Diplomada de las Bèras arts d'Anvèrs en 2019, Marie Vignau que partatja lo son temps enter la pintrura e l'ensenhament de las arts plasticas, dens las Lanas de Gasconha e en Bearn, dont ei originària. Que tribalha sus imatges deu son quotidian, inscrivudas dens la ruralitat de la soa enfança e de la soa familha. La natura qu'i ei omnipresenta, luxurianta, que jòga sus ua dobla lectura, enter saunejadas e illusions, entà questionar lo noste rapòrt au vivent e aus nostes environaments. Darrèrament, qu'ajusta personatges emblematics deu son vilatge, tornant transcríver un eretatge culturau paisan fragilizat, qui desira visibilizar.

« La mea istòria paisana qu'ei intimament religada a la lenga occitana, au "patoès", ça disèvan los pairbons, bearnés e gascons, qu'entenèvi parlar. Pr'aquò, ne m'an pas transmetut la lenga e qu'èi la sensacion que l'eretatge paisan ei inscrivut dens aquera lenga. Los mens parents n'an pas représ las bòrdas, qu'an quitat lo país, la bòrda pairau qu'a perdut la soa vocacion agricòla après lo decès deus mens pairbons e la lor lenga ne m'ei pas estada transmetuda. L'eretatge d'aquera cultura paisana, dont la lenga ei un pielar, qu'ei donc tresvirat e en mutacion. Aqueth eretatge qu'ei au centre deu men tribalh d'artista, e qu'aimarí que los sons imatges e contrastes evoquèssen la vivacitat deus escambis e de la lenga deus protagonistas d'aqueths tablèus, com espacis sonòres e picturaus. Despuish 2024 qu'èi integrat la PEL Praxis Etnica Liura, entà inscríver mei pregondament la mea practica e las meas recèrcas dens un espaci d'expression occitana. »

[Source : La Galariá]