Explorar los documents (709 total)
Emission del 20 de genièr de 2021
Lo castèl comtal de Carcassonna
Dins la Ciutat de Carcassonna, ben coneguda, vos menam a la descubèrta del Castèl Comtal. Se troba a cima del sèrre de la Ciutat, enrodat per de barris grands. Es mens conegut del public e dins las salas , se pòdon veire de tresaurs ; estatuas, pinturas, pèiras e vestigis del passat. La visita es comentada per Jean Blanc, archivista saberut de Carcassona, que nos mena dins d'endreches remirables al rescontre de paginas ricas de l'istòria del castèl.
Un reportatge de Lisa Gròs.
[resumit de Tè Vé Òc]
Emission del 13 de genièr de 2021
Cançons per Pèire Mathes
L'artista occitan Pièire Mathes a concebut un projècte d'espectacle musicau, en associacion ambé d'aprentís dau cors d'occitan de Sant-Geniès de Malgoirès. La colaboracion a pres dins lei cançons dau repertòri de varietat occitana, francesa, belga e italiana. Aqueleis artistas estent d'expression francesa, leis escolans e Pèire Mathes aguèron l'idèia de lei tradurre en lenga d'òc. Aquela emission vos presenta d'entrevistas e de tròç musicaus e adaptats en occitan, interpretats per Pèire Mathes.
Un retrach de Miquèu Gravier.
[resumit de Tè Vé Òc]
Emission del 06 de genièr de 2021
La sanha en Camarga
La sanha es lo nom donat au rosèu comun, que trobam aquí en Camarga. Fins qu'a quauquei decenias encara, lo mestièr de sanhaire contribuissiá pron a l'entreten dei paluns. De'n promier ambé son otís lo « sanhador » copava a la man la sanha, puèi son arribats lei motocultors e lei maquinas a partir deis annadas 60. Nautrei avèm rescontrat Andrieu Calba, sanhaire amb una lònga experiéncia, per nos faire una demostracion de copa de sanha a la man, coma a passat temps. Puèi dins una entrevista, veiretz tota la complexitat d'aquel ecò-sistèmi de tria que representan lei paluns, e l'economia verda que i'es restacada.
Un reportatge de Jaumelina Bizet e Amada Cròs.
[resumit de Tè Vé Òc]
Lapierre, Patrick. Metteur en scène ou réalisateur
Emission del 23 de decembre de 2020
Lo Nadal occitan de Montpelhièr (emission enregistrada en 2019)
Lo temps de Nadal se sarra, amb el, la costuma de far clantir los Nadalets. Autres còps se campanejava dins mantunas villòtas. Mas uèi, se trelhonan pas dins los cloquièrs. Pasmens, la costuma populara de cantar demòra e la corala de Sant Guilhem fa viure aquela tradicion. Claudia Goinguenet, guida conferencièra de Montpelhièr, aguèt l’idea de mesclar passejada dins la vila del passat occitan e cants de Nadal. Una capitada per descubrir lo patrimòni nòstre.
Un reportatge de Miquèla e Patric Lapierre.
[resumit de Tè Vé Òc]
Emission del 16 de decembre de 2020
Lo musèu Albert André (partida 2)
Anam au còr d'una ciutat gardesa, a Banhòus de Cese. Es aquí que podèm trobar lo musèu Albert André, lo promier musèu d'art modèrne nascut en defòra de París. Dins lo bastiment de la comuna, au segond estanci, pas mens de 8 salas son consacradas a l'art : pinturas, esculturas, dessenhs e porcelanas son expausats per epòca e contèxte artistic. Nautrei vos convidam a la seguida de la visita guidada menada per Elian Cellier, professor d'istòria e president de l'associacion "Les Amis d'Albert André". De notar que nòstrei entrevistats èran pas mascats unencament lo temps de respòndre a nòstrei questions, e que Tè Vé Òc faguèt son rodatge en seguissent la reglementacion impausada per la comuna de Banhòus.
Un reportatge d'Amada Cròs.
Les artistes présentés dans ce reportage sont :
Jacques Martin « Rapin le chat »
Louis Carrand « Vue de Lyon »
Albert André « La belle endormie »
Albert André « Au jardin »
Albert André « Albert André à son chevalet »
Jacqueline Bret André « La Place Pigalle au crépuscule »
Michel Rodde « Les cascades du Sautadet »
André Cottavoz « Portrait de ma mère »
Pierre Cayol « Rochefort du Gard »
Bernard Lorjou « Le chapon des Abbesses »
Un reportatge d'Amada Cròs.
[resumit de Tè Vé Òc]
Emission del 9 de decembre de 2020
Lo dolmèn de Russòl
Dins lo Menerbès vos menam a la descubèrta dau dolmèn de Sant Eugèni a Russòl. Aquela necropòla dau neolitic es una meravilha, e au mens 300 personas i fuguèron mesas après sa mòrt. Joan Guilaine, arqueològ renomat nos presenta aquel monument, son istòria e leis objèctes trobats dins la tomba.
Un reportatge de Lisa Gròs sus una prepausicion de Danielle Sarran.
[resumit de Tè Vé Òc]
Emission del 02 de decembre de 2020
Lo Lingàs tèrra de legendas e brèç dei Ròcafuèlh
Lo Lingàs es una region misteriosa dei Cevenas, que reculhiguèt fai longtemps una familha ; instalada au sègle 7en dins un dei sites lei mai fèrs d'aqueu vaste planestèu. Puèi eissemèt dins Occitània tota, e au delà, devèrs la Catalonha meridionala. Aliada amb lei familhas lei mai grandas d'Euròpa e mai particularament amb lei Guilhems de Montpelhièr, puèi de Jaume 1er d'Aragon, nebot d'un Ròcafuèlh, que partiguèt amb eu per la reconquista.
Un documentari de Miquèu Gravier.
[resumit de Tè Vé Òc]
Emission del 24 de novembre de 2020
Peisses e pescaires a l'estanh de l'Airòla
A Grussan anam au rescontre d'òmes afogats de pesca, lei pescaires de l'estanh de l'Airòla.
Dins lo vilatjon dei cabanas de pescaires, a riba de l'estanh partisson cada jorn amb sei "betons" sus leis aigas gaire prigondas. Sòlas, doradas, lops e anguilhas son vendudas sus plaça cada matin, d'ora.
Amb l'entrevista de tres pescaires vesem coma s'organiza aquela pesca particulara, amb lo partage deis aigas tirat au sòrt a la Prodomiá. Nos esplican lo fonccionament dei fielats que fabrican pendent l'ivèrn quand fai tròp frèsc per pescar. Una vida pròcha de la natura, un rescontre bèu.
Un reportatge de Lisa Gròs.
[resumit de Tè Vé Òc]
Emission del 18 de novembre de 2020
Lo Pònt de Gard : environament
Nautrei vos prepausam una seria de tres emissions consacradas au famós pòrta-aiga roman, e mai particularament a l'entorn dau pònt qu'encamba la ribièra Gardon, a Vèrs-Pont-de-Gard. Tres reportatges, tres punts d'analisi, en companhiá d'Evalisa Faïssa, secretària de l'associacion « L'Académie Pont du Gard », qu'a respondut a nòstrei questions. Dins aquesta tresenca e darrièra partida, nos alanguissarèm sus l'environament dau Pònt de Gard. Sabiatz-vos que la gardonada de 2002 faguèt descubrir çò que podiá èstre un pòrt roman pròche lo monument ?
Un reportatge d'Amada Cròs.
[resumit de Tè Vé Òc]
Emission del 10 de novembre de 2020
Lo musèu Albert André (1era partida)
Anam au còr d'una ciutat gardesa, a Banhòus de Cese. Es aquí que podèm trobar lo musèu Albert André, lo promier musèu d'art modèrne nascut en defòra de París. Dins lo bastiment de la comuna, au segond estanci, pas mens de 8 salas son consacradas a l'art : pinturas, esculturas, dessenhs e porcelanas son expausats per epòca e contèxte artistic. Nautrei vos convidam an' una visita guidada en doas partidas, menada per Elian Cellier, professor d'istòria e president de l'associacion "Les Amis d'Albert André". De notar que nòstrei entrevistats èran pas mascats unencament lo temps de respòndre a nòstrei questions, e que Tè Vé Òc faguèt son rodatge en seguissent la reglementacion impausada per la comuna de Banhòus.
Un reportatge d'Amada Cròs.
[resumit de Tè Vé Òc]