Radio Lenga d’Òc [Web radio]
Doas ràdios occitanas se partejan lo nom de ràdio Lengadòc, l’una emet dempuèi Narbona (95.5) sus lo narbonés e lo besierenc, l’autra installada a Montpelhièr ten una difusion mai larga sus sèt frequéncias de la benda FM. (Montpelhièr, Seta, Alès : 95.4, Milhau : 106.1, St Africa : 88.5, Menda : 91.0 e a Niça sus la RNT.)
Las doas ràdios se pòdon escotar tanben sul net en dirècte o a travèrs sos podcasts.
Lo site de Ràdio Lengadòc Narbona es disponible
aquí.
Lo site de Ràdio Lengadòc Montpelhièr es
aquíNascuda en 2003, Ràdio Lenga d'òc Narbona es una ràdio associativa occitana bailejada per l'associacion Lenga d'òc-Lenga viva. Sa zòna de difusion va tocar quicòm coma 150 vilas e vilatges dins un ròdol de 40 km a l'entorn de Narbona. La programacion musicala es mai que mai latina mas ofrís tanben un fum d'emissions en lenga occitana : informacions, reportatges, cronicas de totas menas.
« En occitan se parla de tot e en francés s’evòca çò que pertòca la lenga e la cultura occitana » aquí la linha editoriala de ràdio Lengadòc Montpelhièr que propausa una programacion variada –una ràdio generalista, çò dison- mas virada cap e tot devèrs l’occitan dins un relarg bèl que tòca doas regions e 5 departaments.
Se nombres de militants occitanistas s’èran mobilizats tre 1981 per la creacion de ràdios « liuras » cal esperar a Montpelhièr una crida de ràdio Clapàs a esperlongar una ora d’emission occitana en pana d’animator per veire lo Bruno Cécillon e una còla de militants se ronçar dins l’aventura e fondar l’associacion Son e Resson Occitan. Van causir, puslèu qu’una oreta per setmana de trocejar son temps d’antena dins lo cada jorn e de partejar sos contenguts amb un desenat de ràdios associativas. A cha pauc, la plaça acordada a la lenga d’òc va créisser fins a menar los responsables de ràdio Clapàs a se questionar sus la pèrda de son identitat primièira –son de mai en mai assimilats, pels auditors, a una ràdio occitana- alara que volián demorar dins lo jazz, lo social e lo multicultural.
La còla occitana de Montpelhièr va doncas èsser convidada a desnisar. Pren sa volada, s’estructura, e congrèa sa ràdio que comença de difusir d’unas emissions sus internet en 2001. Encontra sus son camin una associacion narbonesa Lenga d’òc-Lenga viva, nascuda en 2000, que pòrta un projècte parièr per sa vila. Las doas còlas van obrar amassa, se fargar de contenguts d’emissions dins un estúdio vièlh de ràdio França a Besièrs e participar a d’apèl d’ofèrtas per obténer de frequéncias de difusion. En 2003 son los Narboneses que n’obtenon una e ràdio Lengadòc Narbona comença d’emetre en octòbre, 80 mn per jorn en bocla, dins lo temps que lo projècte de Montpelhièr es refusat.
S’enseguís una mobilizacion militanta de las bèlas de tot lo mitan occitan per obténer sul Clapàs una difusion, temporària a la debuta que vendrà permanenta a partir de 2006 sus Montpelhièr, Alès e Seta. Los autres emetors seguiràn (2008 – Milhau ; 2010 – Menda ; 2014 – Niça RNT).
Los mejans technics de las doas ràdios s’acréisson (informatizacion, automatizacion, emetor, estúdio per los de Narbona amb una difusion sus internet ; frequéncias nòvas per Montpelhièr e estúdio novèl en 2018), las còlas caminan cap a una profesionalizacion amb qualques salariats, de part e d’autra, tot en daissant la part bèla als benevòls e contributors per tocar sempre mai de mond. (En 2016, segon Médiametrie, èran qualques 76000 personas qu’escotavan cada setmana ràdio Lengadòc Montpelhièr sus sa zòna de difusion, e 9,8 % de sos estajants qu’avián costuma de l’escotar.)
Uèi, ràdio Lengadòc Narbona afortís sa preséncia sus son sector dins de collaboracions amb de ràdio localas coma Contact FM, RCF Aude o ràdio Ballade capitant aital de lor ofrir una color occitana e agacha per son desvolopament del costat de Carcassona e de Besièrs.
Per ràdio Lengadòc Montpelhièr l’avenidor passa per un projècte panoccitan dins d’escambis e de mutualizacions de mejans amb d’autras ràdios occitanas (ràdios Occitania, País, Albigés, Nissa Pantai) un alargament de son malhum hertzian, la RNT -ràdio numerica terrèstra qu’es a se metre en òbra, los escambis amb l’ensenhament en occitan e la formacion de jornalistas.
- Bruno Cécillon, « Un malhum radiophonique pour s’inventer notre demain », Revue du Centre Régional des Lettres, N°9, Montpelhièr, 2012
- Bruno Cécillon, « 2016-2020. Lo temps tres per las ràdios occitanas », 2016
- Médiamétrie, Étude du public des associations, janvier-juin 2016.
