PRESENTACION ÒCtele e la Region Novèla-Aquitània donan un còp de man a la creacion audiovisuala de lenga occitana.
Ara qu'es estat renovelat lo Contracte d'Objectius e de Mejans entre ÒCtele e la Region Novèla-Aquitània pel periòde de 2021, 2022 e 2023, ÒCtele avia tres cridas a projèctes a l'entorn de la creacion audiovisuala en lenga occitana.
Una crida pels documentaris, una autra per una creacion corta de tipe SITCOM e una tresena per l'escritura audioviuala.
Tanlèu aqueste començament de febrièr e duscas al 30 d'abrial ÒCtele apèla tots los qu'an un projècte dins un d'aqueles maines a lo presentar e a mandar un dorsièr.
S'agís pels dos partenaris que son ÒCtele e la Region Novèla-Aquitània d'ajudar al desvolopament d'una creacion audiovisuala de qualitat en lenga occitana.
Documentari
Los autors e realizators qu'aurián un projècte a prepausar son encoratjats a lo metre sul papièr. La condicion es que lo documentari siá en lenga occitana. Es una condicion indispensabla ; tanben d'autras condicions pertocant la localizacion del projècte o al mens per çò qu'es de la residéncia dels autors e la localizacion dels productors, son pausadas.
Trobaretz en pèça junta los elements necessaris per constituir lo dossièr.
SITCOM
Es una polida crida a projècte pels qu'an envja de mesclar creacion, actualitat, societat, vida de cada jorn, familha e relacions entre generacions ; e los camps d'investigacion son nombroses e variats per aquela comedia de situacion.
En tot la seria deurà pas far mai de 52 minutas. Lo rodatge se farà en Region Novèla-Aquitània en s'apiejant lo mai possible sus de competéncias tecnicas regionalas
Totas las informacions son sul document en pèça junta.
Escritura
S'avètz l'idèa de vos lançar dins l'escritura audiovisuala o de vos perfeccionar dins aquel domeni avètz aquí la crida a projèctes que vos cal. S'agís d'una ajuda a l'escritura d'una òbra que pòt èstre acompanhada d'una ajuda a la formacion. Segur, cal mestrejar plan la lenga occitana ; es la basa.
Es pas necessari, çaquelà, d'aver ja escriut quicòm. Qual que siá vòstre atge, vòstre lòc de residéncia, podètz candidatar.
Es parièr coma per las autras cridas a projèctes : lo document en pèça junta.
Informacions praticas www.octele.com
Tèl : 05 47 41 48 93
contact@octele.com