Fòrt de sos dos labèls, Colleccions d’Excelléncia e Etnopòl, lo CIRDÒC - Institut occitan de cultura contunhèt en 2023 lo desvolopament de son accion dins totes los domenis d’intervencion definits per son projècte scientific, cultural, educatiu e social, e confirmèt son ròtle de menaire en
matèria de cooperacion territoriala per la coordinacion d’operacions patrimonialas, de lectura publica e d’engenheria culturala d’envergadura granda. D’un costat l’engatjament dins
las commemoracions dels centenaris Robèrt Lafont e Bernat Manciet illustrèt la pertinéncia del nivèl interregional dins la co-construccion d’un programa coerent e projectable a l’escala, mai larga, de l’espaci occitan. D’un autre costat, lo succès
del projècte montpelhierenc Martor. L’esprit des lieux, amb la participacion de centenats d’escolans e collegians de la vila, demostrèt la capacitat de l’establiment a renovelar sos formats
a la dimension d’una metropòli.
Enfin, la co-organizacion a Pau de la barradura del programa
europèu LIVHES en preséncia de Tim Curtis, Secretari de la
convencion de l’UNÈSCO per la salvagarda del patrimòni cultural immaterial, testimonièt del nivèl de reconeissença aquesit sul subjècte al près d’institucions prescriptoras.
Lo CIRDÒC - Institut occitan de cultura ne contunha pasmens una politica de site amb la progression de sas cooperacions localas en relacion amb sos dos equipaments, la Mediatèca
a Besièrs e l’Espaci Lecturas e Descobèrtas a Pau. La valorizacion de colleccions occitanas e la promocion
de la lectura publica en lenga s’enriquís d’iniciativas de proximitat, en ligam amb las associacions, institucions e collectivitats, çò que permet a l’encòp d’estructurar los publics e de sosténer los actors culturals. A títol d’exemple, la collaboracion amb los conservatòris de las doas ciutats contribuís a alargar los malhums locals, renovelar las fòrmas de mediacion e inspirar las proposicions d’educacion artistica
e culturala en relacion amb los diferents partenaris academics.
