Es un espectacle arcolan per tornar prene la formula qu'utilizèt Mandela per pintar l'Africa del Sud post-apartheid. Un espectacle fach de teatre, de musicas, de danças, mas tanben, mas sustot, mestissat de lengas que la mondializacion culturala menaça.
A la debuta, i aviá un pichon que registrava son grand quand li parlava una lenga que li semblava pivelaira : l'occitan. La lenga nòstra, disiá lo vièlh. Uèi, Christophe Rulhes es vengut antropològ, musician e, amb l'acrobata, coregraf, scenograf, Julien Cassier, co-fondator del GdRA, aquela tropa unica de teatre tolosana.
Unica per de qué lor projècte sembla a pas cap d'autre. Ne testimònia aquel estranh e vivificant espectacle evidentament batejat Lenga. I vesèm, i ausissèm un acrobata de carrièra de Madagascar (Maheriniaina Pierre Ranaivoson), un iniciat Xhosa d'Africa del Sud (Lizio James), un comedian Tolosan, un musician Occitan que jòga de la cabreta e de platinas. I parlam un occitan desbarrassat de sa ganga folclorista, i ausissèm de lengas, malgachas, sud-africanas, que lo rabòt cultural amendrís cada jorn un pauc mai. I seguissèm, entre Lo Cap e Antananarivo, las astradas de mametas que semblan venir d'un monde en mutacion complèta...
Lenga es de l'antropologia joiosa.
Durada : 1h30
Tre 12 ans
Espectacle en partida jostitrat
Talhièr-jòc gratuit animat per LUDULE pendent tot l'espectacle pels enfants de 3 a 12 ans, sus reservacion abans lo dimars 2 d'abril de 2019
En primièra partida a 18:00 : conferéncia (entrada gratuita) animada per Les Amis du Monde Diplomatique : "La diversité biolinguistique menacée - mes enfants parleront-ils la langue de ma mère ?" presentada per Philippe Descamps, cap redactor del Monde Diplomatique.
Contactez nous a propos de cette page