Sortit en 2015 sul labèl Pantais Recòrds, ARA es un EP de poesia experimentala en occitan. Los tèxtes foguèron escrits e dits per Rodín, puèi mandats a 6 musicians qu'avián carta blanca per arrengar aquels registraments a lor manièra, amb per sola constrenta que lo tèxte siá intelligible en entièr. 

Aquela creacion propausa una interpretacion d'aquel repertòri poetic per l'autor, Rodín Kaufmann, acompanhat de dos artistas : sa sòrre, Iris Kaufmann, musiciana experimentala, e Klara Gaï, artista plasticiana pluridisciplinària. 

Embelit de melodias tradicionalas  loserianas, lo tèxte original torna far susfàcia dins un cocon novèl. L'epopèa intima nascuda d'un panorama fotografic de Kandahar, present dins lo libreton, se torna trobar aqueste còp vestit d'imatges glenats e fabricats per Klara Gaï, diapositivas collectadas, projectadas, dessenhadas en temps real.  La votz simpla e despolhada del poèta i ditz l'amor, la distància, lo languiment que surgisson al mitan dels sons estridents o organics del dispositiu d'Iris Kaufmann. 

 

ARA, es aquel temps partejat, dins l'intimitat. Es un espectacle de causas pichonas, son los mots diches tant qu'es encara possible.

Vòli ben, se me permetes, t’èsser agradiu / Je veux bien, si tu me le permets, t’être agréable.