Gérard Zuchetto es un apassionat de l'art liric dels trobadors dont es vengut un especialista. Dempuèi 1981, canta los trobadors dels sègles XII- e XIII qu'estúdia dins los manuscrits medievals.
Nascut a Carcassona, participa d'ora a la Nòva cançon occitana. Fonda los grops Los Caminaires d'Òc e Grop Rosamonda.
Farga sa cultura poetica als costats de Max Roquette e dins lo Trobar medieval, e sa cultura musicala al près del compositor Alphonse Stallaert.
Director musical de Trobadors Art Ensemble, es autor d'obratges nombroses sul Trobar medieval dont Terre des Troubadours e Le livre d’or des troubadours, éd. de Paris, 1996-1998 ; e a las edicions Tròba Vox : Camins de trobar, vol.1-2-3, 2013, Retrobar lo Trobar, 2017 ; Dans les mots de trobar, 2020 ; Ligams, Tolosa-Trobadors-Trobar, 2024 et La Tròba, grande anthologie chantée des troubadours en 24 Cds, 2006-2011 acompanhada d'un libre eponim, antologia comentada, de mai de 800 paginas.
Cantaire e compositor, dedica mantun espectacle als autors occitans contemporanèus dont tres oratorios co-escriches amb Sandra Hurtado-Ròs e de nombrosas cançons.
Poèta, publica mantun libre de poesia occitana, dont L'Ultim Cantic, 2024. Premiat per l'Acadèmia d'Occitània, l'Acadèmia dels Jòcs Florals de Tolosa, lo Premio Ostana en Itàlia, Gerard Zuchetto es membre de la seccion Lenga occitana del PEN internacional. En 2020, sa poesia es comentada al MLA de Seattle Washington (Modern Language Associacion) per Marisa Galvez, Universitat de Stanford. Dempuèi 2019, es Manteneire de l'Acadèmia dels Jòcs Florals de Tolosa.
