Per la dintrada, lo Cine-club Òc, prepausat per l'associacion Tu Tanben e lo CIRDÒC-Institut occitan de cultura, lança las festivitats del cicle « A contra subèrna : país de vinha, pòble de cultura » : cinc jorns de projeccions, d'espectacles, de discussions a l'entorn de la cultura viticòla contemporanèa en Lengadoc.
Rendetz-vos dimècres 18 de setembre, totjorn a 18h30, per una projeccion-rencontre (en preséncia del realizator) a l'entorn del vin natural, seguida d'una degustacion amb la Cave des Artistes, de Serinhan.
Lo film ?
Wine Calling, un documentari del Narbonés Bruno Sauvard, sortit en 2018 e que, dempuèi, a fach la ronda del mond.
Lo pitch ?
Dempuèi una desena d'annadas, lo monde del vin es en plen borbolh, butassat per una contra-cultura coma lo ròck o foguèt, un còp era, pel punk. En Occitània, de rebèls gaujoses se son installats dins nòstres terradors per inventar lo vin que mai lor agrada : natural e sens artifici. Mai qu'un vin biologic, es un vin d'emocion e de reaccion, un vin qu'es pas regit per cap de làbel, un vin liure. Wine Calling se'n va al rencontre d'aquestes vinhairons novèls que tornan inventar nòstre rapòrt al vivent. Aqueles òmes e aquelas femnas prefiguran una agricultura païsana en movement. Solidària, etica, una novèla utopia emergis de nòstras costièras !
