o enquera etnografia - Micheu Chapduèlh viu en comunion emb la natura en respectar lo cicle de la luna e lo ritme de las sasons, en semnar de las varietats e de las enjas vegetalas escartadas dau catalòg oficiau, en participar a daus eschamnhes liures de semens paisans, en cultivar las sabors ancianas de frucha e de legumatge o enquera en se far culhisseire per una frotjada de botareus o una espelida de flors d'acàcia.
A l'agrat daus vironseus daus chamins vesinaus de la pensada e de la memòria, Micheu Chapduèlh nos fai entrar dins sa vision dau monde, enraijada dins una vielha saviesa paisana que se descrueba d'una granda modernitat a l'ora daus desfis ecologics de uei.

Micheu Chapduèlh, una pensada sauvatja es lo cinquau filme documentari en ocitan de Patric La Vau.

Informacions practicas

Dintrada gratuita
tutanbenoc@gmail.com
info@cirdoc.fr
04 67 11 85 10