L'òbra de Bernat Manciet qu'ei reconseishuda internacionaument e la soa escritura poetica qu'estó l'objèct de mantuns estudis, traduccions e realizacions artisticas.

A l'iniciativa de l'associacion Chantier Vocal e de la municipalitat de Trensac, un projèct de creacion musicau, dab la votz com sol instrument, qu'estó perpausat dens lo vilatge, a l'entorn de l'escritura de Sonets, seguida de poèmas en francés e gascon.

Un programa de talhièrs artistics a l'escòla e d'encontres poetics entà'us estatjants qu'estó mesa en plaça, entà'u plaser de descobrir o tornar descobrir un poèta locau a la dimension universau, a còps mauconeishut dens lo son vilatge.

Lo concèrt vocau qu'ei l'abotiment d'aqueth projèct artistic, dab la participacion de l'ensemble vocau amator Alen, e deu grop professionau La Manufacture Verbale.