Cada an, aprèp gaireben tres meses de festivitats cada fin de setmana, lo carnaval de Limós s'acaba amb coma apogèu la nuèch de la Blanqueta. Aquel dimenge a mièjanuèch, carnaval, que demorèt totas aquelas setmanas sus la plaça de la Republica, es jutjat.

Aquestes jutjaments permeton de reglar en plaça publica totes los problèmas de la societat limosenca de l'annada passada. Qualques còps, es complicat de comprene e d'explicar las allusions, los noms de vilatges o de personas, per de que fan referéncia a de luòcs, de personatges o d'eveniments locals. Mas aquestes jutjaments permeton tanben de faire un recapitulatiu dels eveniments internacionals e nacionals màgers de l'annada.

Carnaval es invariablament acusat de totes los mals, quin que ne siá lo nivèl, local, nacional o internacional, jutjat colpable e executat.

L'annada 2007 vei lo retorn d'un carnaval ja jutjat e brutlat ! Es fait un rampèl dels dos jutjaments precedents d'aqueste meteis carnaval en 1996 e en 2002. Seriá doncas una trèva... O un cas de recidiva. En efècte, aqueste jutjament, juste abans las eleccions presidencialas, es plan centrat suls discorses securitaris en vòga en aqueste moment. Mas l'accent es mes sul fait que la seguretat de la vila es plan assegurada amb l'arribada de pompièrs e gendarmas novèls. S'i fa tanben referéncia al « carchériser » de Nicolas Sarkozy.