Sortit de la Vath d'Aussau, lo jornalista Michel Feltin-Palas qu'ei tostemps estat sensible a las lengas e a las culturas regionaus, a tau punt qu'ei vadut especialista de las regions e capredactor deu jornau L'Express.

Despuish 2018, que publica ua letra d'informacion setmanèra qui explica lo riquèr de las lengas de França. Lo son objectiu qu'ei de sostiéner las lengas mensh representadas e/o en via de desparescuda, mes atau medish de protegir lo francés qui's dèisha envadir peus anglicismes. Michel Feltin-Palas que declara qu'ua lenga sus duas aurà desparescut d'ací la fin deu sègle.

Dens ua letra, lo jornalista que hè lo punt sus las consequéncias de la fusion de la Hauta e de la Baisha Normandia enter las quaus ei lo tornar d'ua fiertat normanda. En efèit, la demanda sociau que creish e aquera creishença que’s manifèsta per l'aumentacion de las òbras literàrias e la creacion de cantas contemporanèas en la lenga. En ua auta letra d'informacion, que devisava de las ideas recebudas qui avem sus las lengas de delà las mars, com lo fèit que ne serén pas tant en dangèr com las lengas de metropòli o que ne serén pas lengas escriutas.

Tà vs'inscríver a la letra d'informacion « Sur le bout des langues » : https://event.lexpress.fr/inscription-lettre-info-sur-le-bout-des-langues/?source=groupement

En 2020, que coescriu dab lo jornalista Jean-Michel Apathie J'ai un accent, et alors ?, un ensai sortit a las edicions Michel Lafont qui pòrta tà la lutz la discriminacion peus accents dens la societat francesa.