Una conferéncia sus dos poètas barròcs lengadocians, Augièr Galhard e Pèire Godolin. 

Augièr Galhard es un poèta de lenga d'òc e de lenga d'oïl originari de Rabastens (albigés). Foguèt d'en primièr rodièr, soldat, jogaire de rebèc puèi un poèta fòrça influenciat pel reviscòl del petrarquisme. Escriguèt a l'encòp en francés e en occitan, soven per necessitat, çò que daissa d'el, una produccion tan abondanta que confusa. Augièr Galhard auriá fait estampar sas òbras en lenga d'òc dins al mens tres obratges Las Obros (Las Obras, en grafia classica), Lou libre gras (Lo libre gras) e Lou Banquet (Lo Banquet).

Nascut a Tolosa d'un paire cirurgian, Pèire Godolin es un escolan dels Jesuitas, licenciat en dreit, admes al collègi (d'avocats) mas que  plaidejava pas. Protegit successivament per mantun sénhers dels bèls de son epòca, acaba sa vida sens argent, pensionat pels Capitols. Escrivan magèr de la literatura occitana, son òbra, abans tota comanda, es fòrça divèrsa : poesia oficiala a la glòria dels notables o del rei, poesia epicuriana, escrits carnavalencs mas tanben poesias de la natura e de la mòrt.
Ardent defensor de la lenga 'moundino", s'exprimís dins un occitan fòrça ric, clafit d'umor, e mescla amb sabor, cultura umanista e populara per pintrar la societat de son temps.