“Quand Nadau vèn en nadant,/ Caramentrant en campanant,/La viando es en aboundant” (Lou Tresor Dóu Felibrige). La letra d’informacion d’aquela fin d’annada fa son nadalet e vos anóncia amb fòrça campanas e campanetas lo Nadal que ven e totas las programacions culturalas que traparetz al pè del sapin. Quant a Besièrs se jogarà l’Opèra d’Aubais de l’Abat Fabre se celebrarà lo fuòc tradicional dels pirenèus dal costat de Pau e, per demorar dins aquel esperit de l’Avent, la nòstra seleccion musicala occitana farà l’ambient al mercat de Nadal de Montpelhièr. Per èsser segurs d’èsser plan prèstes per las Fèstas, lo CIRDÒC-Institut occitan de cultura vos prepausa tanben de profeitar del mes del film documentari per se tornar cap a las estelas o, per los seriafilas, d’agachar la Seria en s’acompanhant d’un libreton de tria. L’auretz comprés se parlarà aicí de Nadal mas pas solament e ’es a vos de ne faire la descobèrta !
Un pauc avans la velha de Novè
Dins un cort tèxte de Memòri e raconte, Frederic Mistral nos ditz : « Nouvè èro la majo festo de l’annado… »
Nadal se situa dins aquel periòde de l'annada ont los jorns son los mai corts e las nuèchs mai longas. Es lo solstici d'ivèrn. Dempuèi la nuèch dels tempses, los òmes inquiets de veire pas mai emergir las longas jornadas ensolelhadas après aquel escur perlongat an calmat lors angoissas en celebrant lo lum, lo fuòc novèl. Uèi, cacha-fuec, candèlas, illuminacions son pas que las reminiscéncias d'aquela tradicion.
Un pauc avans la velha de Novè evòca per de contes, cançons e musicas aquela quista del solelh novèl que vendrà rescaufar lo còr dels umans.