Explorar los documents (9694 total)

Reedicion de l’obratge parescut en 2012 a las edicions Lo chamin de sent Jaume.

« Dinc a non i a guaire, Marcela Delpastre que regnava shens partatge sus l’etnologia lemosina (Lemosin entenut au sens un chic forçat d’airau dialectau), dab tant e tant d’estudis sus tots los subjèctes e aquera soma qui pensavan insuperabla, Le tombeau des ancêtres, parescuda en fulheton dens la revista Lemouzi e represa en volume a Payot en 1997. La colleccion « De temps pacan » de las edicions Lo Chamin de Sent Jaume qu’èra d’aulhors estada creada entad era, e los prumèrs dus títols que l’èran consacrats.
D’ara enlà, que son dus. Solide, que coneishèn dejà a Michèu Chapduelh per las soas publicacions suus arreproèrs e mimologismes, mes lo present obratge qu’ei d’un aute endom. Los vint un capítols de J’ai refermé mon couteau, qui balhan ua vista d’ensemble de la cultura tradicionau d’aqueth país, quan seré d’ua faiçon e sus un ton hòrt diferents, que son lo complement indispensable deu Tombeau. E aquò shens ac paréisher, dab quauquarren de bonifaci que’s poderé díser, com en un entertien particular, com se parla au còrn de la taula, au cot deu huec.
A ua generacion de distància, Marcela Delpastre e Michèu Chapduelh qu’an en comun un airau d’enquèsta limitat au lor environament immediat, la coneishença intima de las causas dont parlan, l’intuicion de tot çò qui pòrtan e significan. Qu’an de mei ua qualitat inapreciabla : qu’obreishen un sarròt de pòrtas, jamei ne las vse barran au nas.
Sonque lo cotèth que serà barrat, lo de Nontronh, lo de la metafòra.
Dinc au repaish qui vien... » - IÈO-Novelum

Tà'n saber mei

Grégory Jolivet, gran mèste de la sonsaina, que bota ací la soa immensa mestria tecnica, melodica e ritmica au servici deu repertòri tradicionau de la soa tèrra mairana, lo Berric. - AEPEM

« Un viatge peu Berric de la mea enfança, la tòca que i ei de retrobar, e de prepausar, daubuns tròç qui m’agradan, qui n’èi pas jamei jogat o qui son chic coneguts. (…) Qu’èi causit melodias de diferents parçans geografics : Sancerre, La Borne, Mehun-sur-Yèvre, Vierzon, Allogny, Asnières, Fussy, Essaudun e Chasteurós, la mea vila d’adopcion. Per l’estille, que’m soi inspirat de grans tocadors de sonsaina berrigauds com Laurent Bitaud, Georges Simon, Jean-Claude Laporte. Qu’èi utilizat collèctas, recuelhs de particions (…). Que dèishi entad aquesta escadença las meas granas sonsainas dab clavèr perlongat e que tòqui dab plaser sus la mea sonsaina en re alto, acordatge pròche deu son de Georges Simon e sus ua magnifica sonsaina barròca en sòl/dò... » - Extrèit deu liberet

Tà'n saber mei

PRESENTACION

Coma cada annada, lo CIRDOC - Institut occitan de cultura collabòra al Prèmi literari Calandreta, organizat per las Calandretas d'Agde, Nimes e Carcassona, e a la Passejada literària que lo clava. Un temps fòrt de la literatura de joinesa en occitan amb a son còr lo rencontre entre los autors e lor public que ongan se debanarà en linha lo 11 de mai.

Rendètz-vos en partir de 9h30 : https://meet.jit.si/PremiLiterariCalandreta
 

Qu'es aquò lo Prèmi literari Calandreta ?

Creat en 2016 per la Calandreta Dagtenca, aquel prèmi literari, dubèrt a totas las escòlas que se vòlon marcar, convida los joves lectors a votar per l'obratge qu'aiman mièlhs entre una seleccion d'òbras en occitan (4 per cada cicle).

Aital, es una jurada de mai de 1 000 joves lectors que balhan aquel "Prèmi literari Calandreta". La proclamacion de las resultas es l'escasença per una granda jornada de fèsta, de rencontre amb los autors e d'escambis a l'entorn del plaser de legir : la Passejada literària.

Komred, que son cinc joens musicaires qui descobreishen amassas, hòrt de d’òra, musica e dança tradicionau auvernhata au Gamounet, en çò deus « Brayauds ». Tostemps au servici deu dançaire, un ric tribalh d’adobaments que tira partit au miélher deus timbres e sonoritats deus diferents instruments. Las borrèias e autes melodias tradicionaus que son usinadas, engolidas, coloradas... dens l’arrespècte de l’estile, de la frasejada e de la cadéncia. Portant ad aqueth ric repertòri locau las lors pròpias composicions, los musicaires de Komred que perpausan atau un bal auvernhat energic e viu, dab com briu conductor la borrèia de tres temps !

Après dus prumèrs albums (Musiques d’Auvergne en 2009 e Sous les noyers en 2013), Komred que quita las aisinas deus estúdios e qu’ei en dirècte, au moment d’un bal vertadèr, que lo quintet enregistra lo son tresau opús, Grange, paregut en 2019.

Antoine Cognet : banjo, guitarra
Clémence Cognet : vriolon, votz
Cyril Etienne : clarineta
Mathilde Karvaix : clarineta, votz Loïc Etienne : acordeons diatonics

Tà'n saber mei

Novèla edicion del recuèlh de 24 novèlas publicat inicialament en 2004.

« A la sortida del peatge, los pneumatics de la Gòlf limpèron un pauc a l'acceleracion sul quitran banhat. L'agulha del comptatorns montèt, davalèt, tornèt montar del temps que la veitura encapava la corba que mena a l'autorota, montèt encara e puèi la cinquena. "– Tampa-me aquela vitra, faguèt la votz d'Akim, sus la banqueta de darrièr, que nos anam gelar los colhons. "– VOS gelar, richonegèt Milod, en laissant retombar sa man sus las cuèissas de Beti, assetada a costat d'el, acoconada... »

Informacions

La part des anges qu’ei un album de casa hèit, mesclat artisanaument.
Uns quandes tròç, gessits deus lors repertòris individuaus, que son enregistrats dens las condicions deu dirècte. Com ua ambrada tradicionau, aqueras composicions, auberoadas e frutadas, que son torrinadas dab ingredients tirats d’Appellacion d’Origina Contarotlada : musica neotradicionau d’inspiracion occitana e folclòre imaginari deus entorns de Grenòble.
D’autes, com la creacion subtila d’ua IPA, densa e amara en medish temps, que son compausats per e tau duo. Hèra mei produits e arrebats d’ua identitat comuna, que son lo lòc d’encontres d’aquestes dus artistas aus caminaments desparièrs mes dont las trajectòrias e’s mesclan tà’vs perpausar un album qui parla a las papillas e a las aurelhas.

Tà'n saber mei