Explorar los documents (1 total)

Alan Fornells es un artista que fabrica d'objèctes que racontan d'istòrias. Dins son talhièr a Bassan, un villatge pròche de Besièrs, rabota, clavèla, ponça, talha, sublima de tròces de caissetas, de clavèls vièlhs, de plancas recicladas. Pas jamai crompar, recuperar tot, per donar al monde un autre buf, aqueste buf que nos mormolha a l'aurelha d'istòrias en francés, en occitan, en espanhòl... Dins totas las lengas que parlan al còr.

Amada Cròs e Lisa Gròs, de l'associacion Tè Vé Òc, anèron filmar dins son talhièr aqueste representant de l'Art Modèste. En efièch cada mòble creat per Alan Fornells es una òbra d'art, malhon d'un conte entre fantasma e realitat, viatge de la memòria, cèrca del quotidian meravilhos. Entre art, bricolatge e poesia, sublima çò que servís pas pus, per ne faire lo supòrt de sos sòmis.

Veire l'emission de Tè Vé Òc consacrada al vernissatge de la mòstra d'Alan Fornells al CIRDOC - Institut occitan de cultura lo 12/01/2022.