Création d'une maquette du système solaire à l'échelle [Ressource enseignement]
La genèsi del projècte
En 2018, pendent una sequéncia dedicada a las poténcias en cors de matematicas, un problèma màger sorgiguèt de la classa de 4ena al Collègi Calandreta del País Tolzan.
Amb la notacion scientifica fa bon emplegar de nombres bèls : permet la comparason, los calculs, l’escritura del nombre e limita las errors.
Quand venguèt lo moment de convertir los diamètres e distàncias dels astres del sistèma solar mercés a la notacion scientifica, l’aplicacion foguèt aisida mas la representacion mentala d’aquelas donadas, impossibla !
En agachant las representacions disponiblas (encyclopèdias, revistas, sitis internet, vidèos) nos avisèrem qu’èran totas falsas cap a las proporcions. De fach, lo diamètre del Solelh es 110 còps mai grand que lo de la Tèrra. Mai que mai, los diamètres dels astres son fòrça pichons per rapòrt a lors distàncias al Solelh e aquelas grandors son proporcionalas : lo sistèma solar e en general los objèctes e distàncias en astronomía, son pas representables sus papièr o sus un ecran !
« Cossí far per nos ajudar a representar lo sistèma solar amb de proporcions respectadas ? Nos cal trobar una aisina ! »
Dins son obratge
La Différenciation pédagogique, Louis LEGRAND ditz que la pedagogia de projècte permet l’aplicacion de la pedagogia diferenciada perque impausa « un effort de diversification méthodologique susceptible de répondre à la diversité des élèves ».
D’aquel besonh nasquèt lo projècte : Bastir una maqueta del sistèma solar a l’escala !
La maqueta se faguèt en junh 2019 e sus aquela pagina, trobaretz las aisinas que vos permetràn de realizar la vòstra.
Contengut
Vos prepausi aicí totas las aisinas per poder far vòstra maqueta del sistèma solar, pr’aquò trobaretz :
- Lo convertissor distàncias/diamètres. Es lo còr del projècte (bastit pels collegians), permet de dintrar la talha de l’objècte que volètz emplegar per modelizar lo Solelh e vos calcula automaticament las distàncias de las planètas al Solelh e lors diamètres.
- Un tutorial per aprene a emplegar lo convertissor : « Cossí fonciona lo convertissor sistèma solar ? »
- Una fòto amb un exemple d’objèctes emplegats per nòstra maqueta.
- Una fòto aeriana de nòstra maqueta.
Creacion d'una maqueta del sistèma solar a l'escala [Ressorsa ensenhament]
