Al fil de las paginas, classadas per grandas tematicas, mas dont los contenguts dialògan entre eles d'un domeni a l'autre, vos prepausam per aquel catalòg de la creacion occitana actuala una seleccion plurala. Plurala dins sas formas e expressions (romans, concèrts, espectacles de teatre, exposicions...), mas egalament en se fasent lo rebat de la diversitat granda de l'expression occitana dins totas sas formas dialectalas, del provençal al gascon en passant pel lengadocian.
« Seleccion » significant pas « exaustivitat », los diferents numèros de Tè ! vos convidan cada sièis meses a descobrir de novèlas creacions, de novèls artistas, en demorant al plus près de l'actualitat.
E segur, esitatz pas a sollicitar las equipas del CIRDÒC - Institut occitan de cultura per vos acompanhar dins vòstras recèrcas, vòstras presas de contacte, o per beneficiar dels servicis e espleits prepausats dins lo quadre de l'ofèrta a las collectivitats.
